ಬಾಹ್ಯಾಕಾಶ ವೈದ್ಯಕೀಯದಲ್ಲಿ ಜಗತ್ತೇ ಬೆರಗಾಗುವ ಸಾಹಸ: ಸ್ಪೇಸ್‌ಎಕ್ಸ್ ಫ್ರಾಮ್‌2 ನೌಕೆಯಲ್ಲಿ ಮೊದಲ ಮಾನವ ಎಕ್ಸ್‌-ರೇ ಯಶಸ್ವಿ! XRay In Space

ಬಾಹ್ಯಾಕಾಶದಲ್ಲಿ ಕಾಯಿಲೆಗಳು ಮತ್ತು ಗಾಯಗಳನ್ನು ಪತ್ತೆಹಚ್ಚಲು ಒಂದಕ್ಕಿಂತ ಹೆಚ್ಚು ಇಮೇಜಿಂಗ್ ತಂತ್ರಜ್ಞಾನಗಳನ್ನು ಹೊಂದುವುದು ಗಗನಯಾತ್ರಿ ವೈದ್ಯಕೀಯ ಕ್ಷೇತ್ರದ ಬಹುಕಾಲದ ಕನಸಾಗಿತ್ತು. ಎಕ್ಸ್‌-ರೇಗಳು ಅತ್ಯಂತ ವೇಗವಾಗಿ, ಸುಲಭವಾಗಿ ಮತ್ತು ನಿಖರವಾಗಿ ಕಾಯಿಲೆ ಪತ್ತೆಹಚ್ಚಲು ಸಹಕಾರಿಯಾಗಿವೆ ಎಂದು ಮಿನೆಸೋಟಾದ ಮಾಯೋ ಕ್ಲಿನಿಕ್‌ನ ಸಹಾಯಕ ಪ್ರಾಧ್ಯಾಪಕಿ ಹಾಗೂ ಪ್ರಮುಖ ಸಂಶೋಧಕಿ ಡಾ. ಶೇನಾ ಗಿಫರ್ಡ್ ತಿಳಿಸಿದ್ದಾರೆ.

ಕಳೆದ ನಾಲ್ಕು ದಶಕಗಳಿಂದ ಬಾಹ್ಯಾಕಾಶದಲ್ಲಿ ಗಗನಯಾತ್ರಿಗಳಿಗೆ 'ಅಲ್ಟ್ರಾಸೌಂಡ್' ಮಾತ್ರ ಏಕೈಕ ವೈದ್ಯಕೀಯ ಇಮೇಜಿಂಗ್ ಆಯ್ಕೆಯಾಗಿತ್ತು. ಆದರೆ, ಅಲ್ಟ್ರಾಸೌಂಡ್ ಅನ್ನು ಸರಿಯಾಗಿ ಬಳಸಲು ಮತ್ತು ಅದರ ವರದಿಯನ್ನು ಓದಲು ತೀವ್ರ ತರಬೇತಿಯ ಅಗತ್ಯವಿರುತ್ತದೆ. ಅಲ್ಲದೆ, ವ್ಯಾಕ್ಯೂಮ್​ನಲ್ಲಿ ಇದನ್ನು ಬಳಸಲು ಸಾಧ್ಯವಿರಲಿಲ್ಲ. ಸಾಂಪ್ರದಾಯಿಕ ಎಕ್ಸ್‌-ರೇ ಯಂತ್ರಗಳು ಭಾರಿ ತೂಕ ಹೊಂದಿದ್ದು, ಹೆಚ್ಚಿನ ವಿಕಿರಣ ಸೂಸುತ್ತವೆ ಮತ್ತು ಬಾಹ್ಯಾಕಾಶದ ನಿರಂತರ ಚಲನೆಯಿಂದಾಗಿ ಚಿತ್ರಗಳು ಮಸುಕಾಗುವ ಸಾಧ್ಯತೆ ಇತ್ತು. ಹೀಗಾಗಿ ಬಾಹ್ಯಾಕಾಶದಲ್ಲಿ ಎಕ್ಸ್‌-ರೇ ಅಸಾಧ್ಯ ಎಂದೇ ಭಾವಿಸಲಾಗಿತ್ತು.

ಕ್ರೀಡಾಂಗಣಗಳಲ್ಲಿ ಹಾಗೂ ಗ್ರಾಮೀಣ ಭಾಗಗಳಲ್ಲಿ ಬಳಸಲಾಗುವ, ಸೌರಶಕ್ತಿಯಿಂದ ನಡೆಯುವ ಸಾಮಾನ್ಯ ಪೋರ್ಟಬಲ್ ಎಕ್ಸ್‌-ರೇ ಯಂತ್ರವನ್ನೇ ಈ ಪ್ರಯೋಗಕ್ಕೆ ಬಳಸಲಾಗಿತ್ತು. ಭೂಮಿಯ ಮೇಲಿನ ನಿಯಂತ್ರಣ ಕೊಠಡಿಯ ಯಾವುದೇ ಸಹಾಯವಿಲ್ಲದೆ, ಕೇವಲ 4 ಗಂಟೆಗಳ ತರಬೇತಿ ಪಡೆದ ವೈದ್ಯಕೀಯೇತರ ಮೂವರು ಗಗನಯಾತ್ರಿಗಳು ಈ ಸಾಧನೆ ಮಾಡಿದ್ದಾರೆ. ಗಗನಯಾತ್ರಿಗಳು ತಮ್ಮ ಕೈ, ಮುಂಗೈ, ಹೊಟ್ಟೆ, ಸೊಂಟ ಮತ್ತು ಎದೆಯ ಭಾಗದ ಎಕ್ಸ್‌-ರೇಗಳನ್ನು ಯಶಸ್ವಿಯಾಗಿ ತೆಗೆದಿದ್ದಾರೆ.

ಗಗನಯಾತ್ರಿಗಳು ಮರಳಿ ಭೂಮಿಗೆ ಬಂದ ನಂತರ ಮೂವರು ಸ್ವತಂತ್ರ ರೇಡಿಯಾಲಜಿಸ್ಟ್‌ಗಳು ಈ ಚಿತ್ರಗಳನ್ನು ಪರಿಶೀಲಿಸಿದ್ದು, ಇವು ವೈದ್ಯಕೀಯ ಚಿಕಿತ್ಸೆಗೆ ಬಳಸಬಹುದಾದ ಅತ್ಯುತ್ತಮ ಗುಣಮಟ್ಟವನ್ನು ಹೊಂದಿವೆ ಎಂದು ದೃಢಪಡಿಸಿದ್ದಾರೆ. ಈ ಯಶಸ್ಸು ಮುಂದಿನ ದಿನಗಳಲ್ಲಿ ಸುದೀರ್ಘ ಬಾಹ್ಯಾಕಾಶ ಪ್ರಯಾಣ ಕೈಗೊಳ್ಳುವ ಗಗನಯಾತ್ರಿಗಳ ಆರೋಗ್ಯ ರಕ್ಷಣೆಯಲ್ಲಿ ಪ್ರಮುಖ ಪಾತ್ರ ವಹಿಸಲಿದೆ (ಏಜೆನ್ಸೀಸ್​).