ಮಕ್ಕಳ ಡಿಜಿಟಲ್​ ಲೋಕಕ್ಕೆ ಬೇಲಿ

ರಾಜ್ಯ ಸರ್ಕಾರ ತನ್ನ ಇತ್ತೀಚಿನ ಬಜೆಟ್​ನಲ್ಲಿ, 16 ವರ್ಷದೊಳಗಿನ ಮಕ್ಕಳಿಗೆ ಸೋಶಿಯಲ್ ಮೀಡಿಯಾ ಬಳಕೆಯನ್ನು ನಿಷೇಧಿಸುವ ದಿಟ್ಟ ನಿರ್ಧಾರವನ್ನು ಪ್ರಕಟಿಸಿದೆ. ಬೆಳೆಯುವ ಹಂತದಲ್ಲಿರುವ ಮಕ್ಕಳ ಮಾನಸಿಕ ಆರೋಗ್ಯ ಮತ್ತು ಸುರಕ್ಷತೆಯನ್ನು ಕಾಯುವ ಸದುದ್ದೇಶ ಇದರ ಹಿಂದಿದೆ. ಇಂದಿನ ಡಿಜಿಟಲ್ ಯುಗದಲ್ಲಿ, ಸಾಮಾಜಿಕ ಜಾಲತಾಣಗಳು ಜ್ಞಾನದ ಮೂಲಗಳಾಗಿರುವುದಕ್ಕಿಂತ ಹೆಚ್ಚಾಗಿ ವ್ಯಸನ ಮತ್ತು ಸೈಬರ್ ಬೆದರಿಕೆಗಳ ತಾಣಗಳಾಗುತ್ತಿವೆ. ಹದಿಹರೆಯದವರಲ್ಲಿ ಏಕಾಗ್ರತೆಯ ಕೊರತೆ, ನಿದ್ರಾಹೀನತೆ ಮತ್ತು ಸಾಮಾಜಿಕ ಹೋಲಿಕೆಗಳಿಂದ ಉಂಟಾಗುವ ಖಿನ್ನತೆಯನ್ನು ತಡೆಯಲು ಈ ಕ್ರಮ ಪೂರಕವಾಗಿದೆ. ಮಕ್ಕಳ ಅಮಾಯಕತೆಯನ್ನು ದುರುಪಯೋಗಪಡಿಸಿಕೊಳ್ಳುವ ಸೈಬರ್ ಅಪರಾಧಗಳಿಂದ ಅವರನ್ನು ದೂರವಿಡಲು ಕೂಡ ಇದು ಸಹಕಾರಿ.

ಹಲವು ದೇಶಗಳಲ್ಲಿ ಥರ್ಡ್ ಪಾರ್ಟಿ ಏಜೆನ್ಸಿಗಳ ಮೂಲಕ ಬಳಕೆದಾರರ ವಯಸ್ಸನ್ನು ಖಚಿತಪಡಿಸಿಕೊಳ್ಳುವ ತಂತ್ರಜ್ಞಾನ ಬಳಕೆಯಲ್ಲಿದೆ. ಇನ್ನೊಂದು, ಮುಖಚಹರೆ ಮೂಲಕ ವಯಸ್ಸು ಗುರುತಿಸುವ ತಂತ್ರಜ್ಞಾನ. ಕೃತಕ ಬುದ್ಧಿಮತ್ತೆ (ಎಐ) ಬಳಸಿ ಬಳಕೆದಾರರ ಮುಖವನ್ನು ಸ್ಕಾ್ಯನ್ ಮಾಡುವ ಮೂಲಕ ಅವರ ಅಂದಾಜು ವಯಸ್ಸನ್ನು ಪತ್ತೆ ಹಚ್ಚಬಹುದು. ಅನಾಮಧೇಯವಾಗಿ ಕೆಲಸ ಮಾಡುವ ಈ ಸಾಫ್ಟ್​ವೇರ್​ಗಳು ಬಳಕೆದಾರರು 16 ವರ್ಷಕ್ಕಿಂತ ಕೆಳಗಿನವರಿದ್ದರೆ ಖಾತೆಯನ್ನು ನಿರ್ಬಂಧಿಸುತ್ತವೆ. ಮತ್ತೊಂದು ವಿಧಾನ, ಡಿವೈಸ್ ಮಟ್ಟದಲ್ಲೇ ಮಟ್ಟದ ನಿರ್ಬಂಧ ಹೇರುವುದು. ಆಪಲ್, ಗೂಗಲ್​ನಂತಹ ಕಂಪನಿಗಳು ಸ್ಮಾರ್ಟ್ ಫೋನ್​ನಲ್ಲಿರುವ ತಮ್ಮ ಆಪರೇಟಿಂಗ್ ಸಿಸ್ಟಂನಲ್ಲಿ ವಯಸ್ಸಿನ ಮಿತಿ ಸೆಟ್ ಮಾಡಲು ಅವಕಾಶ ನೀಡುತ್ತವೆ.

