ಫುಡ್ ಡೆಲಿವರಿ ರಂಗಕ್ಕೆ ಫ್ಲಿಪ್‌ಕಾರ್ಟ್ ಬಿಗ್ ಎಂಟ್ರಿ: ಜೊಮಾಟೊ, ಸ್ವಿಗ್ಗಿಗೆ ಶುರುವಾಯ್ತು ತೀವ್ರ ಪೈಪೋಟಿ! Flipkart Food Delivery

ಫ್ಲಿಪ್‌ಕಾರ್ಟ್ ಗ್ರೂಪ್ ಸಿಇಒ ಕಲ್ಯಾಣ್ ಕೃಷ್ಣಮೂರ್ತಿ ಅವರು ನೀಡಿರುವ ಮಾಹಿತಿ ಪ್ರಕಾರ, ಮುಂಬರುವ ಕೆಲವು ವಾರಗಳಲ್ಲಿ ಫುಡ್ ಡೆಲಿವರಿ ಸೇವೆ ಅಧಿಕೃತವಾಗಿ ಚಾಲನೆಗೆ ಬರಲಿದೆ. ಆರಂಭಿಕ ಹಂತದಲ್ಲಿ ಸಣ್ಣ ಪ್ರಮಾಣದಲ್ಲಿ ಕೆಲವು ಗ್ರಾಹಕರಿಗೆ ಅಥವಾ ನಿರ್ದಿಷ್ಟ ನಗರದಲ್ಲಿ ಮಾತ್ರ ಈ ಸೌಲಭ್ಯ ಸಿಗಲಿದೆ.

ಆದಾಗ್ಯೂ, ಗ್ರಾಹಕರ ಪ್ರತಿಕ್ರಿಯೆ ಮತ್ತು ಅನುಭವಗಳನ್ನು ಆಧರಿಸಿ ಸೇವೆಯನ್ನು ಸುಧಾರಿಸಿದ ನಂತರವೇ ದೇಶಾದ್ಯಂತ ವಿಸ್ತರಿಸಲು ಯೋಜನೆ ಮಾಡಲಾಗಿದೆ. ಕಂಪನಿಯು ತನ್ನ ಕ್ವಿಕ್​​ ಕಾಮರ್ಸ್​ ಸೇವೆಯಾದ ಫ್ಲಿಪ್​ಕಾರ್ಟ್​ ಮಿನಿಟ್ಸ್​ ಆರಂಭಿಸಿದ ಮಾದರಿಯಲ್ಲೇ ಇದನ್ನು ಮುಂದುವರೆಸಲಾಗುತ್ತಿದೆ ಎಂದು ಹೇಳಲಾಗಿದೆ.

ಆದಾಗ್ಯೂ, ಗ್ರಾಹಕರು ಈ ಫುಡ್ ಡೆಲಿವರಿ ಸೇವೆಯನ್ನು ಪ್ರತ್ಯೇಕವಾದ ಹೊಸ ಆಪ್ ಮೂಲಕ ಹಾಗೂ ಹಾಲಿ ಇರುವ ಫ್ಲಿಪ್‌ಕಾರ್ಟ್ ಮೂಲ ಆಪ್ ಮೂಲಕವೂ ಬಳಸಬಹುದಾಗಿದೆ. ಕೇಂದ್ರ ಸರ್ಕಾರದ ‘ಓಪನ್ ನೆಟ್‌ವರ್ಕ್ ಫಾರ್ ಡಿಜಿಟಲ್ ಕಾಮರ್ಸ್’ ನೆಟ್‌ವರ್ಕ್‌ನೊಂದಿಗೆ ಒಗ್ಗೂಡಿ ಈ ಸೇವೆಯನ್ನು ಒದಗಿಸಲು ಫ್ಲಿಪ್‌ಕಾರ್ಟ್ ಯೋಜಿಸುತ್ತಿದೆ ಎಂದು ತಿಳಿದುಬಂದಿದೆ.

ಮಾರುಕಟ್ಟೆಯಲ್ಲಿ ಕೇವಲ ದರ ಸಮರ ನಡೆಸುವುದು ಕಂಪನಿಯ ಉದ್ದೇಶವಲ್ಲ ಎಂದು ಸ್ಪಷ್ಟಪಡಿಸಿರುವ ಕೃಷ್ಣಮೂರ್ತಿ, ಉತ್ತಮ ಗುಣಮಟ್ಟ, ಹೆಚ್ಚು ಹೋಟೆಲ್‌ಗಳ ಆಯ್ಕೆ, ವೇಗದ ಡೆಲಿವರಿ ಹಾಗೂ ನಂಬಿಕಸ್ಥ ಸೇವೆಯನ್ನು ಒದಗಿಸುವುದರ ಮೇಲೆ ನಾವು ಗಮನಹರಿಸಲಿದ್ದೇವೆ ಎಂದಿದ್ದಾರೆ.

ಭಾರತದ ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ಸದ್ಯ ಜೊಮಾಟೊ ಮತ್ತು ಸ್ವಿಗ್ಗಿ ದೊಡ್ಡ ಮಟ್ಟದ ಪಾಲನ್ನು ಹೊಂದಿವೆ. ಈಗ ಫ್ಲಿಪ್‌ಕಾರ್ಟ್ ತನ್ನ ವಿಶಾಲವಾದ ಗ್ರಾಹಕರ ಜಾಲ ಮತ್ತು ಬಲವಾದ ಲಾಜಿಸ್ಟಿಕ್ಸ್ ವ್ಯವಸ್ಥೆಯೊಂದಿಗೆ ಈ ಕ್ಷೇತ್ರಕ್ಕೆ ಕಾಲಿಡುತ್ತಿರುವುದು ಮಾರುಕಟ್ಟೆಯಲ್ಲಿ ತೀವ್ರ ಕುತೂಹಲ ಮೂಡಿಸಿದೆ (ಏಜೆನ್ಸೀಸ್​).