ಹರಿದ್ವಾರ ಕುಂಭಮೇಳ: ಹಿಂದೂಯೇತರರಿಗೆ ಪ್ರವೇಶ ನಿಷೇಧ! ಪೋಸ್ಟರ್ ಹಾಕಿ ಖಡಕ್ ಸಂದೇಶ ರವಾನಿಸಿದ ಆಡಳಿತ ಮಂಡಳಿ| Kumbh Mela

ಹರಿದ್ವಾರ: ಹರಿದ್ವಾರದ ಹರ್ ಕಿ ಪೌರಿಯಲ್ಲಿ ನಡೆಯಲಿರುವ ಕುಂಭಮೇಳ(Kumbh Mela)ಕ್ಕೆ ಹಿಂದೂಯೇತರರ ಪ್ರವೇಶವನ್ನು ನಿಷೇಧಿಸಬೇಕೆಂಬ ಬೇಡಿಕೆ ಹೆಚ್ಚುತ್ತಿರುವ ಹಿನ್ನಲೆ ಆಡಳಿತ ಮಂಡಳಿ ತೆಗೆದೊಕೊಂಡಿರುವ ನಿರ್ಧಾರ ಚರ್ಚೆಗೆ ವೇದಿಕೆಯಾಗಿದೆ.

ಹಿಂದೂಯೇತರರ ಪ್ರವೇಶವನ್ನು ನಿಷೇಧಿಸಬೇಕೆಂಬ ಬೇಡಿಕೆ ಹಿನ್ನಲೆ, ಹರಿದ್ವಾರ ಘಾಟ್‌ಗಳ ಆಡಳಿತ ಮಂಡಳಿ ಹರಿದ್ವಾರದ ಸುತ್ತಲೂ 'ಹಿಂದೂಯೇತರರಿಗೆ ಪ್ರವೇಶವಿಲ್ಲ' ಎಂಬ ಪೋಸ್ಟರ್‌ಗಳನ್ನು ಹಾಕುವ ಮೂಲಕ ತನ್ನ ನಿಲುವನ್ನು ಬಹಿರಂಗವಾಗಿ ತಿಳಿಸಿದೆ. ಪೋಸ್ಟರ್‌ಗಳಲ್ಲಿ ಪುರಸಭೆ ಕಾಯ್ದೆ ಅನುಸಾರ ಈ ಪ್ರದೇಶದಲ್ಲಿ ಹಿಂದೂಯೇತರರ ಪ್ರವೇಶವನ್ನು ನಿಷೇಧಿಸಲಾಗಿದೆ ಎಂದು ಸ್ಪಷ್ಟವಾಗಿ ಬರೆಯಲಾಗಿದೆ.

ಮಾಧ್ಯಮದವರೊಂದಿಗೆ ಮಾತನಾಡಿದ ಗಂಗಾ ಸಭಾ ಅಧ್ಯಕ್ಷ ನಿತಿನ್ ಗೌತಮ್, ಪ್ರತಿಯೊಬ್ಬರೂ ಈ ನಿಯಮವನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂದರು. ಯಾವ ಪ್ರದೇಶದಲ್ಲಿ ಯಾವ ನಿಯಮಗಳು ಅನ್ವಯಿಸುತ್ತವೆ ಎಂಬುದು ಮುಖ್ಯವಾಗಿದ್ದು, ಹರ್ ಕಿ ಪೌರಿಯಲ್ಲಿ ಯಾವುದೇ ಗೊಂದಲವಾಗದಿರಲಿ ಎಂದು ಈ ಪೋಸ್ಟರ್‌ಗಳನ್ನು ಅಳವಡಿಸಲಾಗಿದೆ ಎಂದು ಅವರು ಹೇಳಿದರು.

ಗಂಗಾ ಸಭೆಯು ಹರ್ ಕಿ ಪೌರಿಯನ್ನು ಪ್ರಮುಖ ತೀರ್ಥಯಾತ್ರೆ ಮತ್ತು ಸನಾತನ ನಂಬಿಕೆಯ ಕೇಂದ್ರವೆಂದು ಪರಿಗಣಿಸಿ 1916 ರ ಪುರಸಭೆಯ ಬೈಲಾಗಳನ್ನು ಆಡಳಿತವು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕೆಂದು ಒತ್ತಾಯಿಸಿದೆ.

ಹರ್ ಕಿ ಪೌರಿ ಪ್ರದೇಶಕ್ಕೆ ಹಿಂದೂಯೇತರರ ಪ್ರವೇಶವನ್ನು ನಿರ್ಬಂಧಿಸುವ ಈ ಬೈಲಾಗಳು ಮತ್ತು ಅವುಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಬೇಕು ಎಂದು ಸಂಘಟನೆ ಹೇಳಿಕೊಂಡಿದೆ. ಹರ್ ಕಿ ಪೌರಿಗೆ ಮಾತ್ರ ಈ ಬೇಡಿಕೆ ಸೀಮಿತವಾಗಿಲ್ಲ. ಹರಿದ್ವಾರದ ಎಲ್ಲಾ ಪ್ರಮುಖ ಘಾಟ್‌ಗಳಲ್ಲಿ ಹಿಂದೂಯೇತರರ ಪ್ರವೇಶವನ್ನು ನಿಷೇಧಿಸುವಂತೆ ಗಂಗಾ ಸಭಾ ರಾಜ್ಯ ಸರ್ಕಾರ ಮತ್ತು ಆಡಳಿತವನ್ನು ಒತ್ತಾಯಿಸಿದೆ.