ಟೆಲಿಕಾಂ ಕಂಪನಿಗಳ ಮೂಲಕ ಸರ್ಕಾರ ಕೆಲವು ನಿರ್ದಿಷ್ಟ ಅಪ್ಲಿಕೇಶನ್​ಗಳು 16 ವರ್ಷದೊಳಗಿನವರ ಸಿಮ್ ಕಾರ್ಡ್ ಗಳಲ್ಲಿ ಕಾರ್ಯನಿರ್ವಹಿಸದಂತೆ ತಾಂತ್ರಿಕ ತಡೆ ಒಡ್ಡಬಹುದು. ಪೋಷಕರ ಸಮ್ಮತಿ ಪಡೆಯುವುದು ಮತ್ತೊಂದು ವಿಧಾನ. ಇದರಡಿ, ಒಂದು ವೇಳೆ ಮಗು ಸೋಶಿಯಲ್ ಮೀಡಿಯಾ ಬಳಸಬೇಕೆಂದರೆ, ಪೋಷಕರ ಡಿಜಿಟಲ್ ಸಹಿ ಅಥವಾ ಅವರ ಖಾತೆಯೊಂದಿಗೆ ಲಿಂಕ್ ಮಾಡುವುದನ್ನು ಕಡ್ಡಾಯಗೊಳಿಸಲಾಗುತ್ತದೆ. ಇದರಿಂದ ಪೋಷಕರ ಅನುಮತಿ ಇಲ್ಲದೆ ಆಪ್ ಡೌನ್​ಲೋಡ್ ಮಾಡಲು ಸಾಧ್ಯವಾಗುವುದಿಲ್ಲ. ಇದಲ್ಲದೆ, ಸೋಶಿಯಲ್ ಮೀಡಿಯಾ ಕಂಪನಿಗಳು ತಮ್ಮ ಅಲ್ಗಾರಿದಮ್ಳ ಮೇಲೆ ನಿಗಾ ಇಡುವ ಮೂಲಕವೂ ಬಳಕೆದಾರರ ವಯಸ್ಸನ್ನು ಗುರುತಿಸಬಹುದು. ಬಳಕೆದಾರರ ಪೋಸ್ಟ್ ಮಾಡುವ ಶೈಲಿ ಮತ್ತು ಆಸಕ್ತಿಗಳನ್ನು ಗಮನಿಸಿ ಅವರು ಅಪ್ರಾಪ್ತ ವಯಸ್ಕರೆಂದು ಕಂಡುಬಂದರೆ ಅಂತಹ ಖಾತೆಗಳನ್ನು ತಾನಾಗಿಯೇ ಫ್ಲ್ಯಾಗ್ ಮಾಡುವಂತೆ ನಿಯಮ ರೂಪಿಸಬಹುದು.

