ದೇಶದ ಜಿಡಿಪಿ ಬೆಳವಣಿಗೆ ಶೇ. 6.4; ಬೆಳ್ಳಿ ಬೆಲೆಯಲ್ಲಿ ಶೇ.6ರಷ್ಟು ಏರಿಕೆ

• ಮೂಡೀಸ್ ಭವಿಷ್ಯ
• ಜಿ20 ದೇಶಗಳಲ್ಲಿ ಅತ್ಯಧಿಕ ವೇಗದ ಆರ್ಥಿಕ ವೃದ್ಧಿ

ನವದೆಹಲಿ: ಭಾರತದ ನಿವ್ವಳ ದೇಶೀಯ ಆದಾಯ (ಜಿಡಿಪಿ) 2026-27ರಲ್ಲಿ ಶೇ. 6.4ರಷ್ಟು ಬೆಳೆಯಲಿದೆ ಎಂದು ಮೂಡೀಸ್ ರೇಟಿಂಗ್ಸ್ ಸಂಸ್ಥೆ ಭವಿಷ್ಯ ನುಡಿದಿದೆ. ಇದು ಜಿ20 ದೇಶಗಳಲ್ಲಿ ಅತ್ಯಧಿಕ ವೇಗದ ಬೆಳವಣಿಗೆಯಾಗಿದೆ. ದೇಶೀಯ ಬಳಕೆ, ನೀತಿ ಕ್ರಮಗಳು ಮತ್ತು ಸ್ಥಿರವಾದ ಬ್ಯಾಂಕಿಂಗ್ ವ್ಯವಸ್ಥೆ ಇದಕ್ಕೆ ಪ್ರೇರಕ ಎಂದು ಮೂಡೀಸ್ ತಿಳಿಸಿದೆ.

2025ರ ಸೆಪ್ಟೆಂಬರ್​ನಲ್ಲಿ ಮಾಡಿದ ಜಿಎಸ್​ಟಿ ಸರಳೀಕರಣ ಮತ್ತು ವೈಯಕ್ತಿಕ ಆದಾಯ ತೆರಿಗೆ ಮಿತಿ ಹೆಚ್ಚಳ ಗ್ರಾಹಕರಿಗೆ ಸಾಮರ್ಥ್ಯ ಸುಧಾರಿಸಿಕೊಳ್ಳಲು ಸಹಾಯ ಮಾಡುತ್ತಿದೆ. ಬ್ಯಾಂಕುಗಳ ಆರ್ಥಿಕ ಗುಣಮಟ್ಟವೂ ಉತ್ತಮ ಸ್ಥಿತಿಯಲ್ಲಿ ಉಳಿಯಲಿದೆ ಎಂದು ಮೂಡೀಸ್ ವರದಿ ತಿಳಿಸಿದೆ.

ಚಿನ್ನ 10 ಗ್ರಾಂಗೆ 1.58 ಲಕ್ಷ ರೂ.

ದೃಢವಾದ ಜಾಗತಿಕ ಪ್ರವೃತ್ತಿಗಳು ಮತ್ತು ದುರ್ಬಲ ಅಮೆರಿಕನ್ ಡಾಲರ್​ನಿಂದಾಗಿ ಸೋಮವಾರ ರಾಷ್ಟ್ರ ರಾಜಧಾನಿಯಲ್ಲಿ ಬೆಳ್ಳಿ ಬೆಲೆ ಶೇ. 6ಕ್ಕಿಂತ ಹೆಚ್ಚು ಏರಿಕೆಯಾಗಿ ಪ್ರತಿ ಕೆಜಿ 2.72 ಲಕ್ಷ ರೂ.ಗೆ ತಲುಪಿತು. 

ಚಿನ್ನ ಸುಮಾರು ಶೇ. 1ರಷ್ಟು ಏರಿಕೆಯೊಂದಿಗೆ 10 ಗ್ರಾಂಗೆ 1.58 ಲಕ್ಷ ರೂ.ಗೆ ಏರಿತು. ಬೆಳ್ಳಿ ಬೆಲೆ 17,000 ರೂ. ಅಥವಾ ಶೇ. 6.66ರಷ್ಟು ಏರಿಕೆಯಾಗಿ 2,72,000 ರೂ. ಪ್ರತಿ ಕೆಜಿಗೆ (ಎಲ್ಲಾ ತೆರಿಗೆಗಳನ್ನು ಒಳಗೊಂಡಂತೆ) ತಲುಪಿತು. ಶುಕ್ರವಾರ ಅದು 2,55,000 ರೂ. ಇತ್ತು. ಇದಲ್ಲದೆ, ಶೇ. 99.9 ಶುದ್ಧತೆಯ ಚಿನ್ನ 1,300 ರೂ. ಅಥವಾ ಶೇ. 0.83ರಷ್ಟು ಹೆಚ್ಚಿ 10 ಗ್ರಾಂಗೆ 1,58,500 ರೂಗೆ ತಲುಪಿತು.