ದೇಶ

ಪ್ರಧಾನಿ ಮೋದಿ ಈ ದೇಶದ ರಾಜ, ಅವರ ದೊಡ್ಡತನದಿಂದ ಮಗಳಿಗೆ ಮರುಜನ್ಮ!...ಆಕೆಯನ್ನು ದತ್ತು ಪಡೆದು ಭವಿಷ್ಯ ಬೆಳಗಿ ಎಂದು ತಾಯಿ ಭಾವುಕ | Ruchika Singh Mother

Ruchika Singh Mother > ಪ್ರಧಾನಿ ಮೋದಿ ಈ ದೇಶದ ರಾಜ, ಅವರ ದೊಡ್ಡತನದಿಂದ ಮಗಳಿಗೆ ಮರುಜನ್ಮ ಎಂದ ಬಾಲಕಿಯ ತಾಯಿ
Ruchika Singh Mother > ಪ್ರಧಾನಿ ಮೋದಿ ಈ ದೇಶದ ರಾಜ, ಅವರ ದೊಡ್ಡತನದಿಂದ ಮಗಳಿಗೆ ಮರುಜನ್ಮ ಎಂದ ಬಾಲಕಿಯ ತಾಯಿ
Published on: 

ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಹೇಳಿಕೆ ನೀಡಿದ್ದ ಬಾಲಕಿಯ ತಾಯಿ (Ruchika Singh Mother), ಪ್ರಧಾನಿಯವರ ಕ್ಷಮಾಪಣೆಯ ನಿರ್ಧಾರದಿಂದಾಗಿ ತಮ್ಮ ಮಗಳಿಗೆ ಇಂದು ಹೊಸ ಜೀವನ ಸಿಕ್ಕಿದೆ ಎಂದಿದ್ದಾರೆ. ಪಿಟಿಐ ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿದ ಅವರು, ಪ್ರತೀಕಾರದ ಬದಲಿಗೆ ಕ್ಷಮೆಯನ್ನು ಆರಿಸಿಕೊಂಡಿದ್ದಕ್ಕಾಗಿ ಪ್ರಧಾನಿ ಮೋದಿಯವರಿಗೆ ಕೈಮುಗಿದು ಕೃತಜ್ಞತೆ ಸಲ್ಲಿಸಿದ್ದು, ಇದನ್ನು ಮಗಳಿಗೆ ಸಿಕ್ಕ ಎರಡನೇ ಅವಕಾಶ ಎಂದು ಬಣ್ಣಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಈ ದೇಶದ ರಾಜ ಇದ್ದಂತೆ, ಅವರ ಮುಂದೆ ನಾವೇನೂ ಅಲ್ಲ. ತಮ್ಮನ್ನು ಅತ್ಯಂತ ಕೆಟ್ಟದಾಗಿ ನಿಂದಿಸಿದ್ದ ಮಗಳನ್ನು ಕ್ಷಮಿಸುವ ಮೂಲಕ ಅವರು ತಮ್ಮ ದೊಡ್ಡತನ ಮೆರೆದಿದ್ದಾರೆ. ನಾನು ಕೈಮುಗಿದು ಧನ್ಯವಾದ ಅರ್ಪಿಸುತ್ತೇನೆ. ಇಂದು ನನ್ನ ಮಗಳ ಜನ್ಮದಿನ. ಆಕೆಗೆ ಸಿಕ್ಕಿದ ಅತಿ ದೊಡ್ಡ ಉಡುಗೊರೆಯೆಂದರೆ ಅದು ಪ್ರಧಾನಿಯವರಿಂದ ಸಿಕ್ಕ ಜೀವನದಾನ ಎಂದು ಬಾಲಕಿಯ ತಾಯಿ ಹೇಳಿದ್ದಾರೆ.

ತಮ್ಮ ಭಾವುಕ ಮನವಿಯಲ್ಲಿ, ಬಾಲಕಿಯ ತಾಯಿ ಪ್ರಧಾನಿಯವರ ಬಳಿ ತಮ್ಮ ಮಗಳನ್ನು ದತ್ತು ತೆಗೆದುಕೊಂಡು ಆಕೆಯ ಭವಿಷ್ಯವನ್ನು ಉಜ್ವಲಗೊಳಿಸಲು ನೆರವಾಗುವಂತೆ ಕೋರಿದ್ದಾರೆ. ಮೋದಿ ಜೀ, ದಯವಿಟ್ಟು ಇವಳನ್ನು ದತ್ತು ಪಡೆದು ಆಕೆಯ ಭವಿಷ್ಯವನ್ನು ಬೆಳಗಿಸಿ. ನಮಗೆ ತುಂಬಾ ನಾಚಿಕೆಯಾಗುತ್ತಿದೆ, ನಾವು ಪದೇ ಪದೇ ಕ್ಷಮೆ ಕೋರುತ್ತೇವೆ ಎಂದು ಅವರು ಹೇಳಿದ್ದಾರೆ.