ಎಷ್ಟೇ ಕಟ್ಟುನಿಟ್ಟಿನ ಕ್ರಮ ಕೈಗೊಂಡರೂ, ತಾಂತ್ರಿಕವಾಗಿ ಪರಿಣಿತರಾಗಿರುವ ಇಂದಿನ ಮಕ್ಕಳು ಅದನ್ನು ಮೀರಿ ಹೋಗಲು ಹಲವು ದಾರಿಗಳನ್ನು ಕಂಡುಕೊಳ್ಳುವ ಸಾಧ್ಯತೆ ಇದೆ. ಇದರಲ್ಲಿ ವಿಪಿಎನ್ ಬಳಕೆ ಅತ್ಯಂತ ಸಾಮಾನ್ಯ ಮಾರ್ಗ. ತಾವು ಅಮೆರಿಕ ಅಥವಾ ಯುರೋಪ್​ನಂತಹ ಬೇರೆ ದೇಶದಲ್ಲಿದ್ದೇವೆ ಎಂದು ತೋರಿಸಿಕೊಳ್ಳಲು ಮಕ್ಕಳಿಗೆ ವಿಪಿಎನ್ ಸಹಾಯ ಮಾಡುತ್ತದೆ. ಇದರಿಂದ ಸ್ಥಳೀಯವಾಗಿ ಹೇರಲಾದ ತಾಂತ್ರಿಕ ನಿರ್ಬಂಧಗಳು ಕೆಲಸ ಮಾಡುವುದಿಲ್ಲ. ಇದಲ್ಲದೆ, ಹೆಚ್ಚಿನ ಸೋಶಿಯಲ್ ಮೀಡಿಯಾ ಪ್ಲಾಟ್​ಫಾಮರ್​ಗಳು ಹುಟ್ಟಿದ ದಿನಾಂಕವನ್ನು ಮಾತ್ರ ಕೇಳುತ್ತವೆ.

ಅಲ್ಲಿ ಮಕ್ಕಳು ಸುಳ್ಳು ಮಾಹಿತಿಯನ್ನು ನೀಡಿ ಸುಲಭವಾಗಿ ಅಕೌಂಟ್ ತೆರೆಯಬಹುದು. ಸರ್ಕಾರ ಆಧಾರ್ ಅಥವಾ ಬಯೋಮೆಟ್ರಿಕ್ ಲಿಂಕ್ ಮಾಡದ ಹೊರತು ಇದನ್ನು ಪತ್ತೆ ಹಚ್ಚುವುದು ಕಷ್ಟ. ಜತೆಗೆ, ಮಕ್ಕಳು ತಮ್ಮ ಸ್ವಂತ ಫೋನ್ ಅಥವಾ ಸಿಮ್ ಬಳಸುವ ಬದಲು, ಮನೆಯಲ್ಲಿರುವ ಹಿರಿಯರ ಅಥವಾ ಅಕ್ಕ-ಅಣ್ಣಂದಿರ ಫೋನ್ ಬಳಸಬಹುದು. ಆ ಫೋನ್​ಗಳಲ್ಲಿ ಈಗಾಗಲೇ ವಯಸ್ಕರ ಹೆಸರಿನಲ್ಲಿ ಅಕೌಂಟ್​ಗಳು ಇರುವುದರಿಂದ ಯಾವುದೇ ನಿರ್ಬಂಧಗಳು ಅನ್ವಯವಾಗುವುದಿಲ್ಲ. ಗೂಗಲ್ ಪ್ಲೇ ಸ್ಟೋರ್ ಅಥವಾ ಆಪಲ್ ಆಪ್ ಸ್ಟೋರ್​ಗಳಲ್ಲಿ ನಿರ್ಬಂಧವಿದ್ದರೆ, ಮಕ್ಕಳು ಇಂಟರ್ನೆಟ್​ನಲ್ಲಿ ಸಿಗುವ ಇತರ ಅನಧಿಕೃತ ವೆಬ್​ಸೈಟ್​ಗಳ ಮೂಲಕ ಆಪ್​ಗಳನ್ನು ಡೌನ್​ಲೋಡ್ ಮಾಡಿಕೊಳ್ಳಬಹುದು.

