ನೋಡನೋಡುತ್ತಲೇ ಕುಸಿದ ಚಿನ್ನ, ಬೆಳ್ಳಿ ದರ: ಮದುವೆ ಸೀಸನ್‌ನಲ್ಲಿ ಗ್ರಾಹಕರಿಗೆ ಸಿಕ್ತು ದೊಡ್ಡ ರಿಲೀಫ್..! Gold- Silver Price

ಮಲ್ಟಿ ಕಮೋಡಿಟಿ ಎಕ್ಸ್ಚೇಂಜ್ (MCX) ನಲ್ಲಿ ಮಾರ್ಚ್ ತಿಂಗಳ ಬೆಳ್ಳಿ ಫ್ಯೂಚರ್ಸ್ ಒಪ್ಪಂದವು ಶೇ. 1.49 ರಷ್ಟು ಕುಸಿದು ಪ್ರತಿ ಕೆಜಿಗೆ 2,40,730 ರೂಪಾಯಿಗಳಿಗೆ ತಲುಪಿದೆ. ಜಾಗತಿಕ ಮಾರುಕಟ್ಟೆಯಲ್ಲಿನ ದುರ್ಬಲ ಸೂಚನೆಗಳು ಮತ್ತು ದೇಶೀಯ ಮಾರುಕಟ್ಟೆಯಲ್ಲಿನ ಕಡಿಮೆ ಬೇಡಿಕೆಯಿಂದಾಗಿ ಬೆಳ್ಳಿ ದರವು ಪಾತಾಳಕ್ಕೆ ಮುಖ ಮಾಡಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ, ನ್ಯೂಯಾರ್ಕ್‌ನ ಕಾಮೆಕ್ಸ್‌ನಲ್ಲಿ ಬೆಳ್ಳಿ ಬೆಲೆಯು ಪ್ರತಿ ಔನ್ಸ್‌ಗೆ 76.83 ಡಾಲರ್‌ಗಳಿಗೆ ಕುಸಿದಿದೆ. ಈ ಕುಸಿತದಿಂದಾಗಿ ಸಿಲ್ವರ್ ಇಟಿಎಫ್‌ಗಳಲ್ಲಿ (ETF) ಹಣ ಹೂಡಿಕೆ ಮಾಡಿದವರು ಕಂಗಾಲಾಗಿದ್ದಾರೆ.

ಚಿನ್ನದ ಬೆಲೆಯೂ ಸಹ ಇಂದು ಸ್ಥಿರವಾಗಿಲ್ಲ. ದೆಹಲಿ ಮತ್ತು ಬೆಂಗಳೂರಿನಂತಹ ನಗರಗಳಲ್ಲಿ 24 ಕ್ಯಾರೆಟ್ ಚಿನ್ನದ ಬೆಲೆ 10 ಗ್ರಾಂಗೆ ಸುಮಾರು 1,310 ರೂಪಾಯಿಗಳಷ್ಟು ಇಳಿಕೆಯಾಗಿದೆ. ಪ್ರಸ್ತುತ ಬೆಂಗಳೂರಿನಲ್ಲಿ 10 ಗ್ರಾಂ ಅಪರಂಜಿ ಚಿನ್ನದ ಬೆಲೆ ಸುಮಾರು 1,56,440 ರೂಪಾಯಿ ಆಸುಪಾಸಿನಲ್ಲಿದೆ.

ಮಾರುಕಟ್ಟೆ ತಜ್ಞರ ಪ್ರಕಾರ, ಈ ದಿಢೀರ್ ಕುಸಿತಕ್ಕೆ ಮೂರು ಪ್ರಮುಖ ಕಾರಣಗಳಿವೆ.

ಬಲಿಷ್ಠಗೊಂಡ ಅಮೆರಿಕನ್ ಡಾಲರ್: ಜಾಗತಿಕವಾಗಿ ಡಾಲರ್ ಮೌಲ್ಯವು ಏರಿಕೆಯಾಗಿರುವುದು ಲೋಹಗಳ ಬೆಲೆ ತಗ್ಗಲು ಕಾರಣವಾಗಿದೆ.

ಯುಎಸ್ ಫೆಡ್ ನೀತಿ: ಅಮೆರಿಕದ ಫೆಡರಲ್ ರಿಸರ್ವ್‌ನ ಬಡ್ಡಿ ದರ ನಿರ್ಧಾರಗಳ ಕುರಿತಾದ ಅನಿಶ್ಚಿತತೆಯು ಹೂಡಿಕೆದಾರರನ್ನು ಚಿನ್ನ-ಬೆಳ್ಳಿಯಿಂದ ದೂರ ಮಾಡಿದೆ.

ಲಾಭದ ಬುಕಿಂಗ್: ಬೆಲೆಗಳು ಗರಿಷ್ಠ ಮಟ್ಟದಲ್ಲಿದ್ದಾಗ ಹೂಡಿಕೆದಾರರು ತಮ್ಮ ಲಾಭವನ್ನು ಪಡೆದುಕೊಳ್ಳಲು ದೊಡ್ಡ ಮಟ್ಟದಲ್ಲಿ ಮಾರಾಟಕ್ಕೆ ಮುಂದಾಗುತ್ತಿರುವುದು ದರ ಕುಸಿತಕ್ಕೆ ಕಾರಣವಾಗಿದೆ.

ಸದ್ಯ ಮಾರುಕಟ್ಟೆಯು ಅತ್ಯಂತ ಅಸ್ಥಿರವಾಗಿದ್ದು, ಕಾದು ನೋಡುವುದು ಸೂಕ್ತ ಎಂದು ವಿಶ್ಲೇಷಕರು ತಿಳಿಸಿದ್ದಾರೆ. ದೀರ್ಘಕಾಲದ ಹೂಡಿಕೆದಾರರಿಗೆ ಬೆಲೆ ಇಳಿಕೆಯು ಖರೀದಿಗೆ ಉತ್ತಮ ಅವಕಾಶವಾಗಿದ್ದರೂ, ಸಣ್ಣ ಹೂಡಿಕೆದಾರರು ಮಾರುಕಟ್ಟೆ ಸ್ಥಿರವಾಗುವವರೆಗೆ ಕಾಯುವುದು ಕ್ಷೇಮವಾಗಿದೆ,(ಏಜೆನ್ಸೀಸ್).