ಎಲ್ಲವೂ ಪ್ಲ್ಯಾನ್​ ಪ್ರಕಾರವೇ... ಫೇಕ್​ ಆರೋಪಕ್ಕೆ ಕಡೆಗೂ ತುಟಿ ಬಿಚ್ಚಿದ 'ಗೋಲ್ಡ್​ ಮ್ಯಾನ್' | Gold Man

Gold Man: ಮೊನ್ನೆಯಷ್ಟೇ ಮುತ್ತಿನ ನಗರಿ ಹೈದರಾಬಾದ್​ನಲ್ಲಿ ಬೃಹತ್ ಚಿನ್ನಾಭರಣಗಳೊಂದಿಗೆ ಸಾಮಾಜಿಕ ಮಾಧ್ಯಮದಲ್ಲಿ ಸಖತ್​ ಸದ್ದು ಮಾಡಿದ್ದ 'ಗೋಲ್ಡ್ ಮ್ಯಾನ್' ಸೂರ್ಯ ಭಾಯಿ ಅಸಲಿ ಮುಖವಾಡ ಹೊರಬಿದ್ದಿತು. ಈ ಬಗ್ಗೆ ಸಾಕಷ್ಟು ಆರೋಪಗಳು ಕೇಳಿಬಂದಿದ್ದು, ಆತನ ಬಳಿ ಇರುವುದೆಲ್ಲವೂ ನಕಲಿ ಚಿನ್ನ ಎಂದು ಐಟಿ ಅಧಿಕಾರಿಗಳು ದೃಢಪಡಿಸಿದ್ದಾರೆ. ಇಲ್ಲಿಯವರೆಗೆ ಇದ್ಯಾವುದಕ್ಕೂ ಉತ್ತರ ಕೊಡದ ಸೂರ್ಯ, ಇದೀಗ ಕಡೆಗೂ ಫೇಕ್​ ಗೋಲ್ಡ್​ ಆರೋಪಕ್ಕೆ ಮೌನ ಮುರಿದಿದ್ದಾರೆ.  

ಅತ್ತಾಪುರ ನಗರದ ಪಲ್ಲಪು ಸುರೇಶ್ ಕುಮಾರ್ ಅಲಿಯಾಸ್ 'ಸೂರ್ಯ ಭಾಯಿ' ಧರಿಸಿರುವುದು ಸಂಪೂರ್ಣ ಫೇಕ್ ಗೋಲ್ಡ್​ ಎಂದು ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ಸ್ಪಷ್ಟಪಡಿಸಿದರು. ತನಿಖೆಯ ಸಮಯದಲ್ಲಿ ಬಯಲಾದ ಆಸಕ್ತಿದಾಯಕ ಸಂಗತಿಗಳು ಇದೀಗ ತೆಲಂಗಾಣದ ಮೂಲೆ ಮೂಲೆಯಲ್ಲೂ ಭಾರಿ ಚರ್ಚೆಗೆ ಗ್ರಾಸವಾಗಿದೆ. 

ದೆಹಲಿ ವಿಮಾನ ನಿಲ್ದಾಣದಲ್ಲಿ ತೆಲಂಗಾಣ ಹಾಕಿ ಅಸೋಸಿಯೇಷನ್ ​​ಅಧ್ಯಕ್ಷ, ಕೊಂಡ ವಿಜಯ್ ಕುಮಾರ್ (ಬಂಗಾರು ಬಾಬು) ಬಳಿ 1.4 ಕೆಜಿ ಚಿನ್ನ ಪತ್ತೆಯಾದ ಪ್ರಕರಣದ ತನಿಖೆಯ ಭಾಗವಾಗಿ ಸೂರ್ಯ ಭಾಯಿ ಹೆಸರು ಬೆಳಕಿಗೆ ಬಂದಿತು. ಸೂರ್ಯ ಅವರ ಸಾಮಾಜಿಕ ಜಾಲತಾಣ ಪೋಸ್ಟ್‌ಗಳು ಮತ್ತು ಯೂಟ್ಯೂಬ್ ಸಂದರ್ಶನಗಳನ್ನು ಸೂಕ್ಷ್ಮವಾಗಿ ಗಮನಿಸಿದ ಅಧಿಕಾರಿಗಳು, ಅವರ ಹಣಕಾಸಿನ ಮೂಲಗಳ ಬಗ್ಗೆ ವಿಚಾರಣೆ ನಡೆಸಿದ್ದಾರೆ.