ಇವುಗಳನ್ನು ‘ಸೈಡ್​ಲೋಡಿಂಗ್’ ಎಂದು ಕರೆಯಲಾಗುತ್ತದೆ. ಅಪ್ಲಿಕೇಶನ್​ಗಳನ್ನು ಬ್ಯಾನ್ ಮಾಡಿದರೂ, ಕ್ರೋಮ್​ಸಫಾರಿಯಂತಹ ಬ್ರೌಸರ್​ಗಳ ಮೂಲಕ ಸೋಶಿಯಲ್ ಮೀಡಿಯಾ ಸೈಟ್​ಗಳನ್ನು ಪ್ರವೇಶಿಸಬಹುದು. ಅಪ್ಲಿಕೇಶನ್ ನಿರ್ಬಂಧಿಸುವಷ್ಟು ಸುಲಭವಾಗಿ ವೆಬ್​ಸೈಟ್​ಗಳನ್ನು ಪ್ರತಿ ಡಿವೈಸ್​ನಲ್ಲೂ ನಿರ್ಬಂಧಿಸುವುದು ಸವಾಲಿನ ಕೆಲಸ. ಪ್ರಸಿದ್ಧ ಆಪ್​ಗಳ ಮೇಲೆ ಕಣ್ಣಿಟ್ಟಿರುವ ಸರ್ಕಾರಕ್ಕೆ, ದಿನನಿತ್ಯ ಹುಟ್ಟಿಕೊಳ್ಳುವ ಸಣ್ಣ ಪುಟ್ಟ ಅನಾಮಧೇಯ ಆಪ್​ಗಳನ್ನು ನಿಯಂತ್ರಿಸುವುದು ಕಷ್ಟ. ಮಕ್ಕಳು ಇಂತಹ ವೇದಿಕೆಗಳ ಕಡೆಗೆ ಮುಖ ಮಾಡಬಹುದು.

ಬಳಕೆದಾರರು ನೀಡುವ ಜನ್ಮ ದಿನಾಂಕ ಸುಳ್ಳಾಗಿದ್ದರೂ ಅದನ್ನು ಪತ್ತೆ ಹಚ್ಚುವುದು ಕಷ್ಟ. ಆಧಾರ್, ಪಾಸ್​ಪೋರ್ಟ್​ನಂತಹ ದಾಖಲೆ ಗಳನ್ನು ಕೇಳಿದರೆ, ಅದು ಖಾಸಗಿತನಕ್ಕೆ ಧಕ್ಕೆ ತರುತ್ತದೆ ಎಂಬ ಆಕ್ಷೇಪ ಕೇಳಿಬರುತ್ತದೆ. ಮಕ್ಕಳು ತಮ್ಮ ಐಪಿ ಅಡ್ರೆಸ್ ಬದಲಾಯಿಸಲು ವಿಪಿಎನ್ ತಂತ್ರಜ್ಞಾನ ಬಳಸಬಹುದು. ಇದರಿಂದಾಗಿ ಅವರು ಬೇರೆ ದೇಶದ ಬಳಕೆದಾರರಂತೆ ನಟಿಸಿ ನಿರ್ಬಂಧಿತ ಆಪ್​ಗಳನ್ನು ಬಳಸಬಹುದು. ಇದನ್ನು ತಡೆಯುವುದು ಸರ್ಕಾರಗಳಿಗೆ ದೊಡ್ಡ ತಲೆನೋವು. ಫೇಸ್​ಬುಕ್, ಎಕ್ಸ್ನಂತಹ ಕಂಪನಿಗಳು, ಇದು ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ವಿರುದ್ಧ ಮತ್ತು ತಾಂತ್ರಿಕವಾಗಿ ಜಾರಿಗೆ ತರಲು ಅಸಾಧ್ಯ ಎನ್ನುತ್ತಿವೆ. ಕೆಲವೆಡೆ ಕೋರ್ಟ್ ಮೆಟ್ಟಿಲನ್ನೂ ಹತ್ತಿವೆ.

