ಸಂಪಾದಕೀಯ: ಟ್ರಂಪ್ ಬೆದರಿಕೆ ನಿಲ್ಲಿಸಲಿ

ಅಮೆರಿಕ ತನ್ನ ಹಿತಕ್ಕೆ ಏನು ಬೇಕೋ ಆ ಕ್ರಮಗಳನ್ನು ಕೈಗೊಳ್ಳಲಿ. ಅದಕ್ಕೆ ಯಾರ ಆಕ್ಷೇಪವೂ ಇಲ್ಲ. ಆದರೆ, ವಾಣಿಜ್ಯ ಮತ್ತು ಆರ್ಥಿಕ ಹಿತ ಸಾಧಿಸುವ ನೆಪದಲ್ಲಿ ರಾಜತಾಂತ್ರಿಕ ಮತ್ತು ದ್ವಿಪಕ್ಷೀಯ ಬಾಂಧವ್ಯಗಳಿಗೆ ಟ್ರಂಪ್ ಪೆಟ್ಟು ನೀಡುತ್ತಿರುವುದು, ಪದೇಪದೆ ಬೆದರಿಕೆಯ ಭಾಷೆ ಬಳಸುತ್ತಿರುವುದು ಸೂಕ್ತವಲ್ಲ. ಸುಂಕಾಸ್ತ್ರದ ಮೂಲಕ ಎಲ್ಲ ಸಮಸ್ಯೆಗಳನ್ನು ಪರಿಹರಿಸಬಹುದು ಎಂಬ ಟ್ರಂಪ್ ಗ್ರಹಿಕೆಯೇ ದೋಷಪೂರಿತವಾಗಿದೆ. ಭಾರತ ಹೆಚ್ಚು ಮಾನವ ಸಂಪನ್ಮೂಲ ಮತ್ತು ವಿಶ್ವದಲ್ಲೇ ಅತಿ ವಿಶಾಲ ಮಾರುಕಟ್ಟೆಯನ್ನು ಹೊಂದಿರುವ ದೇಶ. ರಫ್ತಿಗಾಗಿಯೂ ಅಮೆರಿಕ ಹೊರತುಪಡಿಸಿ ಇತರ ದೇಶಗಳ ಆಯ್ಕೆಯನ್ನು ಕಂಡುಕೊಳ್ಳುವ ಸಾಮರ್ಥ್ಯವಿದೆ.

ಭಾರತದ ಕೃಷಿ ಹಾಗೂ ಕೃಷಿಯೇತರ ಉತ್ಪನ್ನಗಳಿಗೆ ಜಗತ್ತಿನ ಪ್ರಮುಖ ರಾಷ್ಟ್ರಗಳಲ್ಲಿ ಬೇಡಿಕೆ ಇದೆ. ಈ ನಿಟ್ಟಿನಲ್ಲಿ ಬ್ರಿಟನ್ ಸೇರಿದಂತೆ ಹಲವು ರಾಷ್ಟ್ರಗಳೊಂದಿಗೆ ಮುಕ್ತ ವ್ಯಾಪಾರ ಒಪ್ಪಂದ ಏರ್ಪಟ್ಟಿದೆ. ಮಾತ್ರವಲ್ಲ, ಭಾರತದೊಂದಿಗೆ ವಾಣಿಜ್ಯ ಸಂಬಂಧ ವೃದ್ಧಿಸಿಕೊಳ್ಳಲು, ಪರಸ್ಪರ ಸಹಕಾರ ಹೆಚ್ಚಿಸಲು ಹಲವು ರಾಷ್ಟ್ರಗಳು ಉತ್ಸಾಹ ತೋರಿವೆ. ಅಮೆರಿಕ ಸಾರಿರುವ ಸುಂಕ ಸಮರದ ಹೊರತಾಗಿಯೂ ಭಾರತ ಕಳೆದ ತ್ರೖೆಮಾಸಿಕದಲ್ಲಿ ಶೇಕಡ 8.2ರಷ್ಟು ಆರ್ಥಿಕ ಬೆಳವಣಿಗೆ (ಜಿಡಿಪಿ) ದಾಖಲಿಸಿರುವುದು ಸಾಧಾರಣ ಸಂಗತಿಯಲ್ಲ.

ಅಲ್ಲದೆ, ವಿಶ್ವದಲ್ಲೇ ಭಾರತದ ಆರ್ಥಿಕತೆ ವೇಗವಾಗಿ ಬೆಳೆಯುತ್ತಿದೆ. ಹೀಗಿದ್ದರೂ, ಸುಂಕ ಬೆದರಿಕೆಯಿಂದ ಭಾರತವನ್ನು ಮಣಿಸಬಹುದು ಎಂದು ಟ್ರಂಪ್ ಅಂದುಕೊಂಡಿದ್ದರೆ ಅದು ಮಹಾಪ್ರಮಾದವೇ ಸರಿ. ಮಾತ್ರವಲ್ಲ, ಟ್ರಂಪ್ ಜಾರಿಗೊಳಿಸುತ್ತಿರುವ ಅವೈಜ್ಞಾನಿಕ ಸುಂಕ ನೀತಿಯಿಂದ ಅಮೆರಿಕದ ಉದ್ಯಮಗಳು ಸಂಕಷ್ಟಕ್ಕೆ ಸಿಲುಕುತ್ತಿದ್ದು, ಆರ್ಥಿಕ ಬೆಳವಣಿಗೆ ವೇಗ ಕಳೆದುಕೊಳ್ಳುತ್ತಿದೆ ಎಂದು ಅಮೆರಿಕದ ವಿತ್ತೀಯ ತಜ್ಞರೇ ಅಭಿಪ್ರಾಯಪಟ್ಟಿದ್ದಾರೆ. ವಾಣಿಜ್ಯ ಸಮರದ ಭರದಲ್ಲಿ ಭಾರತ-ಅಮೆರಿಕ ನಡುವಿನ ಹಳೆಯ ಸ್ನೇಹ ಮತ್ತು ದ್ವಿಪಕ್ಷೀಯ ಬಾಂಧವ್ಯಕ್ಕೆ ಧಕ್ಕೆ ಆಗದಿರಲಿ.