ಬೈಕ್ ಸವಾರಿಯಲ್ಲಿ ಅಜ್ಜಿಯ ದೇಸಿ ಸ್ವಾಗ್: ಮೂವರು ಮುದುಕರನ್ನು ಕೂರಿಸಿಕೊಂಡು ಅಜ್ಜಿ ಸವಾರಿ! | Grandma rides

ವೈರಲ್ ಆಗಿರುವ ಈ ಕ್ಲಿಪ್‌ನಲ್ಲಿ, ರಂಗುರಂಗಿನ ಲೆಹೆಂಗಾ-ಓಢಣಿ ತೊಟ್ಟ ಅಜ್ಜಿಯೊಬ್ಬರು ಅತ್ಯಂತ ಆತ್ಮವಿಶ್ವಾಸದಿಂದ ಮೋಟಾರ್ ಸೈಕಲ್ ಚಲಾಯಿಸುತ್ತಿದ್ದಾರೆ. ವಿಶೇಷವೆಂದರೆ, ಅವರ ಹಿಂದೆ ಒಬ್ಬ ವೃದ್ಧ ಮತ್ತು ಇಬ್ಬರು ವೃದ್ಧೆಯರು ಸೇರಿ ಒಟ್ಟು ಮೂವರು ಕುಳಿತಿದ್ದಾರೆ. ಸಾಂಪ್ರದಾಯಿಕ ಪೇಟ ಮತ್ತು ರಾಜಸ್ಥಾನಿ ಸಂಸ್ಕೃತಿಯ ಉಡುಪು ಧರಿಸಿರುವ ಈ ನಾಲ್ವರ ತಂಡವು ಸಾರ್ವಜನಿಕ ರಸ್ತೆಯಲ್ಲಿ ಯಾವುದೇ ಭಯವಿಲ್ಲದೆ ಸಾಗುತ್ತಿರುವುದು ದಾರಿಹೋಕರ ಗಮನ ಸೆಳೆದಿದೆ.

ಇನ್‌ಸ್ಟಾಗ್ರಾಮ್ ಮತ್ತು ಫೇಸ್‌ಬುಕ್‌ನಲ್ಲಿ ಈ ವೀಡಿಯೋ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದಿದೆ. ನೆಟ್ಟಿಗರು ಈ ಅಜ್ಜಿಯ ಧೈರ್ಯಕ್ಕೆ ಮಾರುಹೋಗಿದ್ದು, "ಇದೇ ನಿಜವಾದ ದೇಸಿ ಸ್ವಾಗ್", "ವಯಸ್ಸಾದರೂ ಹುಮ್ಮಸ್ಸು ಕಡಿಮೆಯಾಗಿಲ್ಲ" ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಇನ್ನು ಕೆಲವರು ಇದನ್ನು "ರಾಜಸ್ಥಾನಿ ಅಜ್ಜಿ ಬೈಕ್ ಸ್ಕ್ವಾಡ್" ಎಂದು ತಮಾಷೆಯಾಗಿ ಕರೆದಿದ್ದಾರೆ. ಗ್ರಾಮೀಣ ಭಾರತದ ಮುಗ್ಧತೆ ಮತ್ತು ಹಳ್ಳಿ ಜನರ ಬಿಂದಾಸ್ ಜೀವನಶೈಲಿಗೆ ಈ ವೀಡಿಯೋ ಸಾಕ್ಷಿಯಾಗಿದೆ.

ಈ ವೀಡಿಯೋ ನೋಡಲು ಮಜವಾಗಿದ್ದರೂ, ರಸ್ತೆ ಸುರಕ್ಷತೆಯ ದೃಷ್ಟಿಯಿಂದ ಇದು ಗಂಭೀರ ಚರ್ಚೆಗೆ ದಾರಿಯಾಗಿದೆ. ಭಾರತೀಯ ಸಂಚಾರ ನಿಯಮಗಳ ಪ್ರಕಾರ, ದ್ವಿಚಕ್ರ ವಾಹನದಲ್ಲಿ ಕೇವಲ ಇಬ್ಬರಿಗೆ ಮಾತ್ರ ಅವಕಾಶವಿದೆ. ಇಲ್ಲಿ ನಾಲ್ವರು ಪ್ರಯಾಣಿಸುತ್ತಿರುವುದು ನಿಯಮದ ಉಲ್ಲಂಘನೆಯಾಗಿದೆ. ವೀಡಿಯೋದಲ್ಲಿರುವ ನಾಲ್ವರೂ ಹೆಲ್ಮೆಟ್ ಧರಿಸಿಲ್ಲ, ಇದು ಅಪಘಾತ ಸಂಭವಿಸಿದರೆ ಪ್ರಾಣಾಪಾಯಕ್ಕೆ ಕಾರಣವಾಗಬಹುದು. ಸಾಮಾಜಿಕ ಜಾಲತಾಣಗಳಲ್ಲಿ ಅನೇಕರು "ಇದು ನೋಡಲು ಚೆನ್ನಾಗಿದೆ, ಆದರೆ ದಯವಿಟ್ಟು ಇಂತಹ ಸಾಹಸ ಮಾಡಬೇಡಿ" ಎಂದು ಕಿವಿಮಾತು ಹೇಳಿದ್ದಾರೆ,(ಏಜೆನ್ಸೀಸ್).