ಮುಖ್ಯವಾಹಿನಿಯ ಆಪ್​ಗಳನ್ನು ಬ್ಯಾನ್ ಮಾಡಿದಾಗ, ಮಕ್ಕಳು ಯಾವುದೇ ನಿಯಂತ್ರಣ ವಿಲ್ಲದ ಸುರಕ್ಷಿತವಲ್ಲದ ಆಪ್​ಗಳ ಕಡೆಗೆ ಆಕರ್ಷಿತರಾಗುವ ಅಪಾಯ ವಿದೆ. ಇತ್ತೀಚಿನ ದಿನಗಳಲ್ಲಿ ಮಕ್ಕಳ ಶಿಕ್ಷಣಕ್ಕೂ ಸೋಶಿಯಲ್ ಮೀಡಿಯಾ ಬಳಕೆಯಾಗುತ್ತದೆ. ಸಂಪೂರ್ಣ ನಿಷೇಧದಿಂದ ಮಕ್ಕಳ ಕಲಿಕೆಗೆ, ಸೃಜನಶೀಲತೆಗೆ ಧಕ್ಕೆಯಾಗಬಹುದು ಎಂಬ ವಾದವೂ ಇದೆ. ಪ್ರತಿಯೊಬ್ಬ ಬಳಕೆದಾರರ ವಯಸ್ಸನ್ನು ಪರಿಶೀಲಿಸಲು ಮತ್ತು ನಿಯಮ ಉಲ್ಲಂಘಿಸುವ ಕಂಪನಿಗಳ ಮೇಲೆ ನಿಗಾ ಇಡಲು ಸರ್ಕಾರಗಳಿಗೆ ಭಾರಿ ಮೊತ್ತದ ಹಣ ಮತ್ತು ಸುಧಾರಿತ ತಂತ್ರಜ್ಞಾನ ಬೇಕಾಗುತ್ತದೆ.

ಸಂಪೂರ್ಣ ನಿಷೇಧಕ್ಕಿಂತ ವಯಸ್ಸಿಗೆ ಅನುಗುಣವಾಗಿ ಹಂತ-ಹಂತವಾಗಿ ನಿರ್ಬಂಧ ಹೇರುವುದು ಒಳ್ಳೆಯದು ಎಂಬುದು ಕೇಂದ್ರ ಸರ್ಕಾರದ ನಿಲುವು. ಇಂದಿನ ಮಕ್ಕಳು ಹೆಚ್ಚು ಡಿಜಿಟಲ್ ಜಾಗೃತಿ ಹೊಂದಿದ್ದಾರೆ, ಹಾಗಾಗಿ ಕಠಿಣ ನಿಷೇಧಕ್ಕಿಂತ ವೈಜ್ಞಾನಿಕ ನಿರ್ಬಂಧಗಳು ಕೆಲಸ ಮಾಡುತ್ತವೆ ಎಂಬ ಭಾವನೆ ಹೊಂದಿರುವ ಕೇಂದ್ರ, 18 ವರ್ಷದೊಳಗಿನವರನ್ನು ಮೂರು ವಿಭಾಗಗಳಾಗಿ ವಿಂಗಡಿಸಿ ನಿಯಮ ರೂಪಿಸಲು ಯೋಜಿಸುತ್ತಿದೆ.

