ದೇಶ

ಇಂದು ಆನ್‌ಲೈನ್ ಡೆಲಿವರಿ ಬಂದ್? ಇಂಧನ ದರ ಏರಿಕೆ ಖಂಡಿಸಿ ಸ್ವಿಗ್ಗಿ, ಜೊಮಾಟೊ, ಬ್ಲಿಂಕಿಟ್ ಕಾರ್ಮಿಕರ ಮುಷ್ಕರ! Gig Workers Strike

Gig Workers Strike (ಚಿತ್ರ X)
Gig Workers Strike (ಚಿತ್ರ X)
Published on: 

ಪ್ರಮುಖ ಮುಖ್ಯಾಂಶಗಳು

  • ನಿರಂತರವಾಗಿ ಹೆಚ್ಚಾಗುತ್ತಿರುವ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳ ವಿರುದ್ಧ ಗಿಗ್ ಕಾರ್ಮೀಕರು ಆಕ್ರೋಶ
  • ಇಂದು ಮಧ್ಯಾಹ್ನ 12 ರಿಂದ ಸಂಜೆ 5 ಗಂಟೆಯವರೆಗೆ ಬೃಹತ್​ ಮುಷ್ಕರಕ್ಕೆ ಕರೆ ನೀಡಿದ ಕಾರ್ಮಿಕರು
  • ದೇಶಾದ್ಯಂತ ಇಂಧನ ಬೆಲೆಗಳು ಲೀಟರ್‌ಗೆ ಸುಮಾರು 3 ರೂ.ಗಳಷ್ಟು ಏರಿಕೆಯಾದ ನಂತರ ಈ ನಿರ್ಧಾರ
  • ಇಂಧನ ಬೆಲೆಯಲ್ಲಾಗಿರುವ ಹೆಚ್ಚಳವು ಅವರನ್ನು ಆರ್ಥಿಕ ಒತ್ತಡಕ್ಕೆ ತಳ್ಳುತ್ತಿದೆ ಎಂದು ಒಕ್ಕೂಟ ತಿಳಿಸಿದೆ
Gig Workers Strike: ನಿರಂತರವಾಗಿ ಹೆಚ್ಚಾಗುತ್ತಿರುವ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳ ವಿರುದ್ಧ ಗಿಗ್ ಮತ್ತು ಪ್ಲಾಟ್‌ಫಾರ್ಮ್ ಸೇವಾ ಕಾರ್ಮಿಕರ ಸಂಘವು (GIPSWU) ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದು, ಶನಿವಾರ (ಇಂದು) ಮಧ್ಯಾಹ್ನ 12 ರಿಂದ ಸಂಜೆ 5 ಗಂಟೆಯವರೆಗೆ ಬೃಹತ್​ ಮುಷ್ಕರಕ್ಕೆ ಕರೆ ನೀಡಿದ್ದು, ಅಪ್ಲಿಕೇಶನ್​​ಗಳನ್ನು ಆಫ್​ಲೈನ್​ನಲ್ಲಿ ಇಡುವುದಾಗಿ ಸಂಘಟನೆ ತಿಳಿಸಿದೆ. 

ಸ್ವಿಗ್ಗಿ, ಜೊಮಾಟೊ, ಬ್ಲಿಂಕಿಟ್, ಜೆಪ್ಟೋ ಕಾರ್ಮಿಕರ ಬೇಡಿಕೆ

ದೇಶಾದ್ಯಂತ ಇಂಧನ ಬೆಲೆಗಳು ಲೀಟರ್‌ಗೆ ಸುಮಾರು 3 ರೂ.ಗಳಷ್ಟು ಏರಿಕೆಯಾದ ನಂತರ, GIPSWU ಶುಕ್ರವಾರ ಸರ್ಕಾರ ಮತ್ತು ಪ್ರಮುಖ ಡಿಜಿಟಲ್ ಪ್ಲಾಟ್‌ಫಾರ್ಮ್‌ಗಳಿಂದ ಪ್ರತಿ ಕಿಲೋಮೀಟರ್ ಸೇವಾ ದರಗಳನ್ನು ತಕ್ಷಣ ಹೆಚ್ಚಿಸಬೇಕೆಂದು ಒತ್ತಾಯಿಸಿದೆ. ಇದಲ್ಲದೇ ಇಂಧನ ಬೆಲೆಯಲ್ಲಾಗಿರುವ ಹೆಚ್ಚಳವು ಅವರನ್ನು ಆರ್ಥಿಕ ಒತ್ತಡಕ್ಕೆ ತಳ್ಳುತ್ತಿದೆ ಎಂದು ಒಕ್ಕೂಟ ತಿಳಿಸಿದೆ. 
ಪ್ರಸ್ತುತ ಪರಿಸ್ಥಿತಿಯಲ್ಲಿ ವಿತರಣಾ ಸಿಬ್ಬಂದಿ ರಸ್ತೆಯ ಮೇಲೆ ವಾಹನ ಚಾಲನೆಗಾಗಿ ಮತ್ತು ಇಂಧನಕ್ಕಾಗಿ ಅತಿ ಹೆಚ್ಚು ಖರ್ಚು ಮಾಡಬೇಕಾಗುತ್ತಿದೆ. ಆದರೆ, ಇಡೀ ದಿನದ ಕಠಿಣ ಪರಿಶ್ರಮದ ಕೊನೆಯಲ್ಲಿ ಅವರು ಮನೆಗೆ ತಗೆದುಕೊಂಡು ಹೋಗುವ ನಿವ್ವಳ ಆದಾಯ ಮಾತ್ರ ತೀರಾ ಕಡಿಮೆಯಾಗುತ್ತಿದೆ ಎಂದು ತಿಳಿಸಿದ್ದಾರೆ. 
ಆದಾಗ್ಯೂ, ಇಂಧನ ಬೆಲೆ ಏರಿಕೆಯು ತಮ್ಮ ದೈನಂದಿನ ಆದಾಯಕ್ಕಾಗಿ ಮೋಟಾರ್ ಸೈಕಲ್ ಮತ್ತು ಸ್ಕೂಟರ್‌ಗಳನ್ನು ಅವಲಂಬಿಸಿರುವ 1.2 ಕೋಟಿ ಗಿಗ್​ ಕಾರ್ಮಿಕರ ಮೇಲೆ ತೀವ್ರ ಪರಿಣಾಮ ಬೀರಲಿದೆ. ಈಗಾಗಲೇ ದೆಹಲಿಯಲ್ಲಿ ಲೀಟರ್​ಗೆ ಸುಮಾರು  97.77 ರೂ.ಗಳಾಗಿದ್ದರೆ, ಡೀಸೆಲ್ ಬೆಲೆ ಲೀಟರ್‌ಗೆ 90.67 ರೂ.ಗಳಷ್ಟಿದೆ. ಇದು ಅಂತರಾಷ್ಟ್ರೀಯ ಕಚ್ಚಾ ತೈಲ ಬೆಲೆ ಏರುತ್ತಿರುವುದು ಮತ್ತು ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಉದ್ವಿಗ್ನತೆಯ ಮಧ್ಯೆ ಈ ಹೆಚ್ಚಳ ಕಂಡುಬಂದಿರುವುದು ಸಧ್ಯ ಆತಂಕಕ್ಕೆ ಕಾರಣವಾಗಿದೆ. 

