ವಿಮಾನಗಳ ಅವ್ಯವಸ್ಥೆ; ಇಂಡಿಗೋ ಸಿಇಒರನ್ನು ಹೊಣೆಗಾರರನ್ನಾಗಿ ಮಾಡಿ ಶೋಕಾಸ್ ನೋಟಿಸ್ ನೀಡಿದ ಡಿಜಿಸಿಎ | IndiGo CEO

ನವದೆಹಲಿ: ಭಾರತದಲ್ಲಿ ಕೆಲವು ದಿನಗಳಿಂದ ಸೃಷ್ಟಿಯಾಗಿರುವ ಇಂಡಿಗೋ ವಿಮಾನಯಾನ ಸಂಸ್ಥೆಯ ವಿಮಾನಗಳ ಅವ್ಯವಸ್ಥೆ ಬಗ್ಗೆ ಅದರ ಸಿಇಒ(IndiGo CEO) ಪೀಟರ್ ಎಲ್ಬರ್ಸ್ ಅವರನ್ನೇ ಹೊಣೆಗಾರರನ್ನಾಗಿ ಮಾಡಿ ನಾಗರಿಕ ವಿಮಾನಯಾನ ನಿರ್ದೇಶನಾಲಯ (ಡಿಜಿಸಿಎ) ಶನಿವಾರ(ಡಿ. 06) ನೋಟಿಸ್ ಜಾರಿ ಮಾಡಿದೆ ಎಂದು ವರದಿಯಾಗಿದೆ. 

ಪೈಲಟ್‌ಗಳಿಗೆ ಪರಿಷ್ಕೃತ ವಿಮಾನ ಕರ್ತವ್ಯ ಸಮಯ ಮಿತಿಗಳನ್ನು(ಎಫ್‌ಡಿಟಿಎಲ್) ಜಾರಿಗೆ ತರಲು ಇಂಡಿಗೋ ಸಮರ್ಪಕ ವ್ಯವಸ್ಥೆಗಳನ್ನು ಮಾಡುವಲ್ಲಿ ವಿಫಲವಾಗಿರುವುದು ಬಿಕ್ಕಟ್ಟಿಗೆ ಪ್ರಾಥಮಿಕ ಕಾರಣ ಎಂದು ತಿಳಿದು ಬಂದಿದೆ. ನೋಟಿಸ್ ತಲುಪಿದ 24 ಗಂಟಯೊಳಗೆ ಉತ್ತರಿಸುವಂತೆ ಸೂಚಿಸಿದ್ದು, ಉತ್ತರಿಸಲು ವಿಫಲವಾದ್ರೆ ಡಿಜಿಸಿಎ ಏಕಪಕ್ಷೀಯವಾಗಿ ನಿರ್ಧಾರ ತೆಗೆದುಕೊಳ್ಳುತ್ತದೆ ಎಂದು ತಿಳಿಸಿದೆ. 

ವಿಮಾನಯಾನ ಸಂಸ್ಥೆಯು ತನ್ನ ರೋಸ್ಟರ್‌ಗಳು ಮತ್ತು ಸಂಪನ್ಮೂಲಗಳನ್ನು ಸಮಯಕ್ಕೆ ಸರಿಯಾಗಿ ಹೊಂದಿಸಲು ಸಾಧ್ಯವಾಗ ಅಸಮರ್ಥತೆಯು ಅದರ ವಿಮಾನ ಪ್ರಯಾಣಗಳ ವ್ಯಾಪಕ ರದ್ದತಿ, ವಿಳಂಬ, ಸಿಬ್ಬಂದಿ ಕೊರತೆ ಮತ್ತು ಕ್ಯಾಸ್ಕೇಡಿಂಗ್ ಅಡಚಣೆಗಳಿಗೆ ಪ್ರಮುಖ ಕಾರಣ ಎಂದು ಗಮನಿಸಲಾಗಿದೆ. ಸಾಕಷ್ಟು ಸಮಯ ನೀಡಿದ ಮೇಲೂ ನಿಯಮಗಳನ್ನು ಸರಿಯಾಗಿ ಅನುಷ್ಠಾನಕ್ಕೆ ತರದೇ ಇರುವುದು ಕಂಡು ಬಂದಿದೆ ಎಂದು ನೋಟಿಸ್​ನಲ್ಲಿ ಹೇಳಿದೆ.

ಕಾಕ್‌ಪಿಟ್ ಸಿಬ್ಬಂದಿಗೆ ಪರಿಷ್ಕೃತ ಕರ್ತವ್ಯ ಮತ್ತು ವಿಶ್ರಾಂತಿ ಅಗತ್ಯತೆಗಳನ್ನು ಯೋಜಿಸಲು ಇಂಡಿಗೋ ವಿಫಲವಾಗಿದೆ. ವಿಮಾನ ನಿಯಮಗಳು 1937ರ ನಿಯಮ 42A ಅನ್ನು ಪಾಲಿಸದಿರುವುದು, ಕರ್ತವ್ಯ ಅವಧಿಗಳನ್ನು ನಿಯಂತ್ರಿಸುವ ಬಹು ನಾಗರಿಕ ವಿಮಾನಯಾನ ಅವಶ್ಯಕತೆಗಳ (CARs) ಉಲ್ಲಂಘನೆ, ರದ್ದತಿ ಹಾಗೂ ವಿಳಂಬದ ಸಮಯದಲ್ಲಿ ಪ್ರಯಾಣಿಕರಿಗೆ ಕಡ್ಡಾಯವಾಗಿ ಮಾಹಿತಿ, ಸಹಾಯ ಅಥವಾ ಸೌಲಭ್ಯಗಳನ್ನು ಒದಗಿಸಲು ವಿಫಲವಾಗಿದೆ ಎಂದು ಆರೋಪಿಸಲಾಗಿದೆ.

ಸಿಇಒ ಆಗಿ, ವಿಮಾನಯಾನ ಸಂಸ್ಥೆಯ ಪರಿಣಾಮಕಾರಿ ನಿರ್ವಹಣೆಯನ್ನು ಖಚಿತಪಡಿಸಿಕೊಳ್ಳುವ ಜವಾಬ್ದಾರಿ ನಿಮ್ಮ ಮೇಲಿದೆ. ವಿಶ್ವಾಸಾರ್ಹ ಕಾರ್ಯಾಚರಣೆಗಳನ್ನು ನಡೆಸಲು ಮತ್ತು ಪ್ರಯಾಣಿಕರಿಗೆ ಅಗತ್ಯವಾದ ಸೌಲಭ್ಯಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು ನೀವು ನಿಮ್ಮ ಕರ್ತವ್ಯದಲ್ಲಿ ವಿಫಲರಾಗಿದ್ದೀರಿ. 24 ಗಂಟೆಗಳ ಒಳಗೆ ಈ ಕುರಿತು ಉತ್ತರಿಸುವಂತೆ ನೋಟಿಸ್​ನಲ್ಲಿ ತಿಳಿಸಲಾಗಿದೆ (ಏಜೆನ್ಸೀಸ್).