ವಿಜಯ್ ಪಾಲಿಗೆ ಒಲಿಯುತ್ತಾ ರಾಜಯೋಗ..? ಸಿನಿಮಾ ತಾರೆಯರ ಚೊಚ್ಚಲ ಚುನಾವಣಾ ಫಲಿತಾಂಶದ ಹಳೇ ಅಂಕಿ-ಅಂಶಗಳು ಇಲ್ಲಿವೆ ನೋಡಿ! | Tamil Nadu Election

ತಮಿಳುನಾಡು ಮತ್ತು ಆಂಧ್ರಪ್ರದೇಶದ ರಾಜಕೀಯ ಇತಿಹಾಸವನ್ನು ಗಮನಿಸಿದರೆ ಸಿನಿಮಾ ರಂಗದ ಪ್ರಭಾವ ಅಚ್ಚಳಿಯದಂತೆ ಉಳಿದಿದೆ. ಎಂ.ಜಿ. ರಾಮಚಂದ್ರನ್ (MGR) ಅವರು 1977 ರಲ್ಲಿ ಎಐಎಡಿಎಂಕೆ ಪಕ್ಷದ ಮೂಲಕ ಮೊದಲ ಚುನಾವಣೆಯಲ್ಲೇ ಶೇ. 30.4 ರಷ್ಟು ಮತಗಳನ್ನು ಗಳಿಸಿ ಮೂರು ಬಾರಿ ಮುಖ್ಯಮಂತ್ರಿಯಾಗಿ ಅಪ್ರತಿಮ ಯಶಸ್ಸು ಕಂಡರು. ಅದೇ ಮಾದರಿಯ ಭರ್ಜರಿ ಎಂಟ್ರಿ ನೀಡಿದ್ದು ಆಂಧ್ರಪ್ರದೇಶದ ಎನ್.ಟಿ. ರಾಮರಾವ್, ತೆಲುಗು ದೇಶಂ ಪಕ್ಷದ ಮೂಲಕ ಚೊಚ್ಚಲ ಚುನಾವಣೆಯಲ್ಲೇ ಶೇ. 46.2 ರಷ್ಟು ಮತಗಳೊಂದಿಗೆ 202 ಸ್ಥಾನಗಳನ್ನು ಗೆದ್ದು ನೇರವಾಗಿ ಅಧಿಕಾರಕ್ಕೇರಿದರು. ಈ ಇಬ್ಬರು ನಟರು ರಾಜಕೀಯ ಪ್ರವೇಶಿಸಿದ ಮೊದಲ ಯತ್ನದಲ್ಲೇ ವಿಜಯಮಾಲೆ ಧರಿಸಿದ ಅಪರೂಪದ ನಾಯಕರು.

ಇನ್ನು ಇತ್ತೀಚಿನ ವರ್ಷಗಳಲ್ಲಿ ಪವನ್ ಕಲ್ಯಾಣ್ ಜನ ಸೇನಾ ಪಕ್ಷ 2019 ರಲ್ಲಿ ಕೇವಲ ಶೇ. 5.53 ರಷ್ಟು ಮತ ಗಳಿಸಿ ಒಂದು ಸ್ಥಾನಕ್ಕೆ ತೃಪ್ತಿಪಡಬೇಕಾಯಿತು. ಕಮಲ್ ಹಾಸನ್​ರ ಮಕ್ಕಳ್ ನೀಧಿ ಮೈಯಂ ಪಕ್ಷವು 2021 ರಲ್ಲಿ ಕೇವಲ ಶೇ. 2.6 ರಷ್ಟು ಮತಗಳನ್ನು ಪಡೆದು ಸಿನಿಮಾ ತಾರೆಯರಿಗೆ ರಾಜಕೀಯ ಅಷ್ಟು ಸುಲಭವಲ್ಲ ಎಂಬುದನ್ನು ಸಾಬೀತುಪಡಿಸಿತ್ತು. ಈಗ ವಿಜಯ್ ಅವರ ಸರದಿ. ನಿರ್ಗಮನ ಸಮೀಕ್ಷೆಗಳು ವಿಜಯ್​ರ ಪರವಾಗಿ ಧನಾತ್ಮಕವಾಗಿಯೇ ತೋರಿಸುತ್ತಿದ್ದು, ಅವರು ಎಂಜಿಆರ್ ಅಥವಾ ಎನ್‌ಟಿಆರ್ ಅವರಂತೆ ಇತಿಹಾಸ ನಿರ್ಮಿಸುತ್ತಾರಾ ಎಂಬುದು ಮೇ 4 ರಂದು ಸ್ಪಷ್ಟವಾಗಲಿದೆ. ಸಿನಿಮಾ ಮತ್ತು ರಾಜಕೀಯದ ಈ ಜುಗಲ್‌ಬಂದಿ ತಮಿಳುನಾಡಿನಲ್ಲಿ ಹೊಸ ಅಧ್ಯಾಯ ಬರೆಯುವುದೇ ಎಂದು ಇಡೀ ದೇಶ ಕಾಯುತ್ತಿದೆ(ಏಜೆನ್ಸೀಸ್​​).