ತಿಂಗಳ ಸಂಬಳದ ಜತೆಗೆ ಟೀ, ಬ್ರೇಕ್​ಫಾಸ್ಟ್​ ಫ್ರೀ... ಯುವಜನತೆಗೆ ರೈತ ಮಹಿಳೆಯಿಂದ ಡಿಫರೆಂಟ್ ಜಾಬ್ ಆಫರ್! Farmer Job Offer

Farmer Job Offer : ಕೃತಕ ಬುದ್ಧಿಮತ್ತೆಯ (AI) ಇಂದಿನ ಆಧುನಿಕ ಯುಗದಲ್ಲಿ ಖಾಸಗಿ ಹಾಗೂ ಐಟಿ ವಲಯದಲ್ಲೂ ಉದ್ಯೋಗ ಗಿಟ್ಟಿಸಿಕೊಳ್ಳುವುದು ಯುವಜನತೆಗೆ ಬಹುದೊಡ್ಡ ಸವಾಲಾಗಿ ಪರಿಣಮಿಸಿದೆ. ತಂತ್ರಜ್ಞಾನ ಮುಂದುವರಿದಂತೆ ಉದ್ಯೋಗ ನಷ್ಟದ ಭೀತಿ ಹೆಚ್ಚಾಗುತ್ತಿದ್ದು, ಡಿಗ್ರಿ, ಪಿಜಿ ಮುಗಿಸಿದ ಯುವಕರು ತಮಗೆ ಸಿಗುವ ಸಣ್ಣಪುಟ್ಟ ಕೆಲಸಗಳಿಗಾಗಿ ಕ್ಯೂ ನಿಲ್ಲುವಂತಾಗಿದೆ.

ಕಂಪ್ಯೂಟರ್ ಮುಂದೆ ಗಂಟೆಗಟ್ಟಲೆ ಕೂತು ಒತ್ತಡದ ಜೀವನ ನಡೆಸುವ ಬದಲು, ಪ್ರಕೃತಿಯ ಮಡಿಲಿನಲ್ಲಿ ನೆಮ್ಮದಿಯಿಂದ ಕಾಲ ಕಳೆಯುವುದು ಮೇಲು ಎಂಬ ಭಾವನೆ ಇತ್ತೀಚಿನ ದಿನಗಳಲ್ಲಿ ಯುವಪೀಳಿಗೆಯಲ್ಲಿ ಹೆಚ್ಚಾಗುತ್ತಿದೆ. ಇದಕ್ಕೆ ಪೂರಕವೆಂಬಂತೆ, ಆಂಧ್ರಪ್ರದೇಶದ ಚಿತ್ತೂರು ಜಿಲ್ಲೆಯ ರೈತ ಮಹಿಳೆಯೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ವಿಭಿನ್ನ ಹಾಗೂ ಆಕರ್ಷಕ ಜಾಬ್ ಆಫರ್ ಈಗ ಎಲ್ಲರ ಗಮನ ಸೆಳೆಯುತ್ತಿದ್ದು, ಭಾರಿ ಸದ್ದು ಮಾಡುತ್ತಿದೆ.

ಚಿತ್ತೂರು ಜಿಲ್ಲೆಯ ಮಹಿಳಾ ರೈತರೊಬ್ಬರು ತಮ್ಮ ತೋಟದಲ್ಲಿ ಕೆಲಸ ಮಾಡಲು ಆಸಕ್ತಿ ಹೊಂದಿರುವ ಅಭ್ಯರ್ಥಿಗಳಿಗೆ ಆಕರ್ಷಕ ಜಾಹೀರಾತನ್ನು ಹೊರಡಿಸಿದ್ದಾರೆ. ಇಲ್ಲಿ ಕೆಲಸದ ಅವಧಿ ಪ್ರತಿದಿನ ಬೆಳಗ್ಗೆ 6 ರಿಂದ ಮಧ್ಯಾಹ್ನ 2 ಗಂಟೆಯವರೆಗೆ ಮಾತ್ರ ಇರಲಿದ್ದು, ಆಯ್ಕೆಯಾದ ಅಭ್ಯರ್ಥಿಗಳಿಗೆ ಮೊದಲ ಒಂದು ತಿಂಗಳ ಕಾಲ ಉಚಿತ ತರಬೇತಿ ನೀಡಲಾಗುತ್ತದೆ. ತರಬೇತಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದವರಿಗೆ ಪ್ರತಿ ತಿಂಗಳು 12,000 ರೂಪಾಯಿ ಸಂಬಳದೊಂದಿಗೆ ಹೆಚ್ಚುವರಿ ಪ್ರೋತ್ಸಾಹ ಧನವನ್ನು ನೀಡಲಾಗುವುದು ಎಂದು ಅವರು ಪ್ರಕಟಿಸಿದ್ದಾರೆ.

