ಈ ಊರಿನಲ್ಲಿ ಒಂದೇ ಒಂದು ಕೆಟ್ಟ ಬೈಗುಳ ಆಡುವಂತಿಲ್ಲ! ಆಡಿದ್ರೆ 500 ರೂ. ದಂಡ, ಇಲ್ಲವೇ 1 ಗಂಟೆ ಕ್ಲೀನಿಂಗ್​ ಶಿಕ್ಷೆ

ಮಧ್ಯಪ್ರದೇಶ: ಇತ್ತೀಚಿನ ದಿನಗಳಲ್ಲಿ, ಕೆಟ್ಟ ಬೈಗುಳದಿಂದ ಜಗಳ ಆಡುವುದು, ಸಾರ್ವಜನಿಕ ಸ್ಥಳಗಳಲ್ಲಿ ಕಿತ್ತಾಡಿಕೊಳ್ಳುವುದು ತೀರ ಸಾಮಾನ್ಯವಾಗಿಬಿಟ್ಟಿದೆ. ಅದರಲ್ಲೂ, ನಗರ ಪ್ರದೇಶಗಳಲ್ಲಿ ವಿಪರೀತ. ಒಂದು ಸಣ್ಣ ಪಾರ್ಕಿಂಗ್​ ವಿಚಾರದಿಂದ ಹಿಡಿದು ಯಾವುದಾದರೂ ವಿಷಯಕ್ಕೆ ಮಾತಿನಲ್ಲಿ ಜಟಾಪಟಿ ನಡೆಸುವ ಮಂದಿ, ತಾವು ಬಳಸುವ ಅಸಭ್ಯ ಪದಗಳು ಮಕ್ಕಳ ಕಿವಿಗೆ ಬಿದ್ದರೆ ಏನಾದೀತು? ಎಂಬ ಸಣ್ಣ ಅರಿವೂ ಇಲ್ಲದಂತೆ ಆಡುವುದು ಭಾರೀ ಬೇಸರದ ಸಂಗತಿ.

ಅಸಭ್ಯ, ಅಶ್ಲೀಲ ಪದಗಳ ಬಳಕೆಯನ್ನು ಕೇಳುವ ಕೆಲವರು, ಸಭ್ಯರು ಇರುವ ಸ್ಥಳದಲ್ಲಿ ಇಂತಹ ಬೈಗುಳಗಳನ್ನು ಸಂಪೂರ್ಣವಾಗಿ ನಿಲ್ಲಿಸಿ ಎಂದು ಪದ ಬಳಕೆ ಮಾಡುವವರಿಗೆ ಕ್ಲಾಸ್​ ತೆಗೆದುಕೊಳ್ಳುತ್ತಾರೆ. ಇನ್ನೂ ಕೆಲವರು ಒಂದು ಹೆಜ್ಜೆ ಮುಂದೋಗಿ, ನೇರ ಕಪಾಳಕ್ಕೆ ಎರಡು ಕೊಟ್ಟು ಅಂಥವರ ಬಾಯಿ ಮುಚ್ಚಿಸುತ್ತಾರೆ. ಆದರೆ, ಇಲ್ಲೊಂದು ರಾಜ್ಯದ ಗ್ರಾಮದಲ್ಲಿ ತಮ್ಮ ಊರಿನ ಜನರು, ಒಂದೇ ಒಂದು ಕೆಟ್ಟ ಪದ ಬಳಸಿದ್ದು ಅಥವಾ ಆಡಿದ್ದು ಗೊತ್ತಾದರೆ, ಅವರಿಗೆ 500 ರೂ. ದಂಡ, ಇಲ್ಲವೇ 1 ಗಂಟೆಗಳ ಕಾಲ ಕ್ಲೀನಿಂಗ್​ ಕೆಲಸವೇ ಶಿಕ್ಷೆಯಾಗಿದೆ. 

ಮಧ್ಯಪ್ರದೇಶದ ಭೋಪಾಲ್​ನ ಒಂದು ಹಳ್ಳಿಯ ಗ್ರಾಮ ಪಂಚಾಯಿತಿ ಇಂತಹದ್ದೊಂದು ಮಹತ್ವದ ನಿರ್ಧಾರವನ್ನು ಕೈಗೊಂಡಿದೆ. ಯೋಗ್ಯ ನಡವಳಿಕೆಯನ್ನು ಖಚಿತಪಡಿಸಿಕೊಳ್ಳಲು ಒಂದು ವಿಶಿಷ್ಟ ಮಾರ್ಗವನ್ನು ಅನುಸರಿಸುತ್ತಿದೆ. ಬುರ್ಹಾನ್‌ಪುರ ಜಿಲ್ಲೆಯ ಬೋರ್ಸರ್ ಎಂಬ ಗ್ರಾಮದಲ್ಲಿ, ಕೆಟ್ಟ ಭಾಷೆ ಅಥವಾ ಪದಗಳನ್ನು ಬಳಸುವ ತಪ್ಪಿತಸ್ಥರಿಗೆ ಸ್ಥಳದಲ್ಲೇ 500 ರೂ. ದಂಡ ಅಥವಾ ಒಂದು ಗಂಟೆಗಳ ಕಾಲ ಸ್ವಚ್ಛತಾ ಕಾರ್ಯವನ್ನು ಮಾಡಿಸುವುದು ಶಿಕ್ಷೆಯ ರೂಪವಾಗಿದೆ. 

