ಗ್ರಾಹಕರು ಕೇಳುವ ಅಗತ್ಯವಿಲ್ಲ, ಇನ್ಮುಂದೆ ಮೊಟ್ಟೆನೇ ಹೇಳುತ್ತೆ ತನ್ನ ಅಂತಿಮ ದಿನಾಂಕ! Egg Expiry Date

ಗ್ರಾಹಕರನ್ನು ತಲುಪುವ ಮೊಟ್ಟೆಗಳು ಬಿಳಿ ಚಿಪ್ಪನ್ನು ಹೊಂದಿರುವುದರಿಂದ ಕೋಳಿ ಯಾವಾಗ ಮೊಟ್ಟೆ ಇಟ್ಟಿತು ಮತ್ತು ಅದು ಎಷ್ಟು ಸಮಯದವರೆಗೆ ತಾಜಾವಾಗಿರುತ್ತದೆ ಎಂಬುದನ್ನು ತಿಳಿಸುವ ಸಲುವಾಗಿ ಸರ್ಕಾರ ಈ ನಿಯಮವನ್ನು ಜಾರಿಗೊಳಿಸಿದೆ. ಆದಾಗ್ಯೂ, ಈ ನಿಯಮವನ್ನು ಯಾವುದೇ ವ್ಯಾಪಾರಿಗಳು ಅಥವಾ ರೈತರು ಉಲ್ಲಂಘಿಸಿದಲ್ಲಿ ಅವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಸರ್ಕಾರ ಎಚ್ಚರಿಕೆ ನೀಡಿದೆ. 

ಮಾಹಿತಿಯ ಪ್ರಕಾರ, ಮೊಟ್ಟೆಗಳನ್ನು ಕೋಣೆಯ ಉಷ್ಣಾಂಶದಲ್ಲಿ, ಸುಮಾರು 30 ಡಿ.ಸೆನಲ್ಲಿಟ್ಟರೆ ಸುಮಾರು ಎರಡು ವಾರಗಳವರೆಗೆ ಸುರಕ್ಷಿತವಾಗಿ ಸಂಗ್ರಹಿಸಬಹುದು. ಹಾಗೆಯೇ 2 ರಿಂದ 8 ಡಿಗ್ರಿ ಸೆಲ್ಸಿಯಸ್‌ನಲ್ಲಿಟ್ಟರೆ 5 ವಾರಗಳವರೆಗೆ ಬಳಸಬಹುದು. ಆದಾಗ್ಯೂ, ಈ ಕಾನೂನನ್ನು ಜಾರಿಗೊಳಿಸುವುದರಿಂದ ಗ್ರಾಹಕರಿಗೆ ಹೆಚ್ಚಿನ ಪ್ರಯೋಜನವಾಗುತ್ತದೆ ಎಂಬುದು ಸರ್ಕಾರದ ಉದ್ದೇಶವಾಗಿದೆ.

ಉತ್ತರ ಪ್ರದೇಶದಲ್ಲಿ ಸಾವಿರಾರು ಕೋಲ್ಡ್ ಸ್ಟೋರೇಜ್ ಘಟಕಗಳಿದ್ದರೂ, ಮೊಟ್ಟೆಗಳ ಸಂಗ್ರಹಣೆಗೆ ಮೀಸಲಾಗಿರುವುದು ಕೇವಲ ಎರಡು ಘಟಕಗಳು. ಒಂದು ಆಗ್ರಾದಲ್ಲಿ ಮತ್ತು ಮತ್ತೊಂದು ಝಾನ್ಸಿಯಲ್ಲಿದೆ. ಆಹಾರ ಸುರಕ್ಷತಾ ನಿಯಮಗಳ ಪ್ರಕಾರ, ಮೊಟ್ಟೆಯನ್ನು ತರಕಾರಿಗಳಂತೆ ಅದೇ ಶೀತಲೀಕರಣ ಘಟಕದಲ್ಲಿ ಸಂಗ್ರಹಿಸಲಾಗುವುದಿಲ್ಲ.

ಏಕೆಂದರೆ,  ಮೊಟ್ಟೆಗಳು ತರಕಾರಿಗಳ ವಾಸನೆಯನ್ನು ಬೇಗನೆ ಹೀರಿಕೊಳ್ಳುತ್ತವೆ ಮತ್ತು ತರಕಾರಿಗಳ ಮೇಲಿರುವ ಬ್ಯಾಕ್ಟೀರಿಯಾಗಳು ಮೊಟ್ಟೆಯ ಚಿಪ್ಪಿನ ಮೂಲಕ ಒಳಗೆ ಸೇರುವ ಅಪಾಯವಿರುತ್ತದೆ.

ಇಂದಿನ ಮಾರುಕಟ್ಟೆಯಲ್ಲಿ ಗ್ರಾಹಕರಿಗೆ ತಾವು ಖರೀದಿಸುವ ಆಹಾರದ ಗುಣಮಟ್ಟದ ಬಗ್ಗೆ ಸಂಪೂರ್ಣ ಮಾಹಿತಿ ಪಡೆಯುವ ಹಕ್ಕಿದೆ. ಆದರೆ, ಮೊಟ್ಟೆಗಳ ವಿಷಯಕ್ಕೆ ಬಂದರೆ ಇದುವರೆಗೆ ಪಾರದರ್ಶಕತೆ ಇರಲಿಲ್ಲ. 

ಈ ಕುರಿತು ಮಾತನಾಡಿದ ಪಶುಸಂಗೋಪನಾ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಮುಖೇಶ್ ಮಿಶ್ರಾ, ಅನೇಕ ಸಂದರ್ಭಗಳಲ್ಲಿ ನಿಯಮಗಳನ್ನು ಗಾಳಿಗೆ ತೂರಿ ಗ್ರಾಹಕರಿಗೆ ಮಾಹಿತಿ ನಿರಾಕರಿಸಲಾಗುತ್ತಿದೆ. ಇದನ್ನು ಸರಿಪಡಿಸಲು ನಾವು ಈ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದೇವೆ ಎಂದು ತಿಳಿಸಿದ್ದಾರೆ (ಏಜೆನ್ಸೀಸ್​).