ವಿದೇಶಿ ಚಿನ್ನದ ಮೇಲಿನ ಅವಲಂಬನೆ ತಗ್ಗಿಸಲು ಕೇಂದ್ರದ ಹೊಸ ಪ್ಲಾನ್!...ನಿಮ್ಮ ಮನೆಯ ಹಳೆಯ ಒಡವೆಗಳೇ ದೇಶದ ಬಂಡವಾಳ | Gold Monetisation Scheme

ಈ ಮಹತ್ವದ ಬದಲಾವಣೆಯ ಮೂಲಕ ಭಾರತೀಯರ ಮನೆಗಳಲ್ಲಿರುವ 1,000 ಟನ್‌ಗೂ ಅಧಿಕ ಚಿನ್ನವನ್ನು ಮಾರುಕಟ್ಟೆಗೆ ತರುವ ಗುರಿಯನ್ನು ಸರ್ಕಾರ ಹೊಂದಿದೆ. ಈ ಕುರಿತು ವಾಣಿಜ್ಯ ಸಚಿವಾಲಯವನ್ನು ಸಂಪರ್ಕಿಸಲಾಗಿದ್ದು, ಅವರ ಪ್ರತಿಕ್ರಿಯೆಗಾಗಿ ಕಾಯಲಾಗುತ್ತಿದೆ.

ಭಾರತವು ಜಗತ್ತಿನಲ್ಲೇ ಅತಿ ಹೆಚ್ಚು ಚಿನ್ನ ಖರೀದಿಸುವ ದೇಶಗಳಲ್ಲಿ ಒಂದಾಗಿದೆ. ಇಲ್ಲಿ ಚಿನ್ನವನ್ನು ಕೇವಲ ಆಭರಣವಾಗಿ ಮಾತ್ರವಲ್ಲದೆ ಭವಿಷ್ಯದ ಉಳಿತಾಯದ ನಿಧಿಯಾಗಿಯೂ ನೋಡಲಾಗುತ್ತದೆ. ಆದರೆ ಉದ್ಯಮ ಸಂಸ್ಥೆಗಳ ಪ್ರಕಾರ, ಇದು ದೇಶದಲ್ಲಿ ಬಳಕೆಯಾಗದ ಚಿನ್ನವಾಗಿ ಉಳಿದುಬಿಡುತ್ತದೆ. ಆದ್ದರಿಂದ, ಹೊಸ ಪ್ರಸ್ತಾವಿತ ನಿಯಮಾವಳಿಗಳ ಪ್ರಕಾರ, ದೇಶಾದ್ಯಂತ ಇರುವ ಚಿನ್ನದ ವ್ಯಾಪಾರಿಗಳನ್ನು ಈ ಯೋಜನೆಯಲ್ಲಿ ಕಲೆಕ್ಷನ್ ಪಾರ್ಟ್‌ನರ್ಸ್ ಆಗಿ ಸೇರಿಸಿಕೊಳ್ಳಲು ನಿರ್ಧರಿಸಲಾಗಿದೆ.

ಹೊಸ ನಿಯಮಾವಳಿಯಡಿ ದೇಶದ ಬಂಗಾರದ ವ್ಯಾಪಾರಿಗಳು ಸಾರ್ವಜನಿಕರಿಂದ ಚಿನ್ನದ ಠೇವಣಿಗಳನ್ನು ಒಟ್ಟುಗೂಡಿಸಲು ಅವಕಾಶ ಕಲ್ಪಿಸಲಾಗುತ್ತಿದೆ ಎಂದು ಅಖಿಲ ಭಾರತ ಜ್ಯುವೆಲ್ಲರ್ಸ್ ಮತ್ತು ಗೋಲ್ಡ್‌ಸ್ಮಿತ್ ಫೆಡರೇಶನ್ ತಿಳಿಸಿದೆ. ದೇಶೀಯ ಮಾರುಕಟ್ಟೆಯ ಬೇಡಿಕೆ ಅಥವಾ ಒಡವೆ ಉದ್ಯಮದ ನೌಕರರ ಜೀವನೋಪಾಯಕ್ಕೆ ಧಕ್ಕೆ ತರದೇ, ವಿದೇಶದಿಂದ ಆಮದಾಗುವ ಚಿನ್ನದ ಪ್ರಮಾಣವನ್ನು ಕಡಿಮೆ ಮಾಡಲು ಜ್ಯುವೆಲ್ಲರಿ ಸಂಘಟನೆಗಳು ಸರ್ಕಾರಕ್ಕೆ ಈ ರಚನಾತ್ಮಕ ಬದಲಾವಣೆ ತರಲು ಮನವಿ ಮಾಡಿದ್ದವು.