8ರಿಂದ 12 ವರ್ಷದೊಳಗಿನವರಿಗೆ ಅತ್ಯಂತ ಕಟ್ಟುನಿಟ್ಟಿನ ನಿರ್ಬಂಧ ಮತ್ತು ಪೋಷಕರ ಸಂಪೂರ್ಣ ಮೇಲ್ವಿಚಾರಣೆ; 12ರಿಂದ 16 ವರ್ಷದೊಳಗಿನವರಿಗೆ ಸೀಮಿತ ಬಳಕೆ ಮತ್ತು ನಿಯಂತ್ರಿತ ಪ್ರವೇಶ; 16ರಿಂದ 18 ವರ್ಷದೊಳಗಿನವರಿಗೆ ಸ್ವಲ್ಪ ಸಡಿಲಿಕೆ, ಆದರೆ ನಿರಂತರ ನಿಗಾ; ಇದು ಕೇಂದ್ರದ ಯೋಚನೆ. ಕೇಂದ್ರ ಮಾಹಿತಿ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್ ಪ್ರಕಾರ, ಸಾಮಾಜಿಕ ಜಾಲತಾಣಗಳ ಬಳಕೆ ನಿಯಂತ್ರಿಸುವುದಕ್ಕಾಗಿ ಪ್ರತ್ಯೇಕ ಕಾನೂನು ತರಲು ಸರ್ಕಾರ ಸಿದ್ಧತೆ ನಡೆಸುತ್ತಿದೆ.

ಇದನ್ನು ಮುಂಬರುವ ಮಳೆಗಾಲದ ಸಂಸತ್ ಅಧಿವೇಶನದಲ್ಲಿ ಮಂಡಿಸುವ ಸಾಧ್ಯತೆ ಇದೆ. ಆಪ್ ಬಳಸುವುದನ್ನು ತಡೆಯುವುದಷ್ಟೇ ಅಲ್ಲ, ಮಕ್ಕಳು ದಿನಕ್ಕೆ ಇಂತಿಷ್ಟು ಸಮಯ ಮಾತ್ರ ಲಾಗಿನ್ ಆಗುವಂತೆ ಅಥವಾ ರಾತ್ರಿಯ ಸಮಯದಲ್ಲಿ ಸೋಶಿಯಲ್ ಮೀಡಿಯಾ ಲಭ್ಯವಿಲ್ಲದಂತೆ (ನೈಟ್ ಕರ್ಫ್ಯೂ) ಮಾಡುವ ತಾಂತ್ರಿಕ ಬದಲಾವಣೆಗಳ ಬಗ್ಗೆ ಕಂಪನಿಗಳೊಂದಿಗೆ ಕೇಂದ್ರ ಸರ್ಕಾರ ರ್ಚಚಿಸುತ್ತಿದೆ.

ಆಸ್ಟ್ರೇಲಿಯಾ 16 ವರ್ಷದೊಳಗಿನ ಮಕ್ಕಳಿಗೆ ಸೋಶಿಯಲ್ ಮೀಡಿಯಾವನ್ನು ಸಂಪೂರ್ಣವಾಗಿ ನಿಷೇಧಿಸಿದ ಮೊದಲ ದೇಶ. ಅಲ್ಲಿ 2025ರ ಡಿಸೆಂಬರ್​ನಿಂದಲೇ ಇದು ಜಾರಿಗೆ ಬಂದಿದೆ. ಫೇಸ್​ಬುಕ್, ಇನ್​ಸ್ಟಾಗ್ರಾಂ, ಟಿಕ್​ಟಾಕ್​ನಂತಹ ವೇದಿಕೆಗಳು 16 ವರ್ಷದೊಳಗಿನವರ ಖಾತೆಗಳನ್ನು ಡಿಲೀಟ್ ಮಾಡುವುದು ಕಡ್ಡಾಯ. ಇಂಡೋನೇಷ್ಯಾ ಕೂಡ ಇತ್ತೀಚೆಗೆ ಇಂತಹುದೇ ನಿರ್ಧಾರ ಕೈಗೊಂಡಿದೆ. ಅಲ್ಲಿ ಇದೇ ತಿಂಗಳ 28ರಿಂದ ಈ ನಿಯಮ ಜಾರಿಯಾಗಲಿದೆ. ಮಕ್ಕಳು ಬಳಸುವ ಹೈರಿಸ್ಕ್ ಡಿಜಿಟಲ್ ಪ್ಲಾಟ್​ಫಾಮ್ರ್ ಗಳ ಖಾತೆಗಳು ರದ್ದಾಗಲಿವೆ. ಫ್ರಾನ್ಸ್ ಸರ್ಕಾರ 15 ವರ್ಷದೊಳಗಿನ ಮಕ್ಕಳಿಗೆ ಸೋಶಿಯಲ್ ಮೀಡಿಯಾ ಬಳಸಲು ಪೋಷಕರ ಅನುಮತಿ ಕಡ್ಡಾಯಗೊಳಿಸುವ ಅಥವಾ ಸಂಪೂರ್ಣ ನಿಷೇಧ ಹೇರುವ ಕಾನೂನನ್ನು ಸಿದ್ಧಪಡಿಸಿದೆ.

