ಸಂಸತ್ ಮಾತ್ರವಲ್ಲ, ಅಮೆರಿಕದ ಜನತೆ ಕೂಡ ಯುದ್ಧದ ವಿರುದ್ಧ ಪ್ರತಿಭಟನೆ ನಡೆಸಿದ್ದಾರೆ. ಇಲ್ಲದ ಉಸಾಬರಿಗೆ ಕೈಹಾಕಿದ್ದೇಕೆ ಎಂದು ಟ್ರಂಪ್ ಆಡಳಿತವನ್ನು ತರಾಟೆಗೆ ತೆಗೆದುಕೊಂಡಿದ್ದೂ ಇದೆ. ಜನರು ಆಕ್ರೋಶಿತರಾಗುವುದಕ್ಕೆ ಕಾರಣವೂ ಇದೆ. ಈವರೆಗಿನ ಯುದ್ಧದಲ್ಲಿ ಅಮೆರಿಕದ ಅನೇಕ ಸೈನಿಕರು ಮೃತರಾಗಿದ್ದು, ಯುದ್ಧ ವಿಮಾನಗಳು ಸೇರಿ ಅಪಾರ ಪ್ರಮಾಣ ಸಮರ ಸಾಧನಗಳನ್ನು ಸಹ ಆ ದೇಶ ಕಳೆದುಕೊಂಡಿದೆ. ಕೋಟ್ಯಂತರ ಡಾಲರ್ ನಷ್ಟವಾಗಿದೆ. ಕದನ ವಿರಾಮದ ಮಾತುಗಳು ಕೇಳಿಬರುತ್ತಿವೆಯಾದರೂ, ಅದು ತಾತ್ಕಾಲಿಕವಾಗಿದೆ. ಯುದ್ಧದ ಕಿಡಿಗಳು ಹಾರುತ್ತಲೇ ಇವೆ. ಮಧ್ಯಪ್ರಾಚ್ಯವು ತೈಲ ಮತ್ತಿತರ ವಸ್ತುಗಳ ಪೂರೈಕೆಯ ಮುಖ್ಯ ಕೊಂಡಿಯಾಗಿರುವುದರಿಂದಾಗಿ, ಯುದ್ಧದ ದುಷ್ಪರಿಣಾಮಗಳು ವಿಶ್ವದ ಅನೇಕ ದೇಶಗಳನ್ನು ಬಾಧಿಸತೊಡಗಿ ಹಲವು ದಿನಗಳಾಗಿವೆ; ವಿವಿಧ ವಸ್ತುಗಳ ಬೆಲೆ ಏರಿಕೆ ಆಗಿದೆ. ಕಚ್ಚಾವಸ್ತುಗಳ ಪೂರೈಕೆ ಇಲ್ಲದೆ ಉತ್ಪಾದನೆ ಕುಸಿದಿದೆ. ಇದರ ಪರಿಣಾಮ ಜನಸಾಮಾನ್ಯರ ಮೇಲೆ ಆಗಿದೆ. ಹೀಗಾಗಿ ಕೊಲ್ಲಿ ಕದನ ಆದಷ್ಟು ಬೇಗ ಅಂತ್ಯವಾಗಬೇಕಿದೆ. ಜಗತ್ತಿನ ಕ್ಷೇಮದ ದೃಷ್ಟಿಯಿಂದ, ಅಮೆರಿಕ ಮಾತ್ರವಲ್ಲ, ಸಮರದಲ್ಲಿ ತೊಡಗಿರುವ ಎಲ್ಲ ದೇಶಗಳು ಈ ಅಂಶವನ್ನು ಪರಿಗಣಿಸಬೇಕಿದೆ.
