ಭಾರತ-ಪಾಕಿಸ್ತಾನದ ಗಡಿಯಲ್ಲಿ ಕಾಣಿಸಿಕೊಂಡ ಅಳಿವಿನಂಚಿನಲ್ಲಿರುವ ಕಾಡು ಬೆಕ್ಕುಗಳು; ಇದರ ವಿಶೇಷತೆ ಏನು, ನೋಡಲು ಹೇಗಿರುತ್ತವೆ...Caracal

ನವದೆಹಲಿ: ಆಕರ್ಷಕವಾದ ಮಧ್ಯಮ ದೇಹ, ಉದ್ದನೆಯ ಕಾಲು, ಕೆಂಪು ಮತ್ತು ಕಂದು ಬಣ್ಣದ ಕಿವಿ, ಅದರ ಮೇಲೆ ಕೂದಲಿನ ಕಪ್ಪು ಗುಚ್ಚ, ಕಂದು ಬಣ್ಣದ ಕಣ್ಣುಗಳನ್ನು ಹೊಂದಿರುವ ಕಾಡು ಬೆಕ್ಕು ಭಾರತ ಮತ್ತು ಪಾಕಿಸ್ತಾನದ ಗಡಿಯಲ್ಲಿರುವ ಥಾರ್​ ಮರುಭೂಮಿಯಲ್ಲಿ ಪತ್ತೆಯಾಗಿದೆ. ಅಳಿವಿನಂಚಿನಲ್ಲಿರುವ ಇದನ್ನು ಘೋಸ್ಟ್​​ ಕ್ಯಾಟ್​, ಕ್ಯಾರಕಲ್​ ಎಂತಲೂ ಕರೆಯಲಾಗುತ್ತದೆ.

ಬೇಟೆಗಾಗಿ ಚಿರತೆಯೆಂತೆ, ಕ್ಯಾರಕಲ್​ ಸಂಚು ಹಾಕುತ್ತಿರುವ ದೃಶ್ಯವನ್ನು ಪಿಟಿಐ ಸುದ್ದಿಸಂಸ್ಥೆ ಹಂಚಿಕೊಂಡಿದೆ. ಒಂದಾನೊಂದು ಕಾಲದಲ್ಲಿ ಭಾರತದಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದ ಕಾಡು ಬೆಕ್ಕುಗಳು ಸದ್ಯ ಅಳಿವಿನಂಚಿಗೆ ಸಾಗಿದೆ. ಇವು ಒಣ ಹುಲ್ಲು ಪ್ರದೇಶವಾದ ಮಧ್ಯಪ್ರಾಚ್ಯ, ಏಷ್ಯಾ, ಆಫ್ರೀಕಾದಂತಹ ಭಾಗಗಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. ಭಾರತದಲ್ಲಿ ಗುಜರಾತ್​, ರಾಜಸ್ಥಾನ ಮಧ್ಯಪ್ರದೇಶದ ಕುರುಚಲು ಕಾಡು, ಹುಲ್ಲು ಗಾವಲಿನ ಪ್ರದೇಶ ಹಾಗೂ ಅರೆ ಮರುಭೂಮಿಯಲ್ಲಿ ಕಾಣಿಸಿಕೊಳ್ಳುತ್ತವೆ. 

ಸದ್ಯ ಮೂರು ಕಾಡು ಬೆಕ್ಕುಗಳು ರಾಜಸ್ಥಾನದ ಜೆರುಸ್ಲೇಮ್​ನ ಪಾಕಿಸ್ತಾನ-ಭಾರತದ ಗಡಿಯಲ್ಲಿ( India-Pakistan border) ಅರಣ್ಯ ಇಲಾಖೆಯ ಕ್ಯಾಮೆರಾ ಕಣ್ಣಿಗೆ ಬಿದ್ದಿವೆ. ಇವುಗಳ ರಕ್ಷಣಾ ಮಾಡುವ ಕಾರ್ಯಾವನ್ನು ಅರಣ್ಯ ಇಲಾಖೆ ಮುಂದುವರೆಸಿದೆ. 