ಇಂಧನ ಹೆಚ್ಚಳ ಗಿಗ್ ಕಾರ್ಮಿಕರಿಗೆ ನೇರ ಹೊಡೆತ

GIPSWU ಅಧ್ಯಕ್ಷೆ ಸೀಮಾ ಸಿಂಗ್ ಇಂಧನ ಬೆಲೆ ಏರಿಕೆಯನ್ನು ಹಣದುಬ್ಬರ ಮತ್ತು ಬೇಸಿಗೆಯ ತೀವ್ರ ಶಾಖದಿಂದ ಈಗಾಗಲೇ ಹೋರಾಡುತ್ತಿರುವ ಕಾರ್ಮಿಕರಿಗೆ "ನೇರ ಹೊಡೆತ" ಎಂದು ಬಣ್ಣಿಸಿದ್ದಾರೆ.
ಹೆಚ್ಚುತ್ತಿರುವ ಇಂಧನ ಮತ್ತು ನಿರ್ವಹಣಾ ವೆಚ್ಚಗಳಿಗೆ ಅನುಗುಣವಾಗಿ ಅವರ ಗಳಿಕೆ ಹೆಚ್ಚಾಗದಿದ್ದರೆ ಅನೇಕ ಕಾರ್ಮಿಕರು ಈ ಕೆಲಸವನ್ನು ಬಿಡಬೇಕಾಗುತ್ತದೆ. ಆದಾಗ್ಯೂ, ಹವಾಮಾನ ಪರಿಸ್ಥಿತಿಗಳು ಮತ್ತು ಭಾರೀ ಸಂಚಾರದಲ್ಲಿ ಅನೇಕರು ಪ್ರತಿದಿನ 10-14 ತಾಸು ಕೆಲಸ ಮಾಡುವುದರಿಂದ ಮಹಿಳಾ ಕೆಲಸಗಾರರು ಮತ್ತು ಸಿಬ್ಬಂದಿ ಚಾಲಕರ ಮೇಲೆ ಪರಿಣಾಮ ಬೀರುತ್ತದೆ ಎಂದು ತಿಳಿಸಿದ್ದಾರೆ.
ಇದಲ್ಲದೆ, ಪರಿಷ್ಕೃತ ವಿತರಣಾ ದರಗಳು ಮತ್ತು ಇಂಧನ ಪರಿಹಾರವನ್ನು ಒತ್ತಾಯಿಸಿ ಸರ್ಕಾರ ಮತ್ತು ಪ್ರಮುಖ ಡಿಜಿಟಲ್ ಪ್ಲಾಟ್‌ಫಾರ್ಮ್‌ಗಳಿಗೆ ಜ್ಞಾಪಕ ಪತ್ರಗಳನ್ನು ಸಲ್ಲಿಸಲಾಗಿದೆ. ಆದಾಗ್ಯೂ, ಸಾರ್ವಜನಿಕರಿಗೆ ಅನಾನುಕೂಲ ಮಾಡುವುದು ತಮ್ಮ ಉದ್ದೇಶವಲ್ಲ, ಬದಲಿಗೆ ದೇಶಾದ್ಯಂತ ಗಿಗ್ ಮತ್ತು ಪ್ಲಾಟ್‌ಫಾರ್ಮ್ ಕಾರ್ಮಿಕರು ದಿನನಿತ್ಯ ಎದುರಿಸುತ್ತಿರುವ ತೀವ್ರತರವಾದ 'ಜೀವನೋಪಾಯದ ಬಿಕ್ಕಟ್ಟಿನತ್ತ' ಸರ್ಕಾರ ಮತ್ತು ಸಾರ್ವಜನಿಕರ ಗಮನ ಸೆಳೆಯುವುದು ಈ ಬಂದ್‌ನ ಮುಖ್ಯ ಗುರಿಯಾಗಿದೆ ಎಂದು ಸಂಘಟನೆ ಸ್ಪಷ್ಟಪಡಿಸಿದೆ (ಏಜೆನ್ಸೀಸ್​). 
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net