EPF ಖಾತೆದಾರರಿಗೆ ಗುಡ್ ನ್ಯೂಸ್‌: 8.25% ಬಡ್ಡಿಗೆ ಸರ್ಕಾರ ಗ್ರೀನ್ ಸಿಗ್ನಲ್, ಈ ತಿಂಗಳಲ್ಲೇ ಹಣ ಜಮಾ!

ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ಪ್ರತಿ ವರ್ಷ EPF ಖಾತೆಗಳಿಗೆ ನೀಡಬೇಕಾದ ಬಡ್ಡಿದರವನ್ನು ನಿಗದಿಪಡಿಸುತ್ತದೆ. ಆದರೆ ಅದು ಜಾರಿಗೆ ಬರಲು ಕೇಂದ್ರ ಹಣಕಾಸು ಸಚಿವಾಲಯದ ಅಂತಿಮ ಒಪ್ಪಿಗೆ ಅಗತ್ಯವಾಗಿರುತ್ತದೆ. ಇದೀಗ ಹಣಕಾಸು ಸಚಿವಾಲಯವು 2025-26ನೇ ಸಾಲಿನ 8.25 ಶೇಕಡಾ ಬಡ್ಡಿದರಕ್ಕೆ ಸಮ್ಮತಿ ಸೂಚಿಸಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಮೂಲಗಳ ಪ್ರಕಾರ, 2026ರ ಮಾರ್ಚ್ 2ರಂದು ನಡೆದ EPFO ಕೇಂದ್ರ ಟ್ರಸ್ಟಿಗಳ ಮಂಡಳಿ (CBT) ಸಭೆಯಲ್ಲಿ 8.25 ಶೇಕಡಾ ಬಡ್ಡಿದರ ಮುಂದುವರಿಸುವ ನಿರ್ಧಾರ ಕೈಗೊಳ್ಳಲಾಗಿತ್ತು. ಕೇಂದ್ರ ಕಾರ್ಮಿಕ ಸಚಿವ ಮನ್ಸುಖ್ ಮಾಂಡವಿಯಾ ಅಧ್ಯಕ್ಷತೆಯಲ್ಲಿ ನಡೆದ ಈ ಸಭೆಯಲ್ಲಿ ಈ ತೀರ್ಮಾನಕ್ಕೆ ಒಪ್ಪಿಗೆ ದೊರೆತಿತ್ತು. ನಂತರ ಈ ಪ್ರಸ್ತಾವನೆಯನ್ನು ಹಣಕಾಸು ಸಚಿವಾಲಯಕ್ಕೆ ಕಳುಹಿಸಲಾಗಿತ್ತು. ಇದೀಗ ಸಚಿವಾಲಯವು ಪರಿಶೀಲನೆ ನಡೆಸಿ ಅಧಿಕೃತ ಅನುಮೋದನೆ ನೀಡಿದೆ. ಹೀಗಾಗಿ ಕಾರ್ಮಿಕ ಸಚಿವಾಲಯದ ನಿರ್ದೇಶನದಂತೆ EPFO ಶೀಘ್ರದಲ್ಲೇ ಸದಸ್ಯರ ಖಾತೆಗಳಿಗೆ ಬಡ್ಡಿ ಹಣ ಜಮಾ ಮಾಡುವ ಪ್ರಕ್ರಿಯೆ ಆರಂಭಿಸಲಿದೆ.

ಗಮನಾರ್ಹ ಸಂಗತಿ ಏನೆಂದರೆ, ಇದು ಸತತ ಮೂರನೇ ವರ್ಷವೂ 8.25 ಶೇಕಡಾ ಬಡ್ಡಿದರವನ್ನು ಮುಂದುವರಿಸಿರುವುದಾಗಿದೆ. 2023-24 ಮತ್ತು 2024-25 ಹಣಕಾಸು ವರ್ಷಗಳಲ್ಲಿಯೂ ಇದೇ ಪ್ರಮಾಣದ ಬಡ್ಡಿದರ ನೀಡಲಾಗಿತ್ತು.ಕಳೆದ ಕೆಲವು ವರ್ಷಗಳಲ್ಲಿ EPF ಬಡ್ಡಿದರದಲ್ಲಿ ಹಲವು ಬದಲಾವಣೆಗಳು ನಡೆದಿವೆ. 2023-24ರಲ್ಲಿ ಬಡ್ಡಿದರವನ್ನು 8.15 ಶೇಕಡಾದಿಂದ 8.25 ಶೇಕಡೆಗೆ ಹೆಚ್ಚಿಸಲಾಗಿತ್ತು. ಆದರೆ 2021-22ರಲ್ಲಿ ಬಡ್ಡಿದರವನ್ನು 8.10 ಶೇಕಡೆಗೆ ಇಳಿಸಲಾಗಿತ್ತು. ಇದು ನಾಲ್ಕು ದಶಕಗಳಲ್ಲೇ ಅತ್ಯಂತ ಕಡಿಮೆ ಮಟ್ಟದ ಬಡ್ಡಿದರವಾಗಿತ್ತು.

ಇದಕ್ಕೂ ಮೊದಲು 2020-21ರಲ್ಲಿ 8.50 ಶೇಕಡಾ, 2018-19ರಲ್ಲಿ 8.65 ಶೇಕಡಾ ಹಾಗೂ 2015-16ರಲ್ಲಿ 8.80 ಶೇಕಡಾ ಬಡ್ಡಿದರ ನೀಡಲಾಗಿತ್ತು. 2013-14 ಮತ್ತು 2014-15ರಲ್ಲಿ ಸದಸ್ಯರಿಗೆ 8.75 ಶೇಕಡಾ ಬಡ್ಡಿದರ ಲಭಿಸಿತ್ತು. ಈಗ ಸರ್ಕಾರದ ಅಂತಿಮ ಅನುಮೋದನೆ ದೊರೆತಿರುವುದರಿಂದ EPF ಸದಸ್ಯರು ತಮ್ಮ ಖಾತೆಗಳಲ್ಲಿ 2025-26ನೇ ಸಾಲಿನ ಬಡ್ಡಿ ಹಣವನ್ನು ಶೀಘ್ರದಲ್ಲೇ ನೋಡಬಹುದಾಗಿದೆ. ಇದರಿಂದ ಕೋಟ್ಯಂತರ ಉದ್ಯೋಗಿಗಳ ಉಳಿತಾಯಕ್ಕೆ ಮತ್ತಷ್ಟು ಬಲ ಸಿಗಲಿದೆ,(ಎಜೆನ್ಸೀಸ್​).