ಈ ಉದ್ಯೋಗದ ಪ್ರಮುಖ ಜವಾಬ್ದಾರಿಗಳೆಂದರೆ, ತೋಟದಲ್ಲಿ ಟೊಮ್ಯಾಟೋ ಸಸಿಗಳನ್ನು ನೆಡುವುದು, ಅವು ಕೆಳಗೆ ಬೀಳದಂತೆ ಜಾಗರೂಕತೆಯಿಂದ ಪೋಷಿಸುವುದು ಮತ್ತು ಚೆನ್ನಾಗಿ ಹಣ್ಣಾದ ಟೊಮ್ಯಾಟೋಗಳನ್ನು ಕೊಯ್ಲು ಮಾಡುವುದಾಗಿದೆ. ಇದರ ಜೊತೆಗೆ, ಕೆಲಸಕ್ಕೆ ಬರುವವರಿಗೆ ಪ್ರತಿದಿನ ಬೆಳಗ್ಗೆ ಉಚಿತವಾಗಿ ಚಹಾ ಮತ್ತು ತಿಂಡಿಯ ವ್ಯವಸ್ಥೆಯನ್ನು ಮಾಡಲಾಗುತ್ತದೆ. ಅಷ್ಟೇ ಅಲ್ಲದೆ, ಕೆಲಸ ಮುಗಿಸಿ ಸಂಜೆ ಮನೆಗೆ ಹಿಂದಿರುಗುವಾಗ ತೋಟದಲ್ಲಿ ಬೆಳೆದ ತಾಜಾ ತರಕಾರಿಗಳನ್ನು ಉಚಿತವಾಗಿ ಮನೆಗೆ ಕೊಂಡೊಯ್ಯುವ ಅದ್ಭುತ ಸೌಲಭ್ಯವನ್ನೂ ಸಹ ಈ ರೈತ ಮಹಿಳೆ ಕಲ್ಪಿಸಿಕೊಟ್ಟಿದ್ದಾರೆ.

ಸಾಫ್ಟ್​ವೇರ್ ಉದ್ಯೋಗಗಳ ಅತಿಯಾದ ಒತ್ತಡದಿಂದ ಬೇಸತ್ತಿರುವ ಅನೇಕ ನೆಟ್ಟಿಗರು ಈ ಆಫರ್‌ಗೆ ಅತ್ಯಂತ ಸಕಾರಾತ್ಮಕವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. ಕೃತಕ ಬುದ್ಧಿಮತ್ತೆಯು ಸಾಫ್ಟ್‌ವೇರ್ ಕ್ಷೇತ್ರಕ್ಕೆ ಲಗ್ಗೆ ಇಟ್ಟು ಉದ್ಯೋಗಗಳನ್ನು ಕಸಿದುಕೊಳ್ಳಬಹುದಾದರೂ, ಮಣ್ಣನ್ನೇ ನಂಬಿದ ಕೃಷಿ ವಲಯದಲ್ಲಿ ಮಾನವ ಶ್ರಮಕ್ಕೆ ಎಂದಿಗೂ ಕೊರತೆಯಾಗುವುದಿಲ್ಲ ಎಂಬುದನ್ನು ಈ ಘಟನೆ ಸಾಬೀತುಪಡಿಸಿದೆ.

ಕಾರ್ಪೊರೇಟ್ ಕಂಪನಿಗಳ ನೆಮ್ಮದಿಯಿಲ್ಲದ ಜೀವನಕ್ಕೆ ಹೋಲಿಸಿದರೆ, ಇಂತಹ ಹಸಿರು ತೋಟದಲ್ಲಿ ಪ್ರಶಾಂತವಾಗಿ ಕೆಲಸ ಮಾಡುವುದು ಸಾವಿರ ಪಟ್ಟು ಮೇಲು ಎಂದು ಹೇಳುತ್ತಿರುವ ಹಲವು ಐಟಿ ಉದ್ಯೋಗಿಗಳು ಹಾಗೂ ಯುವಕರು ಈ ಕೃಷಿ ಕೆಲಸಕ್ಕೆ ಸೇರಿಕೊಳ್ಳಲು ತೀವ್ರ ಉತ್ಸುಕತೆ ತೋರಿಸುತ್ತಿದ್ದಾರೆ, (ಏಜೆನ್ಸೀಸ್​).