ಬಿಸಿಲು-ತೇವಾಂಶಕ್ಕೆ ಕೀಟಗಳ ಕಾಟ; ರೈತರಿಗೆ IARI ಎಚ್ಚರಿಕೆ | Pests on the crop

Pest infestation in crops: ದೇಶದ ಹಲವು ಭಾಗಗಳಲ್ಲಿ ಸದ್ಯ ಬಿಸಿ ಮತ್ತು ತೇವಾಂಶ ಹೆಚ್ಚಾಗಿರುವುದರಿಂದ ಬೆಳೆಗಳಲ್ಲಿ ಕೀಟಬಾಧೆ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಐಸಿಎಆರ್-ಭಾರತೀಯ ಕೃಷಿ ಸಂಶೋಧನಾ ಸಂಸ್ಥೆ (IARI) ವಿಜ್ಞಾನಿಗಳು ಎಚ್ಚರಿಸಿದ್ದಾರೆ. ಹೀಗಾಗಿ ರೈತರು ಹೊಲಗಳಲ್ಲಿ ನಿಯಮಿತವಾಗಿ ಪರಿಶೀಲನೆ ನಡೆಸಿ, ಕೀಟ ಕಾಣಿಸಿಕೊಂಡ ಕೂಡಲೇ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸಲಹೆ ನೀಡಿದ್ದಾರೆ.

ಐಎಆರ್​​ಐ ವಿಜ್ಞಾನಿ ಡಾ.ಸುಭಾಷ್ ಎನ್.ಪಿಳ್ಳೈ ಅವರು, ಕೆಲವೊಮ್ಮೆ ತೇವಾಂಶ ಶೇ.100ರ ಸಮೀಪ ತಲುಪುತ್ತಿದ್ದು, ಹಗಲಿನ ಉಷ್ಣತೆ ಹೆಚ್ಚಿರುವುದು ಕೀಟಗಳ ಬೆಳವಣಿಗೆಗೆ ಅನುಕೂಲಕರ ವಾತಾವರಣ ಸೃಷ್ಟಿಸಬಹುದು ಎಂದಿದ್ದಾರೆ. ಭತ್ತದಲ್ಲಿ ಬ್ರೌನ್ ಪ್ಲಾಂಟ್ ಹಾಪರ್ (BPH), ಎಲೆ ಮಡಚುವ ಕೀಟ ಮತ್ತು ಕಾಂಡ ಕೊರೆಯುವ ಕೀಟಗಳ ಬಗ್ಗೆ ರೈತರು ಎಚ್ಚರಿಕೆ ವಹಿಸಬೇಕು ಎಂದಿದ್ದಾರೆ.

ಗಿಡದ ಬುಡದ ಭಾಗವನ್ನು ಪರಿಶೀಲಿಸಿ ಕೀಟಗಳ ಇರುವಿಕೆಯನ್ನು ಮೊದಲ ಹಂತದಲ್ಲೇ ಪತ್ತೆಹಚ್ಚಬೇಕು ಎಂದು ಸಲಹೆ ನೀಡಲಾಗಿದೆ. ಕೀಟಬಾಧೆ ಮಿತಿ (ETL) ಮೀರಿದರೆ ತಜ್ಞರ ಸಲಹೆಯಂತೆ ನಿಯಂತ್ರಣ ಕ್ರಮ ಕೈಗೊಳ್ಳಬೇಕು. ತರಕಾರಿ ಬೆಳೆಗಳಲ್ಲಿ, ವಿಶೇಷವಾಗಿ ಬದನೆಕಾಯಿ, ಹೂಕೋಸು, ಎಲೆಕೋಸು ಮತ್ತು ಟೊಮೆಟೊಗಳಲ್ಲಿ ಫೆರೋಮೋನ್ ಟ್ರ್ಯಾಪ್‌ಗಳನ್ನು ಬಳಸಿ ಕೀಟಗಳ ಚಲನವಲನ ಗಮನಿಸಲು ಸೂಚಿಸಲಾಗಿದೆ.

ವಿಜ್ಞಾನಿಗಳ ಪ್ರಕಾರ, ಒಂದೇ ಕೀಟನಾಶಕವನ್ನು ಪದೇಪದೆ ಬಳಸಿದರೆ ಕೀಟಗಳಲ್ಲಿ ಕೀಟನಾಶಕ ಪ್ರತಿರೋಧ ಶಕ್ತಿ ಬೆಳೆದು, ಔಷಧಿಯ ಪರಿಣಾಮ ಕಡಿಮೆಯಾಗಬಹುದು. ಹೀಗಾಗಿ ಅಗತ್ಯವಿದ್ದಾಗ ತಜ್ಞರ ಸಲಹೆ ಪಡೆದು ಸೂಕ್ತ ಕೀಟನಾಶಕಗಳನ್ನು ಬದಲಾಯಿಸಿ ಬಳಸಬೇಕು.

ಇದಲ್ಲದೆ, ಪ್ರಸ್ತುತ ಹವಾಮಾನ ಗಮನದಲ್ಲಿಟ್ಟುಕೊಂಡು ಸಿಹಿ ಜೋಳ, ಬೇಬಿ ಕಾರ್ನ್ ಹಾಗೂ ಕ್ಯಾರೆಟ್‌ಗಳನ್ನು ರೈತರು ಎತ್ತರಿಸಿದ ಮಣ್ಣಿನ ಸಾಲುಗಳಲ್ಲಿ ಬೆಳೆಯುವಂತೆ ಸಲಹೆ ನೀಡಲಾಗಿದೆ. ಮೆಣಸಿನಕಾಯಿ ಬೆಳೆಯಲ್ಲಿ ವೈರಸ್ ಸೋಂಕಿತ ಗಿಡಗಳನ್ನು ಗುರುತಿಸಿ ತೆಗೆದುಹಾಕುವುದು ಉತ್ತಮ ಎಂದು ಸೂಚಿಸಲಾಗಿದೆ.

ನಿಯಮಿತ ಬೆಳೆ ಪರಿಶೀಲನೆ, ಕೀಟ-ರೋಗಗಳನ್ನು ಆರಂಭದಲ್ಲೇ ಗುರುತಿಸಿ, ಅಗತ್ಯವಿದ್ದರೆ ಮಾತ್ರ ಕೀಟನಾಶಕ ಬಳಕೆಯನ್ನು ಕಡಿಮೆ ಮಾಡಬಹುದು ಎಂದುಐಸಿಎಆರ್-ಆಗ್ರೋಮೆಟ್ ಸಮಿತಿ ತಿಳಿಸಿದೆ,(ಏಜೆನ್ಸೀಸ್​).