ಗಾಜಿಯಾಬಾದ್‌ನಲ್ಲಿ ಭೀಕರ ಅಗ್ನಿ ಅವಘಡ: ಏಳು ಮಹಡಿಗಳಿಗೆ ಆವರಿಸಿದ ಬೆಂಕಿ; ಅಗ್ನಿಶಾಮಕದವರಿಂದ ಮುಂದುವರೆದ ಕಾರ್ಯಾಚರಣೆ! Ghaziabad Fire Accident

ಗಾಜಿಯಾಬಾದ್​: ಇಂದು (ಏ.29) ಬೆಳಿಗ್ಗೆ ಉತ್ತರ ಪ್ರದೇಶದ ಗಾಜಿಯಾಬಾದ್​ (Ghaziabad Fire Accident) ನಲ್ಲಿರುವ ಗೌರ್ ಗ್ರೀನ್ ಸೊಸೈಟಿಯ ಡಿ ಟವರ್ ಎಂಬ ಕಟ್ಟಡದಲ್ಲಿ ಭಾರಿ ಅಗ್ನಿ ಅವಘಡ ಸಂಭವಿಸಿದೆ ಎಂದು ವರದಿಯಾಗಿದೆ. ಕಟ್ಟಡದ ಹಲವಾರು ಮಹಡಿಗಳಿಗೆ ಬೆಂಕಿ ಹರಡಿದ್ದು, ಸ್ಥಳಕ್ಕೆ ಅಗ್ನಿಶಾಮಕ ದಳದವರು ಆಗಮಿಸಿದ್ದಾರೆ.

ಮಾಹಿತಿ ಪ್ರಕಾರ, ಇಂದು ಬೆಳಿಗ್ಗೆ ಸುಮಾರು 8.30 ಕ್ಕೆ ಈ ಘಟನೆ ಸಂಭವಿಸಿದ್ದು, ಕಟ್ಟಡದ ಸುಮಾರು ಏಳು ಮಹಡಿಗಳವರೆಗೆ ಬೆಂಕಿ ಆವರಿಸಿಕೊಂಡಿದೆ. ಸ್ಥಳಕ್ಕೆ ಅಗ್ನಿಶಾಮಕ ಸಿಬ್ಬಂದಿಗಳು ಆಗಮಿಸಿದ್ದು ಕಳೆದ 2.5 ಗಂಟೆಗಳಿಂದ ಬೆಂಕಿ ನಂದಿಸುವ ಕಾರ್ಯಾಚರಣೆ ನಡೆಯುತ್ತಿದೆ.

ಮಾಧ್ಯಮದವರೊಂದಿಗೆ ಮಾತನಾಡಿದ ಗಾಜಿಯಾಬಾದಿನ ಅಗ್ನಿಶಾಮಕ ಮುಖ್ಯಸ್ಥ ರಾಹುಲ್​ ಪಾಲ್​, ಈ ಅಪಾರ್ಟ್​ಮೆಂಟ್​ಗೆ ಕೇವಲ ಒಂದೇ ವಾಹನ ಪ್ರವೇಶ ಮಾಡಲು ಸಾಧ್ಯವಿರುವ ಕಾರಣ ಅಗ್ನಿಶಾಮಕ ದಳದ ಕೆಲವೇ ವಾಹನಗಳು ಕೆಲಸದಲ್ಲಿ ನಿರತವಾಗಿದೆ. ಆದ್ದರಿಂದ ತ್ವರಿತವಾಗಿ ಬೆಂಕಿ ನಂದಿಸುವ ಕಾರ್ಯ ಸಾಗುತ್ತಿಲ್ಲ ಎನ್ನುವುದು ಅಧಿಕಾರಿಗಳ ಅಭಿಪ್ರಾಯವಾಗಿದೆ. ಆದರೂ ಸಹ 17 ಅಗ್ನಿಶಾಮಕ ವಾಹನಗಳು ಕೆಲಸ ಮಾಡುತ್ತಿವೆ ಎಂದು ಅವರು ತಿಳಿಸಿದ್ದಾರೆ. 

ಈ ಘಟನೆ ಬಗ್ಗೆ ಮಾಹಿತಿ ಪಡೆದುಕೊಂಡಿರುವ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​, ಆದಷ್ಟು ಬೇಗ ಪರಿಸ್ಥಿತಿಯನ್ನು ಹತೋಟಿಗೆ ತನ್ನಿ ಹಾಗೂ ಯಾವುದೇ ರೀತಿಯ ಸಾವು-ನೋವಾಗದಂತೆ ನೋಡಿಕೊಳ್ಳಿ ಎಂದು ಅಧಿಕಾರಿಗಳಿಗೆ ಆದೇಶಿಸಿದ್ದಾರೆ ಎಂದು ತಿಳಿದು ಬಂದಿದೆ, (ಏಜನ್ಸೀಸ್​).