2015 ರಲ್ಲಿ ಕರೆಂಟ್ ಅಕೌಂಟ್ ಡೆಫಿಸಿಟ್ (CAD) ಕಡಿಮೆ ಮಾಡುವ ಮತ್ತು ಚಿನ್ನದ ಆಮದು ತಗ್ಗಿಸುವ ಉದ್ದೇಶದಿಂದ ಜಿಎಂಎಸ್ ಯೋಜನೆಯನ್ನು ತರಲಾಗಿತ್ತು. ಜನರು ಭೌತಿಕ ಚಿನ್ನ ಖರೀದಿಸುವ ಬದಲು ಈ ಯೋಜನೆಯಲ್ಲಿ ಹೂಡಿಕೆ ಮಾಡಲು ಪ್ರೋತ್ಸಾಹಿಸಲಾಗಿತ್ತು. ಠೇವಣಿಯ ಅವಧಿಗೆ ತಕ್ಕಂತೆ ವಾರ್ಷಿಕ 2.25% ರಿಂದ 2.5% ವರೆಗೆ ಬಡ್ಡಿ ನೀಡಲಾಗುತ್ತಿತ್ತು ಹಾಗೂ ಅಲ್ಪಾವಧಿ ಠೇವಣಿ ಮುಕ್ತಾಯದ ನಂತರ ಚಿನ್ನ ಅಥವಾ ಆ ಸಮಯದ ರೂಪಾಯಿ ಮೌಲ್ಯವನ್ನು ವಾಪಸ್ ಪಡೆಯಲು ಅವಕಾಶವಿತ್ತು.

ಆದರೆ, ಭಾರತದಲ್ಲಿ ಅಂದಾಜು 25,000 ಟನ್ ಖಾಸಗಿ ಚಿನ್ನದ ಸಂಗ್ರಹವಿದ್ದರೂ, 2025 ರ ಮಾರ್ಚ್ ವೇಳೆಗೆ (ಅಂದರೆ ಒಂದು ದಶಕದ ನಂತರ) ಕೇವಲ 38 ಟನ್ ಚಿನ್ನ ಮಾತ್ರ ಈ ಯೋಜನೆಯಡಿ ಜಮೆಯಾಗಿತ್ತು. ಇದು ಅತ್ಯಂತ ಕಡಿಮೆ ಪ್ರಮಾಣವಾಗಿದ್ದರಿಂದ ಮಾರ್ಚ್ 2025 ರಲ್ಲಿ ಮಧ್ಯಮ ಮತ್ತು ದೀರ್ಘಾವಧಿಯ ಠೇವಣಿಗಳನ್ನು ಸರ್ಕಾರ ಸ್ಥಗಿತಗೊಳಿಸಿತು.

ಭಾವನಾತ್ಮಕ ಮೌಲ್ಯ: ಭಾರತೀಯ ಕುಟುಂಬಗಳು ತಮ್ಮ ಪಾರಂಪರಿಕ ಮತ್ತು ಪೂರ್ವಜರಿಂದ ಬಂದ ಒಡವೆಗಳನ್ನು ಕರಗಿಸಲು ಇಷ್ಟಪಡುವುದಿಲ್ಲ. ಏಕೆಂದರೆ ಹಳೆಯ ಒಡವೆಗಳ ಜೊತೆ ಕುಟುಂಬದ ನೆನಪುಗಳು, ಧಾರ್ಮಿಕ ಮೌಲ್ಯಗಳು ಮತ್ತು ಸಾಮಾಜಿಕ ಪ್ರಾಮುಖ್ಯತೆ ಅಡಗಿರುತ್ತದೆ.

ತೆರಿಗೆ ಮತ್ತು ದಾಖಲೆಗಳ ಭಯ: ಹಳೆಯ ಚಿನ್ನವನ್ನು ಬ್ಯಾಂಕಿಗೆ ತಂದರೆ ಎಲ್ಲಿ ಐಟಿ ತನಿಖೆ ಎದುರಾಗುತ್ತದೆಯೋ ಅಥವಾ ದಾಖಲೆಗಳ ಕುರಿತು ಪ್ರಶ್ನೆಗಳನ್ನು ಕೇಳುತ್ತಾರೋ ಎಂಬ ಭಯ ಸಾರ್ವಜನಿಕರಲ್ಲಿದೆ.

