ಎಕ್ಸಿಟ್​ ಪೋಲ್​ಗಳಿರೋದು ಟಿವಿ ಡಿಬೆಟ್​​ಗಾಗಿ; ಅಸ್ಸಾಂನಲ್ಲಿ ಮತ್ತೆ ಬಿಜೆಪಿ ಗೆಲುವು ಎಂಬುದನ್ನು ತಿರಸ್ಕರಿಸಿದ ಗೌರವ್ ಗೊಗೊಯ್ | Gaurav Gogoi

ಗುವಾಹಟಿ: ಅಸ್ಸಾಂ ವಿಧಾನಸಭೆ ಚುನಾವಣೆ ಮುಗಿದಿದ್ದು ಸೋಮವಾರ(ಮೇ 04) ಫಲಿತಾಂಶ ಪ್ರಕಟವಾಗಲಿದೆ. ಅದಕ್ಕೂ ಮುನ್ನ ರಾಜ್ಯದಲ್ಲಿ ಬಿಜೆಪಿ ಮತ್ತೊಮ್ಮೆ ಅಧಿಕಾರಕ್ಕೆ ಬರುತ್ತದೆ ಎಂಬ ಚುನಾವಣೋತ್ತರ ಸಮೀಕ್ಷೆಯನ್ನು ಅಲ್ಲಗೆಳೆದಿರುವ ಕಾಂಗ್ರೆಸ್ ರಾಜ್ಯಾಧ್ಯಕ್ಷ ಗೌರವ್ ಗೊಗೊಯ್, ಎಕ್ಸಿಟ್ ಪೋಲ್​ಗಳಿಗೆ ಟಿವಿ ಡಿಬೆಟ್​​ಗಳಿಗಾಗಿ ಎಂದು ವ್ಯಂಗ್ಯವಾಡಿದ್ದಾರೆ.

ಈ ಕುರಿತು ಎನ್​ಡಿಟಿವಿ ಜೊತೆ ಮಾತನಾಡಿರುವ ಅವರು, ಎಕ್ಸಿಟ್ ಪೋಲ್‌ಗಳು ಮುಖ್ಯವಾಗಿ ಟಿವಿ ಡಿಬೆಟ್​ಗಳಿಗೆ ಬೇಕಾಗಿವೆ. ನಮಗೆ ಮುಖ್ಯವಾದುದು ಅಸ್ಸಾಂನ ಜನರು ಇವಿಎಂಗಳ ಮೂಲಕ ನೀಡುವ ತೀರ್ಪು. ನಿಜವಾದ ಫಲಿತಾಂಶ ಮೇ 4 ರಂದು ಬಹಿರಂಗಗೊಳ್ಳಲಿದೆ. ನಮಗೆ ಅತ್ಯಂತ ವಿಶ್ವಾಸವಿದೆ ನಾವು ಗೆಲ್ಲುತ್ತೇವೆ ಎಂದು ಹೇಳಿದ್ದಾರೆ.

ಪಶ್ಚಿಮ ಬಂಗಾಳದಲ್ಲಿನ ಇವಿಎಂ ಭದ್ರತಾ ಕೊಠಡಿಗಳು ಮತ್ತು ಟಿಎಂಸಿ ಕಳವಳದ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಅಸ್ಸಾಂನಲ್ಲಿಯೂ ಸಹ, ನಮ್ಮ ಅಭ್ಯರ್ಥಿಗಳಿಂದ ನಮಗೆ ಹಲವಾರು ದೂರುಗಳು ಬಂದಿವೆ. ಈ ಸಮಸ್ಯೆಗಳು ಗಂಭೀರ ಕಳವಳಗಳನ್ನು ಹುಟ್ಟುಹಾಕಿವೆ. ನಾವು ಎಲ್ಲವನ್ನೂ ದಾಖಲಿಸಿದ್ದೇವೆ. ಸೂಕ್ತ ವೇದಿಕೆ ಮುಂದೆ ಈ ವಿಷಯವನ್ನು ಪ್ರಸ್ತಾಪಿಸುತ್ತೇವೆ ಎಂದಿದ್ದಾರೆ.

ಈ ಬಾರಿ ಅಸ್ಸಾಂ ಜನರು ಬದಲಾವಣೆಗೆ ಮತ ಹಾಕಿದ್ದು, ಅಸ್ಸಾಂ ಒಂದು ಅದ್ಭುತ ತೀರ್ಪು ನೀಡಲಿದೆ. ಬಿಜೆಪಿ ಅದನ್ನು ಅರಿತುಕೊಂಡಿಲ್ಲದಿರಬಹುದು, ಆದರೆ ಈ ಬಾರಿ ಅಸ್ಸಾಂನ ಜನರು ಪರಿವರ್ತನೆಗಾಗಿ ಬಲವಾಗಿ ಮತ್ತು ಮೌನವಾಗಿ ಮತ ಚಲಾಯಿಸಿದ್ದಾರೆ ಎಂದು ತಿಳಿಸಿದ್ದಾರೆ (ಏಜೆನ್ಸೀಸ್).