ಸುಲಿಗೆ ಪ್ರಕರಣ: ನೇಪಾಳ ಗಡಿಯಲ್ಲಿ ಸಿಕ್ಕಿಬಿದ್ದ ಟಿಎಂಸಿ ಮುಖಂಡ ಜಹಾಂಗೀರ್ ಖಾನ್‌ಗೆ 5 ದಿನಗಳ ಪೊಲೀಸ್ ಕಸ್ಟಡಿ! Jahangir Khan Arrest

ದಕ್ಷಿಣ 24 ಪರಗಣ ಜಿಲ್ಲೆಯ ಫಾಲ್ಟಾ ಪೊಲೀಸ್ ಠಾಣೆಯಲ್ಲಿ ಜಹಾಂಗೀರ್ ಖಾನ್ ವಿರುದ್ಧ ಹಣ ವಸೂಲಿ ಮತ್ತು ದೌರ್ಜನ್ಯಕ್ಕೆ ಸಂಬಂಧಿಸಿದಂತೆ ಒಟ್ಟು 7 ಎಫ್‌ಐಆರ್‌ಗಳು ದಾಖಲಾಗಿದ್ದವು. ಈ ಹಿಂದೆ ಕಲ್ಕತ್ತಾ ಹೈಕೋರ್ಟ್ ಆತನಿಗೆ ನೀಡಿದ್ದ ಮಧ್ಯಂತರ ಬಂಧನ ತಡೆ ರಕ್ಷಣೆಯನ್ನು ಮೇ 26 ರಂದು ರದ್ದುಗೊಳಿಸಿತ್ತು. ಕೋರ್ಟ್ ರಕ್ಷಣೆ ತೆರವಾಗುತ್ತಿದ್ದಂತೆ ಬಂಧನದ ಭೀತಿಯಲ್ಲಿದ್ದ ಜಹಾಂಗೀರ್ ಖಾನ್, ದೇಶ ಬಿಟ್ಟು ನೇಪಾಳಕ್ಕೆ ಓಡಿಹೋಗಲು ಯತ್ನಿಸುತ್ತಿದ್ದಾಗ ಗಡಿ ಪ್ರದೇಶದಲ್ಲಿ ಪೊಲೀಸರ ಬಲೆಗೆ ಬಿದ್ದಿದ್ದಾನೆ. ಈ ಕಾರ್ಯಾಚರಣೆಯ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಲು ಪೊಲೀಸರು ನಿರಾಕರಿಸಿದ್ದಾರೆ. ಐದು ದಿನಗಳ ಕಸ್ಟಡಿ ಅವಧಿ ಮುಗಿದ ನಂತರ ಆತನನ್ನು ಮತ್ತೊಮ್ಮೆ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜಹಾಂಗೀರ್ ಖಾನ್ ಅರೆಸ್ಟ್ ಆದ ಸುದ್ದಿ ಹರಡುತ್ತಿದ್ದಂತೆ, ಫಾಲ್ಟಾ ಎಂಬಲ್ಲಿರುವ ಆತನ ಕಚೇರಿಯ ಮೇಲೆ ಸ್ಥಳೀಯ ನಾಗರಿಕರು ಮುಗಿಬಿದ್ದಿದ್ದಾರೆ. ತೀವ್ರ ಆಕ್ರೋಶಗೊಂಡಿದ್ದ ನೂರಾರು ಜನರ ಗುಂಪು ಕಚೇರಿಯ ಕಿಟಕಿ ಗ್ಲಾಸ್‌ಗಳು ಮತ್ತು ಪೀಠೋಪಕರಣಗಳನ್ನು ಪುಡಿಪುಡಿ ಮಾಡಿ ಧ್ವಂಸಗೊಳಿಸಿದೆ.