ಭಾರತದಲ್ಲಿ ದಿನೇ-ದಿನೇ ಹುಲ್ಲುಗಾವಲಿನ ಪ್ರದೇಶ ಕಡಿಮೆಯಾಗುತ್ತಿರುವುದೇ ಕಾಡು ಬೆಕ್ಕುಗಳು ಅಳಿವಿನಂಚಿಗೆ ತಲುಪಲು ಕಾರಣ ಎನ್ನಲಾಗಿದೆ. ಇದು ಒಂದು ಕಡೆಯಾದರೆ ಮತ್ತೊಂದು ಇವುಗಳನ್ನು ಬೇಟೆಯಾಡಿ ಸಾಯಿಸುವುದು. ಕಾಡು ನಾಯಿ ಮತ್ತು ಬೆಕ್ಕುಗಳ ಮಧ್ಯೆ ಏರ್ಪಡುವ ಸ್ಪರ್ಧೆಯೂ ಕ್ಯಾರಕಲ್​ಗಳ ಸಂಖ್ಯೆ ಕ್ರಮೇಣವಾಗಿ ಕ್ಷೀಣಿಸಲು ಕಾರಣವಾಗಿರಬಹುದು.  

ಗಂಡು ಕಾಡು ಬೆಕ್ಕು 20 ಕೆಜಿ ತೂಕವುಳ್ಳದಾಗಿದ್ದು, ಹೆಣ್ಣು 16 ಕೆಜಿ ಇರುತ್ತದೆ. ಇವು ಅತೀ ವೇಗವಾಗಿ ಓಡುತ್ತದೆ. ಇದರ ಕಿವಿಗಳು 1.75 ಇಂಚು ಇದ್ದು, ಇದಕ್ಕೆ ವಿಶಿಷ್ಟವಾಗಿ ಕಪ್ಪು ಕುಚ್ಚುಗಳು ಇದೆ. ಬೇಟೆಯಾಡುವುದರಲ್ಲಿ ಚುರುಕು. ಬಾನಲ್ಲಿ ಹಾರುವ ಹಕ್ಕಿಯನ್ನು ಗಬಕ್ಕನೇ ಬಾಯಿಗೆ ಹಾಕಿಕೊಂಡು ನುಂಗುವ ಪ್ರಾವಿಣ್ಯತೆ ಈ ಬೆಕ್ಕುಗಳಿದೆ. ಡೆಸರ್ಟ್ ಲಿಂಕ್ಸ್ ಎಂತಲೂ ಕರೆಸಿಕೊಳ್ಳುವ ಇವು 3.0 ಮೀ ಎತ್ತರಕ್ಕೆ ಹಾರುತ್ತದೆ. ಹೆಣ್ಣು ಬೆಕ್ಕು ಆರರಿಂದ ಏಳು ಮರಿಗೆ ಜನ್ಮ ನೀಡುತ್ತದೆ. ಗಂಡು ಮರಿಗಳು ಹತ್ತು ವರ್ಷಕ್ಕೆ ತಮ್ಮ ತಾಯಿಯನ್ನು ತೊರೆದರೆ, ಹೆಣ್ಣು ಮರಿಗಳು ಅಲ್ಲೇ ಇರುತ್ತವೆ. ಒಟ್ಟು ಹದಿನಾರು ವರ್ಷ ಬದುಕಿರುತ್ತವೆ ಎಂದು ಹೇಳಾಲಾಗುತ್ತಿದೆ.

ರಾಜ-ಮಹರಾಜರ ಕಾಲದಲ್ಲಿ ಕಾಡುಬೆಕ್ಕುಗಳಿಗೆ ತನ್ನದೇ ಆದ ಸ್ಥಾನವಿತ್ತು. ಅವುಗಳನ್ನು ಪರ್ಷಿಯಾ ಮತ್ತು ಭಾರತದ ರಾಜರು ಪಕ್ಷಿ ಹಿಡಿಯುವುದಕ್ಕಾಗಿ ಬಳಸಿಕೊಳ್ಳುತ್ತಿದ್ದರು. ಇಷ್ಟೇ ಅಲ್ಲದೆ, ಅವುಗಳಿಗೆ ತರಬೇತಿಯನ್ನು ಸಹ ನೀಡುತ್ತಿದ್ದರು ಎನ್ನುವುದು ದಾಖಲೆಗಳಲ್ಲಿ ಉಲ್ಲೇಖಿಸಲಾಗಿದೆ, (ಏಜೆನ್ಸೀಸ್).