ಉಗ್ರ ಮಸೂದ್ ಅಜರ್ ಮೇಲೆ ಪಾಕ್ ಇನಾಮು ಘೋಷಣೆ: ಇಂತಹ ನಾಟಕಗಳನ್ನು ನಾವು ತುಂಬಾ ನೋಡಿದ್ದೀವಿ ಎಂದ ಭಾರತ! | MEA India

ಸುದ್ದಿಗೋಷ್ಠಿಯಲ್ಲಿ ಈ ಬಗ್ಗೆ ಕೇಳಲಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಭಾರತೀಯ ವಿದೇಶಾಂಗ ಸಚಿವಾಲಯದ (MEA) ವಕ್ತಾರ ರಂಧೀರ್ ಜೈಸ್ವಾಲ್, ಪಾಕಿಸ್ತಾನದ ಈ ಇನಾಮು ಘೋಷಣೆಯು ಜನರನ್ನು ಹಾದಿತಪ್ಪಿಸುವ ಪ್ರಯತ್ನ ಎಂದು ಕರೆದಿದ್ದಾರೆ. ಅಲ್ಲದೆ, ಭಯೋತ್ಪಾದನೆಯನ್ನು ಪೋಷಿಸುವ ಪಾಕಿಸ್ತಾನದಂತಹ ದೇಶದಿಂದ ಬರುವ ಇಂತಹ ಘೋಷಣೆಗಳು ಕೇವಲ ನಾಟಕ ಎಂಬುದು ಎಲ್ಲರಿಗೂ ತಿಳಿದಿದೆ ಎಂದರು.

ಜನರ ಕಣ್ಣಿಗೆ ಮಣ್ಣೆರಚುವ ಪಾಕಿಸ್ತಾನದ ಇಂತಹ ನಾಟಕಗಳು ಹೊಸದೇನಲ್ಲ, ಹಿಂದೆ ಕೂಡ ಇಂತಹ ಗಿಮಿಕ್‌ಗಳನ್ನು ನಾವು ನೋಡಿದ್ದೇವೆ. ಕೇವಲ ಹೆಸರಿಗಷ್ಟೇ ಸೀಮಿತವಾಗಿರುವ ಮತ್ತು ಯಾವುದೇ ಪರಿಣಾಮ ಬೀರದ ಇಂತಹ ಪ್ರಕಟಣೆಗಳನ್ನು ಬಿಟ್ಟು ಪಾಕಿಸ್ತಾನ ಪ್ರತ್ಯಕ್ಷ ಹಾಗೂ ಕಠಿಣ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಜೈಸ್ವಾಲ್ ಆಗ್ರಹಿಸಿದ್ದಾರೆ.

ಪಾಕಿಸ್ತಾನದ ಫೆಡರಲ್ ಇನ್ವೆಸ್ಟಿಗೇಷನ್ ಏಜೆನ್ಸಿ (FIA) ತನ್ನ ರೆಡ್ ಬುಕ್ ಅತ್ಯಂತ ಅಪೇಕ್ಷಿತ ಉಗ್ರರ ಪಟ್ಟಿಯಲ್ಲಿ ಮಸೂದ್ ಅಜರ್ ಹೆಸರನ್ನು ಕಾಯ್ದುಕೊಂಡು, ಆತನ ಸುಳಿವು ನೀಡಿದವರಿಗೆ 70 ಲಕ್ಷ ಇನಾಮು ನೀಡುವುದಾಗಿ ಸೋಮವಾರ ಘೋಷಿಸಿತ್ತು. 2001 ರ ಸಂಸತ್ ಮೇಲಿನ ದಾಳಿ ಸೇರಿದಂತೆ ಭಾರತದಲ್ಲಿ ನಡೆದ ಹಲವು ಪ್ರಮುಖ ಭಯೋತ್ಪಾದಕ ದಾಳಿಗಳಲ್ಲಿ ಮಸೂದ್ ಅಜರ್ ಭಾಗಿಯಾಗಿದ್ದು, ಭಾರತ ಆತನನ್ನು ಹಸ್ತಾಂತರಿಸುವಂತೆ ದೀರ್ಘಕಾಲದಿಂದ ಕೋರುತ್ತಿದೆ. 2008 ರ ಮುಂಬೈ ದಾಳಿ (26/11), 2016 ರ ಪಠಾಣ್‌ಕೋಟ್ ವಾಯುಪಡೆ ನೆಲೆಯ ಮೇಲಿನ ದಾಳಿ ಹಾಗೂ 2019 ರ ಪುಲ್ವಾಮಾ ದಾಳಿಗಳ ಹಿಂದೆ ಜೈಶ್-ಎ-ಮೊಹಮ್ಮದ್ ಕೈವಾಡವಿರುವುದನ್ನು ಭಾರತೀಯ ತನಿಖಾ ಸಂಸ್ಥೆಗಳು ಸಾಬೀತುಪಡಿಸಿವೆ.