ಹರಿದ್ವಾರವು ಧಾರ್ಮಿಕ ನಗರವಾಗಿದ್ದು, ಅದರ ಘಾಟ್‌ಗಳು ಸನಾತನ ಸಂಪ್ರದಾಯಗಳು ಮತ್ತು ನಂಬಿಕೆಯೊಂದಿಗೆ ಆಳವಾಗಿ ಸಂಪರ್ಕ ಹೊಂದಿವೆ, ಆದ್ದರಿಂದ ಅದರ ಪಾವಿತ್ರ್ಯವನ್ನು ಕಾಪಾಡಿಕೊಳ್ಳುವುದು ಅತ್ಯಗತ್ಯ ಎನ್ನುವುದು ಸಂಘಟನೆಯ ವಾದವಾಗಿದೆ.

ಘಾಟ್‌ಗಳಲ್ಲಿ ಹಾಜರಿರುವ ಪುರೋಹಿತರು ಮತ್ತು ಸಂತರು ಈ ಕ್ರಮಗಳನ್ನು ಬೆಂಬಲಿಸಿದ್ದು, ಹಣ ಗಳಿಸುವ ನೆಪದಲ್ಲಿ ಕೆಲವು ಜನರು ಭಕ್ತರ ಧಾರ್ಮಿಕ ಭಾವನೆಗಳಿಗೆ ನೋವುಂಟು ಮಾಡುತ್ತಿದ್ದಾರೆ, ಇದು ವಿವಾದಗಳು ಮತ್ತು ಘರ್ಷಣೆಗಳಿಗೆ ಕಾರಣವಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.

ಕುಂಭವು ಅತ್ಯಂತ ಪವಿತ್ರವಾದ ಕಾರ್ಯಕ್ರಮವಾಗಿದ್ದು, ಹರಿದ್ವಾರವು ದೇವಭೂಮಿಯ ದ್ವಾರವಾಗಿದೆ, ಆದ್ದರಿಂದ ಕುಂಭ ಮತ್ತು ಘಾಟ್ ಪ್ರದೇಶಗಳಿಗೆ ಹಿಂದೂಯೇತರರ ಪ್ರವೇಶವನ್ನು ಸಂಪೂರ್ಣವಾಗಿ ನಿಷೇಧಿಸಬೇಕು ಎಂದು ಸಂತರು ಹೇಳಿದ್ದಾರೆ.

ಮತ್ತೊಂದೆಡೆ, ಮುಸ್ಲಿಂ ಸಂಘಟನೆಗಳು ಮತ್ತು ಸಮುದಾಯದ ಸದಸ್ಯರು ಈ ಕ್ರಮವನ್ನು ಬಲವಾಗಿ ವಿರೋಧಿಸಿದ್ದಾರೆ. ಘಾಟ್‌ಗಳಿಗೆ ಪ್ರವೇಶವನ್ನು ನಿರ್ಬಂಧಿಸುವುದು ಮತ್ತು ಗುರುತಿನ ಆಧಾರಿತ ತಪಾಸಣೆಗಳನ್ನು ನಡೆಸುವುದು ಸಂಕುಚಿತ ಮನಸ್ಸಿನ ಚಿಂತನೆಯನ್ನು ಪ್ರತಿಬಿಂಬಿಸುತ್ತದೆ ಮತ್ತು ಕೋಮು ಸಾಮರಸ್ಯಕ್ಕೆ ಹಾನಿ ಮಾಡುತ್ತದೆ ಎಂದು ಹೇಳಿದ್ದಾರೆ.

ಪ್ರತಿಯೊಬ್ಬರೂ ತಮ್ಮ ಆಧಾರ್ ಕಾರ್ಡ್‌ಗಳನ್ನು ತಮ್ಮೊಂದಿಗೆ ಇಟ್ಟುಕೊಳ್ಳಲು ಕೇಳಿಕೊಳ್ಳಲಾಗಿದೆ ಎಂದ ಅರ್ಚಕ ಉಜ್ವಲ್ ಪಂಡಿತ್ ಹೇಳಿದರು. ಹರ್ ಕಿ ಪೌರಿ ಅಥವಾ ಘಾಟ್ ಪ್ರದೇಶಗಳಲ್ಲಿ ಯಾವುದೇ ಹಿಂದೂಯೇತರರು ವ್ಯಾಪಾರ ನಡೆಸುತ್ತಿರುವುದು ಕಂಡುಬಂದರೆ, ಶ್ರೀ ಗಂಗಾ ಸಭೆಗೆ ಮಾಹಿತಿಯನ್ನು ನೀಡಲಾಗುವುದು ಮತ್ತು ಕಠಿಣ ಕ್ರಮ ಕೈಗೊಳ್ಳಲಾಗುವುದು. ಘಾಟ್​ಗಳ ಪಾವಿತ್ರ್ಯವನ್ನು ಕಾಪಾಡಿಕೊಳ್ಳಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅವರು ಹೇಳಿದರು,(ಏಜನ್ಸೀಸ್).