ಇದೇ ಸೆಪ್ಟೆಂಬರ್​ನಿಂದ ಇದು ಪೂರ್ಣಪ್ರಮಾಣದಲ್ಲಿ ಜಾರಿಯಾಗುವ ನಿರೀಕ್ಷೆಯಿದೆ. ಮಲೇಷ್ಯಾ ಕೂಡ ಘೊಷಣೆ ಮಾಡಿದ್ದು, ವರ್ಷಾಂತ್ಯದೊಳಗೆ ಜಾರಿಗೆ ತರಲು ಯೋಜಿಸಿದೆ. ಡೆನ್ಮಾರ್ಕ್​ನಲ್ಲಿ ಈ ನಿಯಮ ಜೂನ್ ವೇಳೆಗೆ ಜಾರಿಯಾಗಬಹುದು. ಗ್ರೀಸ್ ಮತ್ತು ಸ್ಪೇನ್​ನಲ್ಲಿ ಈ ಕುರಿತ ಚರ್ಚೆ ಅಂತಿಮ ಹಂತದಲ್ಲಿದೆ. ಪೋರ್ಚುಗಲ್ 16 ವರ್ಷದೊಳಗಿನ ಮಕ್ಕಳಿಗೆ ಪೋಷಕರ ಅನುಮತಿ ಕಡ್ಡಾಯಗೊಳಿಸಿದ್ದು, 13 ವರ್ಷದೊಳಗಿನ ಮಕ್ಕಳಿಗೆ ಸಂಪೂರ್ಣ ನಿಷೇಧ ಹೇರಿದೆ. ಅಮೆರಿಕದಲ್ಲಿ ರಾಷ್ಟ್ರಮಟ್ಟದ ನಿಷೇಧವಿಲ್ಲದಿದ್ದರೂ, ಫ್ಲೋರಿಡಾ, ಓಹಿಯೋ, ಉತಾಹ್​ನಂತಹ ರಾಜ್ಯಗಳು 14ರಿಂದ 16 ವರ್ಷದೊಳಗಿನ ಮಕ್ಕಳಿಗೆ ಸಾಮಾಜಿಕ ಜಾಲತಾಣಗಳ ಬಳಕೆಯ ಮೇಲೆ ಕಟ್ಟುನಿಟ್ಟಿನ ನಿರ್ಬಂಧ ಹೇರಿವೆ. ಭಾರತದಲ್ಲಿ, ಆಂಧ್ರಪ್ರದೇಶ ಸರ್ಕಾರ 13 ವರ್ಷದೊಳಗಿನ ಮಕ್ಕಳಿಗೆ ನಿರ್ಬಂಧಿಸಲು ಮುಂದಿನ 90 ದಿನಗಳೊಳಗೆ ಮಾರ್ಗಸೂಚಿ ಹೊರತರುವುದಾಗಿ ತಿಳಿಸಿದೆ. ಗೋವಾ ಸರ್ಕಾರವೂ ಈ ಬಗ್ಗೆ ಪ್ರಾಥಮಿಕ ಹಂತದ ಚರ್ಚೆ ನಡೆಸುತ್ತಿದೆ.