ತೈಲ ಅಭಾವದ ವದಂತಿ: ಪೆಟ್ರೋಲ್ ಬಂಕ್‌ಗೆ ನೀರಿನ ಬ್ಯಾರೆಲ್ ತಂದ ಭೂಪ; 82 ಸಾವಿರದ ಡೀಸೆಲ್ ತುಂಬಿಸಿದ ವಿಡಿಯೋ ವೈರಲ್! Viral Video

ಮಧ್ಯಪ್ರದೇಶ: ಮಧ್ಯಪ್ರಾಚ್ಯದಲ್ಲಿ ಮುಂದುವರೆಯುತ್ತಿರುವ ಸಂಘರ್ಷದ ಹಿನ್ನಲೆಯಲ್ಲಿ ಭಾರತದಲ್ಲಿ ತೈಲ ಹಾಗೂ ಅನಿಲ (ಗ್ಯಾಸ್​ ಸಿಲಿಂಡರ್​) ಪೂರೈಕೆಯಲ್ಲಿ ವ್ಯತ್ಯಯವಾಗುವ ವದಂತಿ ಕಾಡ್ಗಿಚ್ಚಿನಂತೆ ಹರಡುತ್ತಿದ್ದು, ಎಲ್ಲಿ ನೋಡಿದರು ಜನ ಸರತಿ ಸಾಲಲ್ಲಿ ನಿಂತಿರುವ ದೃಶ್ಯಗಳು ವೈರಲ್ (Viral Video) ​ ಆಗುತ್ತಿವೆ.

ಇನ್ನೇನು ಕೆಲವೇ ದಿನಗಳಲ್ಲಿ ಪೆಟ್ರೋಲ್​ ಹಾಗೂ ಡೀಸೆಲ್​ ಖಾಲಿಯಾಗಲಿದೆ ಎಂಬ ವದಂತಿಯನ್ನು ನಂಬಿದ ವ್ಯಕ್ತಿಯೊಬ್ಬ, ಸುಮಾರು ಎಂಟು ಸಾವಿರ ಲೀಟರ್​ ಸಾಮರ್ಥ್ಯವಿರುವ ನೀರಿನ ಬ್ಯಾರೆಲ್​ವೊಂದನ್ನು ಪೆಟ್ರೋಲ್​ ಬಂಕ್​ಗೆ ತೆಗೆದುಕೊಂಡು ಬಂದು ಬರೊಬ್ಬರಿ 82,500 ರೂಪಾಯಿಯ ಡೀಸೆಲ್​ ತುಂಬಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದೆ.

ತೈಲ ಪೂರೈಕೆಗಳ ಬಗ್ಗೆ ವದಂತಿಗಳ ಹಾವಳಿ ಯಾವ ರೀತಿಯಲ್ಲಿದೆ ಎಂದರೆ ಜನ ಭಯಭೀತರಾಗಿ ಮನೆಯಲ್ಲಿರುವ ಬಕೆಟ್​, ಕುಕ್ಕರ್​ಗಳನ್ನು ತೆಗೆದುಕೊಂಡು, ಪೆಟ್ರೋಲ್​ ಬಂಕ್​ಗೆ ಬಂದು ಅದರಲ್ಲಿ ತೈಲವನ್ನು ತುಂಬಿಸಿಕೊಳ್ಳುತ್ತಿರುವ ವಿಡಿಯೋ ಸೋಶಿಯಲ್​ ಮೀಡಿಯಾನಲ್ಲಿ ಸಾಕಷ್ಟು ಸದ್ದು ಮಾಡುತ್ತಿದೆ.

ಈ ವದಂತಿಗಳಿಗೆ ಪ್ರತಿಕ್ರಿಯೆ ನೀಡಿರುವ ತೈಲ ಪೂರೈಕೆದಾರ ಕಂಪನಿ ಭಾರತ್​ ಪೆಟ್ರೋಲಿಯಂ, ದೇಶದಲ್ಲಿ ತೈಲ ಪೂರೈಕೆಯಲ್ಲಿ ಯಾವುದೇ ಕೊರತೆಗಳಿಲ್ಲ. ಆದರೆ ಜನರು ವದಂತಿಗಳಿಗೆ ಭಯಪಟ್ಟು ಮುಂಗಡವಾಗಿ ಹೇರಳವಾಗಿ ಪೆಟ್ರೋಲ್​ ಮತ್ತು ಡೀಸೆಲ್​ಗಳನ್ನು ಖರೀದಿ ಮಾಡಿದರೆ ಅಪಾಯ ತಲೆದೂರಲಿದೆ ಎಂದು ಎಚ್ಚರಿಕೆ ನೀಡಿದೆ.

ತಜ್ಞರ ಪ್ರಕಾರ ಹೀಗೆ ಬಕೆಟ್​, ಕುಕ್ಕರ್​, ಪ್ಲಾಸ್ಟಿಕ್​ ಪಾತ್ರೆಗಳಲ್ಲಿ ತೈಲಗಳನ್ನು ಸಂಗ್ರಹಿಸುವುದು ಅಪಾಯಕಾರಿಯಾಗಿದೆ. ಹೆಚ್ಚಿನ ಸಂಖ್ಯೆಯಲ್ಲಿ ಪೆಟ್ರೋಲ್​ ಮತ್ತು ಡೀಸೆಲ್​ನ್ನು ಮನೆಯಲ್ಲಿ ಸಂಗ್ರಹಿಸಿಡುವುದರಿಂದ ಬೆಂಕಿ ಅವಗಢ ಸಂಭವಿಸುವ ಸಾಧ್ಯತೆಯಿದೆ ಎಂದು ಹೇಳಿದ್ದಾರೆ,(ಏಜನ್ಸೀಸ್​).