ವಿಜಯ್ ಕ್ರೇಜ್‌ಗೆ ಸಾಕ್ಷಿಯಾದ ಗಣೇಶ ಚತುರ್ಥಿ; ‘ಗಿಲ್ಲಿ’ಯಿಂದ ರಾಜಕೀಯ ಗೆಟಪ್​ನಲ್ಲಿರುವ ಗಣಪನ ಮೂರ್ತಿಗಳ ಫೋಟೊ ವೈರಲ್​! Thalapathy Vijay

ಚೆನ್ನೈ: ಭಾರತದಾದ್ಯಂತ ಗಣೇಶ ಚತುರ್ಥಿಯ ಹಬ್ಬದ ಸಂಭ್ರಮ ಕಳೆಗಟ್ಟಿದೆ. ಗಲ್ಲಿಗಲ್ಲಿಯಲ್ಲೂ ವಿಘ್ನನಿವಾರಕನ ಮೂರ್ತಿಗಳನ್ನು ಪ್ರತಿಷ್ಠಾಪಿಸಿ ಭಕ್ತರು ಸಂಭ್ರಮಿಸುತ್ತಿದ್ದಾರೆ. ಅದರಲ್ಲೂ ತಮಿಳುನಾಡಿನಲ್ಲಿ ಹಬ್ಬದ ವಾತಾವರಣವೇ ಬೇರೆ ಮಟ್ಟದಲ್ಲಿರುತ್ತದೆ. ಈ ಬಾರಿ ಚೆನ್ನೈನಲ್ಲಿ ಗಣೇಶ ಹಬ್ಬದ ಸಂಭ್ರಮಕ್ಕೆ ತಮಿಳು ಚಿತ್ರರಂಗದ ಸ್ಟಾರ್ ಹಾಗೂ ನೂತನ ಮುಖ್ಯಮಂತ್ರಿ ಜೋಸೆಫ್​ ವಿಜಯ್ (Thalapathy Vijay) ಥೀಮ್​ನಲ್ಲಿ ಗಣೇಶನ ಮೂರ್ತಿಯನ್ನು ಪ್ರತಿಷ್ಟಾಪಿಸಲಾಗಿದೆ.

ಚೆನ್ನೈನ ಕೊರುಕ್ಕುಪೇಟೆ ಹಾಗೂ ಆರ್.ಕೆ. ನಗರ ಸೇರಿದಂತೆ ಹಲವೆಡೆ ನಟ ವಿಜಯ್ ಅವರ ವಿಭಿನ್ನ ಶೈಲಿಯನ್ನು ಹೋಲುವ ವಿನಾಯಕನ ವಿಗ್ರಹಗಳನ್ನು ಪ್ರತಿಷ್ಠಾಪಿಸಲಾಗಿದ್ದು, ಇದು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ.

ಚೆನ್ನೈನಲ್ಲಿ ಸ್ಥಾಪಿಸಲಾಗಿರುವ ಈ ವಿನಾಯಕನ ವಿಗ್ರಹಗಳು ತುಂಬಾನೇ ವಿಶಿಷ್ಟವಾಗಿವೆ. ತಮಿಳುನಾಡಿನ ಯುವಕರ ಆರಾಧ್ಯ ದೈವವಾಗಿರುವ ವಿಜಯ್ ಅವರ ವಿವಿಧ ಜನಪ್ರಿಯ ರೂಪಗಳನ್ನು ಈ ಗಣೇಶ ಮೂರ್ತಿಗಳಲ್ಲಿ ಬಿಂಬಿಸಲಾಗಿದೆ. ವಿಶೇಷವಾಗಿ ಅವರ ಆಲ್-ಟೈಮ್ ಬ್ಲಾಕ್‌ಬಸ್ಟರ್ ಮೂವಿ 'ಗಿಲ್ಲಿ' (Ghilli) ಚಿತ್ರದ ಲುಕ್ ಹಾಗೂ ಇತ್ತೀಚಿನ ಅವರ ರಾಜಕೀಯ ಪ್ರಚಾರದ ಸಂದರ್ಭದ ಗೆಟಪ್‌ಗಳನ್ನು ಈ ಗಣೇಶನ ಮೂರ್ತಿಗಳಿಗೆ ನೀಡಲಾಗಿದೆ.

ಸಿನಿಮಾ ಮತ್ತು ರಾಜಕೀಯದ ಈ ವಿಶಿಷ್ಟ ಸಮ್ಮಿಶ್ರಣವು ಸ್ಥಳೀಯರನ್ನು ಹಾಗೂ ಹಬ್ಬಕ್ಕೆ ಬಂದಿರುವ ಪ್ರವಾಸಿಗರನ್ನು ತನ್ನೆಡೆಗೆ ಸೆಳೆಯುತ್ತಿದೆ. ಇಂತಹ ವಿಭಿನ್ನ ಶೈಲಿಯ ಗಣೇಶನ ಮೂರ್ತಿಗಳ ಫೋಟೋಗಳು ಮತ್ತು ವಿಡಿಯೋಗಳು ಈಗ ಇನ್‌ಸ್ಟಾಗ್ರಾಮ್ ಹಾಗೂ ಎಕ್ಸ್ (ಟ್ವಿಟರ್) ಸೇರಿದಂತೆ ಎಲ್ಲಾ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ಸದ್ದು ಮಾಡುತ್ತಿದ್ದು, ಲೈಕ್ಸ್ ಮತ್ತು ವ್ಯೂಸ್ ಬಾಚಿಕೊಳ್ಳುತ್ತಿವೆ.

ಇತ್ತ ಹಬ್ಬದ ಸಂಭ್ರಮದ ನಡುವೆ, ತಮಿಳುನಾಡಿನ ಪ್ರಮುಖ ನಾಯಕ ಹಾಗೂ ನಟ ವಿಜಯ್ ಅವರು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣಗಳ ಮೂಲಕ ಜನರಿಗೆ ಗಣೇಶ ಚತುರ್ಥಿಯ ಶುಭಾಶಯಗಳನ್ನು ಕೋರಿದ್ದಾರೆ. ಎಲ್ಲರಿಗೂ ಭರವಸೆ, ಶಾಂತಿ, ಸಮೃದ್ಧಿ ಹಾಗೂ ಯಶಸ್ಸಿನ ಸಂದೇಶವನ್ನು ಅವರು ಹಂಚಿಕೊಂಡಿದ್ದಾರೆ.