ಚೆಪಾಕ್‌ನಲ್ಲಿ ಗುಜರಾತ್ ಘರ್ಜನೆ! ಋತುರಾಜ್ ಹೋರಾಟ ವ್ಯರ್ಥ; ಸಾಯಿ ಸುದರ್ಶನ್ ಬ್ಯಾಟಿಂಗ್‌ ಆರ್ಭಟಕ್ಕೆ ಸಿಎಸ್‌ಕೆ ಶರಣು! CSKvsGT

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಆರಂಭದಿಂದಲೇ ರನ್ ಗಳಿಸಲು ಪರದಾಡಿತು. ನಾಯಕ ಋತುರಾಜ್ ಗಾಯಕ್ವಾಡ್ 60 ಎಸೆತಗಳಲ್ಲಿ ಅಜೇಯ 74 ರನ್ ಗಳಿಸುವ ಮೂಲಕ ತಂಡಕ್ಕೆ ಆಸರೆಯಾದರು. ಅಂತಿಮ ಹಂತದಲ್ಲಿ ಶಿವಂ ದುಬೆ 22 ರನ್​ ಮತ್ತು ಜೇಮಿ ಓವರ್ಟನ್ 18 ರನ್​ ಅವರ ಸಣ್ಣ ಕಾಣಿಕೆಗಳಿಂದ ಸಿಎಸ್‌ಕೆ 150 ರನ್‌ಗಳ ಗಡಿ ದಾಟಲು ಯಶಸ್ವಿಯಾಯಿತು. ಆದರೆ, ಗುಜರಾತ್ ಬೌಲರ್‌ಗಳ ಶಿಸ್ತುಬದ್ಧ ದಾಳಿಯ ಮುಂದೆ ಚೆನ್ನೈನ ಇತರ ಬ್ಯಾಟರ್‌ಗಳು ಮಂಕಾದರು.

ಕಗಿಸೊ ರಬಾಡ: 25 ರನ್ ನೀಡಿ 3 ವಿಕೆಟ್ ಪಡೆದು ಸಿಎಸ್‌ಕೆ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು.

ಅರ್ಷದ್ ಖಾನ್: ಪ್ರಮುಖ 2 ವಿಕೆಟ್ ಕಬಳಿಸಿದರು.

ಸಿರಾಜ್, ಮಾನವ್ ಸುತಾರ್ ಮತ್ತು ಜೇಸನ್ ಹೋಲ್ಡರ್: ತಲಾ ಒಂದು ವಿಕೆಟ್ ಪಡೆದು ಸಾಥ್ ನೀಡಿದರು.

159 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಗುಜರಾತ್ ಟೈಟಾನ್ಸ್‌ಗೆ ಶುಭಮನ್ ಗಿಲ್ ಮತ್ತು ಸಾಯಿ ಸುದರ್ಶನ್ ಸ್ಫೋಟಕ ಆರಂಭ ನೀಡಿದರು. ಪವರ್‌ಪ್ಲೇನಲ್ಲಿ ಈ ಜೋಡಿ 55 ರನ್ ಚಚ್ಚುವ ಮೂಲಕ ಜಯದ ಹಾದಿಯನ್ನು ಸುಗಮಗೊಳಿಸಿತು. ನಾಯಕ ಗಿಲ್ ಬೇಗನೆ ಔಟಾದರೂ, ಸಾಯಿ ಸುದರ್ಶನ್ ಅವರು ಜೋಸ್ ಬಟ್ಲರ್ (39 ರನ್) ಜೊತೆಗೂಡಿ 97 ರನ್‌ಗಳ ಅಮೋಘ ಜೊತೆಯಾಟವಾಡಿದರು.

ಸಾಯಿ ಸುದರ್ಶನ್ ಕೇವಲ 46 ಎಸೆತಗಳಲ್ಲಿ 87 ರನ್ ಸಿಡಿಸಿ ತಂಡವನ್ನು ಗೆಲುವಿನ ದಡಕ್ಕೆ ತಂದರು. ತಂಡಕ್ಕೆ ಕೇವಲ 4 ರನ್ ಬೇಕಿದ್ದಾಗ ಸಾಯಿ ಔಟಾದರೂ, ಬಟ್ಲರ್ ಇನ್ನು 3 ಓವರ್‌ಗಳು ಬಾಕಿ ಇರುವಂತೆಯೇ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಇದುವರೆಗೆ ಚೆನ್ನೈನ ತವರಿನ ಮೈದಾನದಲ್ಲಿ ಸಿಎಸ್‌ಕೆ ವಿರುದ್ಧ ಗೆಲ್ಲಲು ಸಾಧ್ಯವಾಗದ ಗುಜರಾತ್ ಟೈಟಾನ್ಸ್, ಈ ಬಾರಿ ಆ ಕದನವನ್ನು ಗೆದ್ದು ದಾಖಲೆ ಬರೆದಿದೆ. ಚೆನ್ನೈ ತಂಡಕ್ಕೆ ಇದು ಈ ಸೀಸನ್‌ನ ಎರಡನೇ ಹೋಮ್ ಸೋಲಾಗಿದ್ದು, ಪ್ಲೇ ಆಫ್ ಹಾದಿಯಲ್ಲಿ ಸ್ವಲ್ಪ ಹಿನ್ನಡೆಯಾಗಿದೆ,(ಏಜೆನ್ಸೀಸ್​).