ಇದೇ ವೇಳೆ, ತಮ್ಮ ಮಗಳ ವಿರುದ್ಧ ದಾಖಲಾಗಿರುವ ಎಫ್‌ಐಆರ್‌ನಲ್ಲಿ ಆಕೆಯ ವಯಸ್ಸನ್ನು ತಪ್ಪಾಗಿ ನಮೂದಿಸಲಾಗಿದೆ ಎಂದು ಪ್ರತಿಪಾದಿಸಿರುವ ಅವರು, ಆ ದೂರನ್ನು ಹಿಂಪಡೆಯುವಂತೆ ಮನವಿ ಮಾಡುತ್ತಾ, ತಮ್ಮ ಮಗಳು 15 ವರ್ಷದ ಅಪ್ರಾಪ್ತೆ ಎಂಬುದನ್ನು ಪುನರುಚ್ಚರಿಸಿದ್ದಾರೆ.

ಇದನ್ನೂ ಓದಿ:ಶಿಕ್ಷಿಸುವುದಕ್ಕಿಂತ ಕ್ಷಮಿಸುವುದೇ ಶ್ರೇಷ್ಠ!...ನಿಂದನೆಗಳಿಂದ ಸಮಸ್ಯೆ ಪರಿಹಾರವಾಗುವುದಿಲ್ಲ ಎಂದ ಪ್ರಧಾನಿ ಮೋದಿ | Narendra Modi

ಹೊಸ ಕಾನೂನಿಗೆ ಮನವಿ!...

ತಾವು ಇನ್‌ಸ್ಟಾಗ್ರಾಮ್‌ ಬಳಸುವುದಿಲ್ಲ ಎಂದು ತಿಳಿಸಿದ ತಾಯಿ, ವಿಡಿಯೋ ವೈರಲ್ ಆದ ನಂತರ ತಮ್ಮ ಕುಟುಂಬವು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ನಿಂದನೆಗೆ ಒಳಗಾಗಿದೆ ಎಂದು ಅಳಲು ತೋಡಿಕೊಂಡಿದ್ದಾರೆ. ನಮ್ಮಂತಹ ಹೆತ್ತವರು ಸಾಯಬೇಕು ಎಂದು ಜನರು ಕಾಮೆಂಟ್ ಮಾಡುತ್ತಿದ್ದಾರೆ. ಇದನ್ನು ಹೇಳಲು ನನ್ನ ಬಳಿ ಪದಗಳೇ ಸಿಗುತ್ತಿಲ್ಲ ಎಂದಿರುವ ಅವರು, 10 ರಿಂದ 20 ವರ್ಷದೊಳಗಿನ ಮಕ್ಕಳು ಸುಲಭವಾಗಿ ಇತರರ ಪ್ರಭಾವಕ್ಕೆ ಒಳಗಾಗುತ್ತಾರೆ ಮತ್ತು ದುರ್ಬಳಕೆಯಾಗುತ್ತಾರೆ ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಅಪ್ರಾಪ್ತರ ಸುರಕ್ಷತೆಗಾಗಿ ಸರ್ಕಾರ ಬಿಗಿಯಾದ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಆಗ್ರಹಿಸಿರುವ ಅವರು, ಮಕ್ಕಳಿಗೆ ಇನ್‌ಸ್ಟಾಗ್ರಾಮ್ ಹಾಗೂ ಫೇಸ್‌ಬುಕ್ ನಿಷೇಧಿಸುವಂತೆ ಮತ್ತು 18 ವರ್ಷದೊಳಗಿನ ಮಕ್ಕಳು ಯಾವುದೇ ಪ್ರತಿಭಟನೆಗಳಲ್ಲಿ ಭಾಗವಹಿಸದಂತೆ ತಡೆಯುವ ಕಾನೂನು ರೂಪಿಸುವಂತೆ ಪ್ರಧಾನಿ ಮೋದಿಯವರಲ್ಲಿ ಮನವಿ ಮಾಡಿದ್ದಾರೆ. ಮಕ್ಕಳು ಕೇವಲ ವಿದ್ಯಾಭ್ಯಾಸ ಮಾಡಬೇಕು. ಅವರಿಗೆ ಏನೂ ತಿಳಿದಿರುವುದಿಲ್ಲ, ಅವರನ್ನು ಇತರರು ತಮ್ಮ ಸ್ವಾರ್ಥಕ್ಕೆ ಬಳಸಿಕೊಳ್ಳುತ್ತಾರೆ. ಅವರಿಗೆ ಸಂಸ್ಕೃತಿ, ಸಮಾಜ ಹಾಗೂ ಹಿರಿಯರಿಗೆ ನೀಡಬೇಕಾದ ಗೌರವದ ಬಗ್ಗೆ ಯಾವುದೇ ಕಲ್ಪನೆ ಇರುವುದಿಲ್ಲ ಎಂದು ಅವರು ಹೇಳಿದ್ದಾರೆ.