ಇದೇ ವೇಳೆ ಕಚೇರಿಯ ಒಳಗಡೆ ದೊಡ್ಡ ಪ್ರಮಾಣದ ತುರ್ತು ಪರಿಹಾರ ಸಾಮಗ್ರಿಗಳ ಪ್ಯಾಕೆಟ್‌ಗಳು ಪತ್ತೆಯಾಗಿರುವುದು ಸಾರ್ವಜನಿಕರ ಕೋಪವನ್ನು ಮತ್ತಷ್ಟು ಹೆಚ್ಚಿಸಿದೆ. ಬಡವರಿಗೆ ಮತ್ತು ನಿರ್ಗತಿಕರಿಗೆ ವಿತರಿಸಬೇಕಾಗಿದ್ದ ಸರ್ಕಾರಿ ಪರಿಹಾರ ಸಾಮಗ್ರಿಗಳನ್ನು ಜಹಾಂಗೀರ್ ಖಾನ್ ಕಚೇರಿಯಲ್ಲಿ ಬಚ್ಚಿಟ್ಟುಕೊಂಡಿದ್ದ ಎಂದು ಜನ ಆಪಾದಿಸಿದ್ದಾರೆ. ಕಚೇರಿ ಧ್ವಂಸ ಹಾಗೂ ಪರಿಹಾರ ಸಾಮಗ್ರಿ ಪತ್ತೆಯಾಗಿರುವ ಘಟನೆಯ ಕುರಿತು ಪ್ರತ್ಯೇಕ ತನಿಖೆ ಆರಂಭಿಸುವುದಾಗಿ ಪೊಲೀಸ್ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ರಾಜಕೀಯವಾಗಿಯೂ ಜಹಾಂಗೀರ್ ಖಾನ್ ತೀವ್ರ ಹಿನ್ನಡೆ ಅನುಭವಿಸಿದ್ದಾನೆ. ಕಳೆದ ತಿಂಗಳು ನಡೆದ ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಯಲ್ಲಿ ಫಾಲ್ಟಾ ಕ್ಷೇತ್ರದಿಂದ ಈತ ಟಿಎಂಸಿ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ. ಆದರೆ, ಮೇ 21 ರಂದು ನಡೆದ ಮರುಮತದಾನಕ್ಕೂ ಮುನ್ನವೇ ಆತ ರಹಸ್ಯವಾಗಿ ಚುನಾವಣಾ ಕಣದಿಂದ ಹಿಂದೆ ಸರಿದಿದ್ದ. ಇದನ್ನು ಟಿಎಂಸಿ ಪಕ್ಷವು ದ್ರೋಹ ಎಂದು ಕರೆದಿದ್ದರೆ, ಬಿಜೆಪಿ ನಾಯಕರು ಆತನನ್ನು ರಂಗು ಬಿಟ್ಟು ಓಡಿದ ನಾಯಕ ಎಂದು ಲೇವಡಿ ಮಾಡಿದ್ದರು.

ಬಳಿಕ ನಡೆದ ಮರುಚುನಾವಣೆಯಲ್ಲಿ ಬಿಜೆಪಿಯ ದೇಬಾಂಶು ಪಾಂಡಾ ಅವರು ಸಿಪಿಐ(ಎಂ) ಅಭ್ಯರ್ಥಿ ಶಂಭು ನಾಥ್ ಕುರ್ಮಿ ವಿರುದ್ಧ 1,09,021 ಮತಗಳ ಭರ್ಜರಿ ಅಂತರದಿಂದ ಗೆಲುವು ಸಾಧಿಸಿದ್ದರು. ಚುನಾವಣೆಯಿಂದ ಪಲಾಯನ ಮಾಡಿದ್ದ ಜಹಾಂಗೀರ್ ಖಾನ್ ಕೇವಲ 7,783 ಮತಗಳನ್ನು ಪಡೆದು ಕೇವಲ ನಾಲ್ಕನೇ ಸ್ಥಾನಕ್ಕೆ ತಳ್ಳಲ್ಪಟ್ಟಿದ್ದ. ಸದ್ಯ ಈತನ ಬಂಧನ ಬಂಗಾಳ ರಾಜಕಾರಣದಲ್ಲಿ ತೀವ್ರ ಸಂಚಲನ ಮೂಡಿಸಿದೆ,(ಏಜೆನ್ಸೀಸ್​).