ಬ್ಯಾಂಕುಗಳ ನಿರಾಸಕ್ತಿ: ಬ್ಯಾಂಕುಗಳಿಗೆ ಚಿನ್ನದ ಠೇವಣಿಗಳಿಂದ ತಮ್ಮ ಬ್ಯಾಲೆನ್ಸ್ ಶೀಟ್‌ಗೆ ಅಥವಾ ವಾಣಿಜ್ಯಿಕವಾಗಿ ಯಾವುದೇ ದೊಡ್ಡ ಲಾಭ ಸಿಗುತ್ತಿರಲಿಲ್ಲ. ಹೀಗಾಗಿ ಬ್ಯಾಂಕುಗಳು ಈ ಯೋಜನೆಯನ್ನು ಜನರ ಹತ್ತಿರ ಕೊಂಡೊಯ್ಯಲು ಆಸಕ್ತಿ ತೋರಿಸಲೇ ಇಲ್ಲ ಎಂದು ಅಐಜೆಜಿಎಫ್​ ಹೇಳಿದೆ.

ವಿಶ್ಲೇಷಕರು ಮತ್ತು ಚಾಯ್ಸ್ ಬ್ರೋಕಿಂಗ್ ಸಂಸ್ಥೆಯ ತಜ್ಞ ಆಮಿರ್ ಮಕ್ಡಾ ಪ್ರಕಾರ, ಭಾರತೀಯರ ಖಾಸಗಿ ಚಿನ್ನದ ಸಂಗ್ರಹದಲ್ಲಿ ಕೇವಲ ಶೇಕಡಾ 5 ರಷ್ಟು (ಅಂದರೆ ಸುಮಾರು 1,250 ಟನ್) ಚಿನ್ನ ಈ ಹೊಸ ಯೋಜನೆಗೆ ಹರಿದುಬಂದರೂ ದೇಶದ ಒಳಗೇ ಬರೋಬ್ಬರಿ 80 ರಿಂದ 90 ಬಿಲಿಯನ್ ಡಾಲರ್ ಲಿಕ್ವಿಡಿಟಿ ಸೃಷ್ಟಿಯಾಗಲಿದೆ.

ಆಮದು ಸಂಪೂರ್ಣ ಶೂನ್ಯ: ಇದರಿಂದಾಗಿ 2 ವರ್ಷಗಳ ಕಾಲ ಭಾರತದ ಚಿನ್ನದ ಆಮದನ್ನು ಸಂಪೂರ್ಣವಾಗಿ ಶೂನ್ಯಕ್ಕಿಳಿಸಬಹುದು.

ಡಾಲರ್ ಕುಸಿತ - ರೂಪಾಯಿ ಬಲವರ್ಧನೆ: ಚಿನ್ನದ ಆಮದು ನಿಂತರೆ ಅಮೆರಿಕನ್ ಡಾಲರ್‌ಗೆ ಇರುವ ಬೇಡಿಕೆ ತೀವ್ರವಾಗಿ ಕುಸಿಯುತ್ತದೆ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಭಾರತೀಯ ರೂಪಾಯಿ ಮೌಲ್ಯ ಭಾರೀ ಪ್ರಮಾಣದಲ್ಲಿ ಜಿಗಿತ ಕಾಣಲಿದೆ.

ಒಟ್ಟಾರೆಯಾಗಿ, ಆಮದು ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದು, ಔಪಚಾರಿಕ ಚಿನ್ನದ ಆರ್ಥಿಕತೆಯನ್ನು ಬಲಪಡಿಸುವುದು ಮತ್ತು ತಿಜೋರಿಯಲ್ಲಿ ಸುಮ್ಮನೆ ಬಿದ್ದಿರುವ ಚಿನ್ನವನ್ನು ದೇಶದ ಉತ್ಪಾದನಾ ಬಂಡವಾಳ ವನ್ನಾಗಿ ಪರಿವರ್ತಿಸುವುದು ಸರ್ಕಾರದ ಅಸಲಿ ಮಾಸ್ಟರ್ ಪ್ಲಾನ್ ಆಗಿದೆ(ಏಜೆನ್ಸೀಸ್​).