ಜುಲೈ 29 ರಂದು ಝೀರೋ ಎಫ್‌ಐಆರ್ ದಾಖಲು

ಜುಲೈ 23 ರಂದು ಜಂತರ್ ಮಂತರ್‌ನಲ್ಲಿ ನಡೆದ ಪ್ರತಿಭಟನೆಯಲ್ಲಿ ಪ್ರಧಾನಿ ವಿರುದ್ಧ ನಿಂದನಾತ್ಮಕ ಘೋಷಣೆಗಳನ್ನು ಕೂಗಿದ ಆರೋಪದ ಮೇಲೆ ಕಳೆದ ಜುಲೈ 29 ರಂದು ನೋಯ್ಡಾದ ಎಕ್ಸ್‌ಪ್ರೆಸ್‌ವೇ ಪೊಲೀಸ್ ಠಾಣೆಯಲ್ಲಿ ಆಕೆಯ ವಿರುದ್ಧ ಝೀರೋ ಎಫ್‌ಐಆರ್ ದಾಖಲಾಗಿತ್ತು. ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 352, 353(1) ಮತ್ತು 356(1) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ಮುಂದಿನ ತನಿಖೆಗಾಗಿ ಪ್ರಕರಣವನ್ನು ದೆಹಲಿಯ ಪಾರ್ಲಿಮೆಂಟ್ ಸ್ಟ್ರೀಟ್ ಪೊಲೀಸ್ ಠಾಣೆಗೆ ವರ್ಗಾಯಿಸಲಾಗಿದೆ.
ಈ ಘಟನೆ ಕುರಿತು ಇನ್‌ಸ್ಟಾಗ್ರಾಮ್‌ನಲ್ಲಿ ವೀಡಿಯೊ ಸಂದೇಶ ಹಂಚಿಕೊಂಡಿದ್ದ ಪ್ರಧಾನಿ ನರೇಂದ್ರ ಮೋದಿ, ತಮ್ಮ ಹಾಗೂ ತಮ್ಮ ದಿವಂಗತ ತಾಯಿಯ ವಿರುದ್ಧ ಬಳಸಿದ ನಿಂದನಾತ್ಮಕ ಮಾತುಗಳು ನೋವುಂಟುಮಾಡಿವೆ. ಆದಾಗ್ಯೂ ಯುವಜನರು ತಮ್ಮ ತಪ್ಪುಗಳಿಂದ ಕಲಿಯಲು ಅವಕಾಶ ನೀಡಬೇಕು. ಶಿಕ್ಷಿಸುವ ಬದಲು ಸಮಾಜ ಅವರಿಗೆ ಸರಿಯಾದ ಹಾದಿ ತೋರಿಸಬೇಕು ಎಂದು ಹೇಳಿ ಆ ವಿದ್ಯಾರ್ಥಿಗಳನ್ನು ಕ್ಷಮಿಸಿರುವುದಾಗಿ ತಿಳಿಸಿದ್ದರು.

ನನ್ನದು ತಪ್ಪಾಗಿದೆ ಎಂದಿದ್ದ ಬಾಲಕಿ!..

ಪ್ರಕರಣ ದಾಖಲಾದ ಮರುದಿನವೇ ಆ ಬಾಲಕಿ ಸಾಮಾಜಿಕ ಜಾಲತಾಣಗಳಲ್ಲಿ ಕ್ಷಮಾಪಣೆ ಕೇಳುವ ವೀಡಿಯೊ ಪೋಸ್ಟ್ ಮಾಡಿದ್ದಾಳೆ. ತನಗೆ 15 ವರ್ಷ ವಯಸ್ಸಾಗಿದ್ದು, ಪ್ರತಿಭಟನೆಯಲ್ಲಿ ಇತರರ ಪ್ರಚೋದನೆಗೆ ಒಳಗಾಗಿ ಈ ತಪ್ಪು ಮಾಡಿದ್ದೇನೆ ಎಂದು ಹೇಳಿದ್ದಾಳೆ. ನಾವು ಕನ್ನಾಟ್ ಪ್ಲೇಸ್‌ಗೆ ಭೇಟಿ ನೀಡಿದ ನಂತರ ಸ್ನೇಹಿತರೊಂದಿಗೆ ಪ್ರತಿಭಟನೆಗೆ ಹೋಗಿದ್ದೆವು. ಅಲ್ಲಿ ಮೋದಿ ವಿರುದ್ಧ ನಿಂದನಾತ್ಮಕ ಘೋಷಣೆಗಳನ್ನು ಕೂಗುತ್ತಿದ್ದವರ ಪ್ರಭಾವಕ್ಕೆ ಒಳಗಾದೆ. ನನಗೆ ಕೇವಲ 15 ವರ್ಷ ವಯಸ್ಸು. ನಾನು ಮಾಡಿದ್ದು ಕ್ಷಮಿಸಲಾರದ ತಪ್ಪು. ಇಡೀ ದೇಶದ ಬಳಿ ಕ್ಷಮೆ ಕೇಳುತ್ತೇನೆ, ನನಗೆ ತೀವ್ರ ಮುಜುಗರವಾಗುತ್ತಿದೆ ಎಂದು ಕಣ್ಣೀರಿಟ್ಟಿದ್ದಳು(ಏಜೆನ್ಸೀಸ್​).
Noida Police
abhijeet dipke
cockroach janta party
jantar mantar protest
neet protest
ruchika singh mother
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net