ಗ್ರಾಮ ಪಂಚಾಯತ್ ಸರ್ವಾನುಮತದಿಂದ ಈ ನಿರ್ಧಾರವನ್ನು ತೆಗೆದುಕೊಂಡಿದ್ದು, ಅಶ್ಲೀಲ ಪದಗಳ ಬಳಕೆ ಮಾಡದಂತೆ, ಮಾಡಿದರೆ ಏನೆಲ್ಲ ಪರಿಣಾಮ ಎದುರಿಸಬೇಕಿದೆ ಎಂಬುದರ ಕುರಿತು ಗ್ರಾಮದಾದ್ಯಂತ ಪೋಸ್ಟರ್‌ಗಳನ್ನು ಅಂಟಿಸಲಾಗಿದೆ. ಜನರಲ್ಲಿ ಗೌರವಾನ್ವಿತ ನಡವಳಿಕೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಕೆಟ್ಟ ಪದಗಳ ಕಾರಣದಿಂದಾಗಿ ಉಂಟಾಗಬಹುದಾದ ಘರ್ಷಣೆಗಳನ್ನು ತಪ್ಪಿಸಲು ಈ ನಿಯಮ ಅವಶ್ಯ ಎನ್ನಲಾಗಿದೆ.

ಮಕ್ಕಳು ಮತ್ತು ವಯಸ್ಕರಲ್ಲಿ ಅಶ್ಲೀಲ ಭಾಷೆಯ ವ್ಯಾಪಕ ಬಳಕೆಯನ್ನು ತಡೆಯುವ ಗುರಿಯನ್ನು ಈ ಕ್ರಮ ಹೊಂದಿದೆ ಎಂದು ಬೋರ್ಸರ್ ಗ್ರಾಮದ ಉಪ ಮುಖ್ಯಸ್ಥ ವಿನೋದ್ ಶಿಂಧೆ ಸುದ್ದಿ ಸಂಸ್ಥೆ ಐಯನ್ಸ್​ಗೆ (IANS) ತಿಳಿಸಿದ್ದಾರೆ. ಈ ಹಿಂದೆ, ತಾಯಂದಿರು ಮತ್ತು ಸಹೋದರಿಯರನ್ನು ಗುರಿಯಾಗಿಸಿಕೊಂಡು ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಕೆಟ್ಟ ಭಾಷೆಯನ್ನು ಬಳಸುತ್ತಿದ್ದರು. ಈಗ, ಅಂತಹ ಪದಗಳನ್ನು ಬಳಸುವವರು 500 ರೂ. ದಂಡ ಪಾವತಿಸಬೇಕಾಗುತ್ತದೆ ಅಥವಾ ಗ್ರಾಮವನ್ನು ಸ್ವಚ್ಛಗೊಳಿಸಲು ಒಂದು ಗಂಟೆ ಕಳೆಯಬೇಕಾಗುತ್ತದೆ ಎಂದು ವಿನೋದ್ ಹೇಳಿದ್ದಾರೆ. 

ವಿಶೇಷ ಎಂದರೆ, ಈ ಯೋಜನೆಯು ಈಗಾಗಲೇ ಫಲ ನೀಡಲು ಪ್ರಾರಂಭಿಸಿದೆ ಎಂದಿದ್ದಾರೆ. ಜನರು ಈಗ ಅಶ್ಲೀಲ ಅಥವಾ ಕೆಟ್ಟ ಪದಗಳ ಬಳಕೆಯನ್ನು ಕ್ರಮೇಣವಾಗಿ ಕಡಿಮೆ ಮಾಡಿದ್ದಾರೆ. ಈ ಹಿಂದೆ, ಮಕ್ಕಳು ಪದಗಳಲ್ಲಿನ ಅಶ್ಲೀಲತೆಯನ್ನು ಅರ್ಥಮಾಡಿಕೊಳ್ಳದೆ ಕೆಟ್ಟ ಪದಗಳನ್ನು ಬಳಸುತ್ತಿದ್ದರು. ಪೋಷಕರ ಎಚ್ಚರಿಕೆಯ ಹೊರತಾಗಿಯೂ ಅವರು ಅಂತಹ ಪದಗಳನ್ನು ಬಳಸುತ್ತಿದ್ದರು. ಆದರೀಗ, ಹೊಸ ಶಿಕ್ಷೆಯನ್ನು ಜಾರಿಗೊಳಿಸಿದ ಬಳಿಕ ಪರಿಸ್ಥಿತಿ ಬಹಳಷ್ಟು ಸುಧಾರಿಸಿದೆ ಎಂದು ಸ್ಥಳೀಯ ನಿವಾಸಿಯೊಬ್ಬರು ತಿಳಿಸಿದ್ದಾರೆ,(ಏಜೆನ್ಸೀಸ್).