ಮುಂಬರುವ ಅಕ್ಟೋಬರ್ 26 ರಿಂದ 30 ರವರೆಗೆ ಪ್ಯಾರಿಸ್‌ನಲ್ಲಿ ನಡೆಯಲಿರುವ ಫೈನಾನ್ಷಿಯಲ್ ಆಕ್ಷನ್ ಟಾಸ್ಕ್ ಫೋರ್ಸ್ ಶೃಂಗಸಭೆಯ ಮುನ್ನಾದಿನದಂದು ಪಾಕಿಸ್ತಾನ ಈ ನಿರ್ಧಾರ ಕೈಗೊಂಡಿದ್ದು, ಹಣಕಾಸು ಅಕ್ರಮ ವರ್ಗಾವಣೆ ಹಾಗೂ ಭಯೋತ್ಪಾದಕರಿಗೆ ಧನಸಹಾಯ ತಡೆಯುವಲ್ಲಿ ವಿಫಲವಾದ ದೇಶಗಳ ಮೇಲೆ ಎಫ್‌ಎಟಿಎಫ್ ನಿಗಾ ವಹಿಸುತ್ತದೆ. ಪಾಕಿಸ್ತಾನವು 2018 ರಿಂದ 2022 ರವರೆಗೆ ಎಫ್‌ಎಟಿಎಫ್‌ನ ಗ್ರೇ ಲಿಸ್ಟ್​​ನಲ್ಲಿದ್ದು, ಮತ್ತೆ ಆ ಪಟ್ಟಿಗೆ ಸೇರದಂತೆ ತಡೆಯಲು ಈ ರೀತಿಯ ಬೂಟಾಟಿಕೆಯ ಇನಾಮು ಘೋಷಣೆ ಮಾಡುತ್ತಿದೆ ಎಂಬುದು ಭಾರತದ ವಾದವಾಗಿದೆ.

ಇದಲ್ಲದೆ, 26/11 ರ ಮುಂಬೈ ದಾಳಿಗೆ ಸಂಬಂಧಿಸಿದ 17 ಉಗ್ರರು ಕಳೆದ 18 ವರ್ಷಗಳಿಂದ ತಲೆಮರೆಸಿಕೊಂಡಿದ್ದಾರೆ ಎಂದು ಎಫ್‌ಐಎ ಹೇಳಿದ್ದರೂ, ಅವರೆಲ್ಲರೂ ಪಾಕಿಸ್ತಾನದಲ್ಲೇ ಸುಖವಾಗಿದ್ದಾರೆ ಮತ್ತು ಅಂತಾರಾಷ್ಟ್ರೀಯ ಸಮುದಾಯದ ಗಮನವನ್ನು ಬೇರೆಡೆಗೆ ಸೆಳೆಯಲು ಪಾಕಿಸ್ತಾನ ಈ ಪಟ್ಟಿಯನ್ನು ಬಳಸಿಕೊಳ್ಳುತ್ತಿದೆ ಎಂದು ಭಾರತದ ಗುಪ್ತಚರ ಮೂಲಗಳು ತಿಳಿಸಿವೆ. ಕಳೆದ ಐದು ವರ್ಷಗಳಲ್ಲಿ ಪಾಕಿಸ್ತಾನದ ಎಫ್‌ಐಎ ಅತ್ಯಂತ ಅಪೇಕ್ಷಿತ ಉಗ್ರರ ಪಟ್ಟಿಯು ಶೇ. 35 ರಷ್ಟು ಹೆಚ್ಚಾಗಿದ್ದು, 2021 ರಲ್ಲಿದ್ದ 1,330 ರಿಂದ ಈಗ 1,804 ಕ್ಕೆ ಏರಿಕೆಯಾಗಿದೆ(ಏಜೆನ್ಸೀಸ್​).