ಧರ್ಮೇಂದ್ರರಿಗೆ 'ಪದ್ಮವಿಭೂಷಣ' ಗೌರವ: ರಾಷ್ಟ್ರಪತಿಗಳಿಂದ ಪ್ರಶಸ್ತಿ ಸ್ವೀಕರಿಸಿ ಕಣ್ಣೀರಿಟ್ಟ ಹೇಮಾ ಮಾಲಿನಿ!

ನವದೆಹಲಿಯ ರಾಷ್ಟ್ರಪತಿ ಭವನದ ದರ್ಬಾರ್ ಹಾಲ್‌ನಲ್ಲಿ ಸೋಮವಾರ ನಡೆದ ಪ್ರತಿಷ್ಠಿತ ಪದ್ಮವಿಭೂಷಣ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ, ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಹೇಮಾ ಮಾಲಿನಿ ಅವರಿಗೆ ಈ ಉನ್ನತ ಗೌರವವನ್ನು ಹಸ್ತಾಂತರಿಸಿದರು. ಧರ್ಮೇಂದ್ರ ಅವರು ಚಿತ್ರರಂಗಕ್ಕೆ ನೀಡಿದ ಆರು ದಶಕಗಳಿಗೂ ಹೆಚ್ಚಿನ ಅನನ್ಯ ಕೊಡುಗೆಯನ್ನು ಸ್ಮರಿಸಿ ಈ ಪ್ರಶಸ್ತಿ ನೀಡಲಾಗಿದೆ.

ಪ್ರಶಸ್ತಿ ಸ್ವೀಕರಿಸಲು ಬಂದಿದ್ದ ಹೇಮಾ ಮಾಲಿನಿಯವರು ಗುಲಾಬಿ ಬಣ್ಣದ ಸೀರೆಯನ್ನು  ಉಟ್ಟು, ಅತ್ಯಂತ ಸರಳ ಹಾಗೂ ಆಕರ್ಷಕವಾಗಿ ಕಾಣಿಸುತ್ತಿದ್ದರು. ಅವರಿಗೆ ಅವರ ಮಗಳು ಅಹಾನಾ ಡಿಯೋಲ್​ ಮತ್ತು ಅಳಿಯ ವೈಭವ್ ವೋಹ್ರಾ ಸಾಥ್​ ಕೊಟ್ಟಿದ್ದರು. ಹೇಮಾ ಮಾಲಿನಿ ಅವರು ಪ್ರಶಸ್ತಿ ಸ್ವೀಕರಿಸುವ ವೇಳೆ ತಂದೆಯನ್ನು ನೆನಪಿಸಿಕೊಳ್ಳುತ್ತಾ  ಅಹನಾ ಕಣ್ಣೀರು ಹಾಕಿದ್ದಾರೆ.  ತಾಯಿ ಹೇಮಾ ಮಾಲಿನಿ ಸಹ ವೇದಿಕೆಯಲ್ಲಿಯೇ  ಕಣ್ಣೀರಿಟ್ಟಿದ್ದಾರೆ.

ಇದು ಇಡೀ ಕುಟುಂಬಕ್ಕೆ ಅತ್ಯಂತ ಹೆಮ್ಮೆ  ಮತ್ತು ಅಷ್ಟೇ ಭಾವುಕ ಕ್ಷಣವಾಗಿದೆ. ಅವರು ಇಂದು ನಮ್ಮೊಂದಿಗೆ ಇರಬೇಕಿತ್ತು. ಆದರೆ ಭಾರತ ಸರ್ಕಾರ ಮತ್ತು ದೇಶದ ಜನತೆ ಅವರ ಕಲೆ ಹಾಗೂ ಕೊಡುಗೆಯನ್ನು ಗೌರವಿಸಿರುವುದಕ್ಕೆ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ. ಅವರು ಸದಾ ಜನರ ಹೃದಯದಲ್ಲಿ 'ಹೀ-ಮ್ಯಾನ್' ಆಗಿ ಜೀವಂತವಾಗಿರುತ್ತಾರೆ ಎಂದು ಪ್ರಶಸ್ತಿ ಸ್ವೀಕರಿಸಿದಕ್ಕೂ ಮುನ್ನ ಮಾಧ್ಯಮದ ಮುಂದೆ ಮಾತನಾಡುತ್ತ ಭಾವುಕರಾದರು. 

ಧರ್ಮೇಂದ್ರ ಅವರು ತಮ್ಮ ಸುದೀರ್ಘ ವೃತ್ತಿಜೀವನದಲ್ಲಿ 'ಶೋಲೆ', 'ಫೂಲ್ ಔರ್ ಪತ್ತರ್', 'ಚುಪ್ಕೆ ಚುಪ್ಕೆ' ಮೇರಾ ಗಾಂವ್ ಮೇರಾ ದೇಶ್ ಸೇರಿದಂತೆ ನೂರಾರು ಸೂಪರ್‌ಹಿಟ್ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿದ್ದರು.  ಆರು ದಶಕಗಳ ಕಾಲ ಸಿನಿಮಾ ರಂಗದಲ್ಲಿದ್ದ ಅವರು  300ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದರು.  ‘ದಿಲ್ ಭಿ ತೇರಾ ಹಮ್ ಭಿ ತೇರೆ’ 1960 ರಲ್ಲಿ ಬಿಡುಗಡೆಯಾಗಿತ್ತು. ಇದು ಅವರ ಮೊದಲ ಸಿನಿಮಾ, ಇದರ ಮೂಲಕವೇ ಅವರು ಬೆಳ್ಳಿ ತೆರೆಗೆ ಕಾಲಿಟ್ಟಿದ್ದರು. 

2025 ನವೆಂಬರ್ 24ರಂದು  89 ನೇ ವಯಸ್ಸಿನಲ್ಲಿ   ಅಂಗಾಂಗ ವೈಫಲ್ಯದಿಂದ ಧರ್ಮೇಂದ್ರ ಅವರು ನಿಧನರಾದರು. ಪುತ್ರರಾದ ಸನ್ನಿ ಡಿಯೋಲ್ ಮತ್ತು ಬಾಬಿ ಡಿಯೋಲ್ ಸೇರಿದಂತೆ ಇಡೀ ಕುಟುಂಬವು ಅವರ ಅಂತಿಮ ವಿಧಿಗಳನ್ನು ನೆರವೇರಿಸಿತು, (ಏಜೆನ್ಸೀಸ್).