ನಾನು ಕಷ್ಟಪಟ್ಟು ಕೆಲಸ ಮಾಡಿ ಮೇಲೆ ಬಂದ ವ್ಯಕ್ತಿ, ಹೀಗಾಗಿಯೇ, ಕೆಲವರು ನನ್ನನ್ನು ತುಳಿಯಲು ಪ್ರಯತ್ನಿಸುತ್ತಿದ್ದಾರೆ. ತಮಗೆ ಸಂಬಂಧವಿಲ್ಲದ ವಿಷಯಗಳನ್ನು ಪೋಸ್ಟ್ ಮಾಡುವ ಮೂಲಕ ಜನರಿಗೆ ಸೋಷಿಯಲ್ ಮೀಡಿಯಾಗಳಲ್ಲಿ ಸುಳ್ಳು ಮಾಹಿತಿಯನ್ನು ಹರಡುತ್ತಿದ್ದಾರೆ ಎಂದು ಕಳವಳ ವ್ಯಕ್ತಪಡಿಸಿದರು. ನನ್ನ ವಿರುದ್ಧ ಊಹಾಪೋಹಗಳನ್ನು ಹರಡಲು ಹಣ ಕೊಡಲಾಗುತ್ತಿದೆ ಎಂದಿದ್ದಾರೆ. 

ಪ್ರಸ್ತುತ, ಐಟಿ ಅಧಿಕಾರಿಗಳ ತನಿಖೆ ನಡೆಯುತ್ತಿದೆ. ಸತ್ಯವನ್ನು ಖಚಿತಪಡಿಸಿಕೊಳ್ಳದೆ ಕೆಲವರು ನನ್ನ ವಿರುದ್ಧ ತಪ್ಪು ಮಾಹಿತಿಯನ್ನು ಹರಡುತ್ತಿದ್ದಾರೆ. ಅಧಿಕಾರಿಗಳು ನನಗೆ ಮನೆಗೆ ಬಂದು, ಮೊಬೈಲ್​ನಲ್ಲಿನ ಡೇಟಾವನ್ನು ತೆಗೆದುಕೊಂಡು ಹೋಗಿದ್ದಾರೆ. ಐಟಿ ಅಧಿಕಾರಿಗಳು ಯಾವಾಗ ತನಿಖೆಗೆ ಕರೆಯುತ್ತಾರೋ, ಆಗ ನಾನು ಸಹಕರಿಸುತ್ತೇನೆ. ನಾನು ಸಿನಿಮಾ, ಧಾರಾವಾಹಿ, ರಿಯಲ್ ಎಸ್ಟೇಟ್ ಮತ್ತು ಸೇವಾ ಸೇರಿದಂತೆ ಮುಂತಾದ ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿದ್ದೇನೆ. ನನ್ನ ವಿರುದ್ಧ ತಪ್ಪು ಮಾಹಿತಿ ಹರಡುವವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಿದರು. 

ಐಟಿ ಅಧಿಕಾರಿಗಳ ವಿಚಾರಣೆಯ ಸಮಯದಲ್ಲಿ, ಅಷ್ಟೊಂದು ಚಿನ್ನ ಧರಿಸಿರುವುದರ ಹಿಂದಿರುವ ತನ್ನ ನಿಜವಾದ ಉದ್ದೇಶವನ್ನು ಸೂರ್ಯ ಭಾಯಿ ಬಹಿರಂಗಪಡಿಸಿದ್ದಾರೆ. ಸಿನಿಮಾಗಳಲ್ಲಿ ಅವಕಾಶಗಳನ್ನು ಪಡೆಯಲು ಮತ್ತು ರಾಜಕೀಯಕ್ಕೆ ಪ್ರವೇಶಿಸಲು ಜನಪ್ರಿಯತೆಯ ಅಗತ್ಯವಿದೆ ಎಂದು ಭಾವಿಸಿ ಹೀಗೆ ಮಾಡಿದ್ದಾಗಿ ಒಪ್ಪಿಕೊಂಡಿದ್ದಾರೆ. ಅವನು ಈಗಾಗಲೇ ಅನೇಕ ಚಿತ್ರಗಳಲ್ಲಿ ಸಣ್ಣ ಪಾತ್ರಗಳನ್ನು ಮಾಡಿದ್ದನು ಮತ್ತು ಜನರ ಗಮನ ಸೆಳೆಯಲು ಈ 'ಗೋಲ್ಡ್ ಮ್ಯಾನ್' ಅವತಾರವನ್ನು ಅಳವಡಿಸಿಕೊಂಡನು. ಸೂರ್ಯ ಭಾಯಿ ಘಟನೆಯು ಹೊಳೆಯುವುದೆಲ್ಲವೂ ಚಿನ್ನವಲ್ಲ ಎಂದು ಮತ್ತೊಮ್ಮೆ ಸಾಬೀತುಪಡಿಸಿದೆ. ಪ್ರಸ್ತುತ, ಈ ಪ್ರಕರಣದಲ್ಲಿ ಅಧಿಕಾರಿಗಳು ಇತರ ಹಣಕಾಸಿನ ವಹಿವಾಟುಗಳ ಬಗ್ಗೆ ಆಳವಾದ ತನಿಖೆಯನ್ನು ಮುಂದುವರೆಸಿದ್ದಾರೆ, (ಏಜೆನ್ಸೀಸ್​).