ಸಂಪಾದಕೀಯ: ಕಠಿಣ ಕ್ರಮ ಅನಿವಾರ್ಯ

"ಕಳೆದ 10 ವರ್ಷಗಳಲ್ಲಿ 150 ಪ್ರಶ್ನೆಪತ್ರಿಕೆ ಸೋರಿಕೆಗಳು ಆಗಿದ್ದು, ಒಂದು ಪ್ರಕರಣದಲ್ಲಿಯೂ ಶಿಕ್ಷೆಯಾಗಿಲ್ಲ" ಎಂದು ಲೋಕಸಭೆ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಆರೋಪಿಸಿದ್ದರು. ಕೇಂದ್ರ ಸರ್ಕಾರ ಈ ಆರೋಪದ ಬಗ್ಗೆ ಪ್ರತಿಕ್ರಿಯಿಸಿಲ್ಲವಾದ್ದರಿಂದ ಈ ಬಗ್ಗೆ ಸ್ಪಷ್ಟತೆ ಇಲ್ಲ. ಇನ್ನೊಂದೆಡೆ, ಕಾಕ್ರೋಚ್ ಜನತಾ ಪಾರ್ಟಿ (ಸಿಜೆಪಿ)ಯು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಗೆ ಪಟ್ಟುಹಿಡಿದಿದೆ. ಈ ಬಗ್ಗೆ ಶನಿವಾರ ಮಧ್ಯಾಹ್ನದ ಹೊತ್ತಿಗೆ ನಿಲುವು ಪ್ರಕಟಿಸುವುದಾಗಿ ಸಚಿವ ಜೆ.ಪಿ.ನಡ್ಡಾ ಹೇಳಿದ್ದಾರೆ. ಒಂದೊಮ್ಮೆ ಪ್ರಧಾನ್ ರಾಜೀನಾಮೆ ನೀಡದಿದ್ದರೆ ಪ್ರತಿಭಟನೆಯನ್ನು ಮುಂದುವರಿಸುವುದಾಗಿ ಸಿಜೆಪಿ ಪ್ರಮುಖರು ಹೇಳಿದ್ದಾರೆ. ಹೀಗಾಗಿ ಮುಂದಿನ ಬೆಳವಣಿಗೆಯನ್ನು ಕಾದುನೋಡಬೇಕಿದೆ.

ಅದೇ ಹೊತ್ತಿಗೆ, ದೇಶದ ಹಲವೆಡೆ ಈ ಪ್ರತಿಭಟನೆ ವಿಸ್ತರಿಸಿರುವುದರಿಂದ ಅನ್ಯದಾರಿಗೆ ಹೊರಳದಂತೆ ಕಟ್ಟೆಚ್ಚರವೂ ಬೇಕು. ಪ್ರಶ್ನೆಪತ್ರಿಕೆ ಸೋರಿಕೆ ಬಳಿಕ ಕೇಂದ್ರ ಸರ್ಕಾರವು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಂಡು ಮರುಪರೀಕ್ಷೆಯನ್ನೇನೋ ಯಶಸ್ವಿಯಾಗಿ ನಡೆಸಿತು. ಆದರೆ ಈ ಬಗ್ಗೆ ವಿದ್ಯಾರ್ಥಿಗಳಲ್ಲಿ ಮತ್ತು ಒಟ್ಟಾರೆಯಾಗಿ ಜನಮಾನಸದಲ್ಲಿ ಇದ್ದ ಭಾವನೆಗಳನ್ನು ಗ್ರಹಿಸಿ ಆಗಲೇ ಕ್ರಮಕ್ಕೆ ಮುಂದಾಗಿದ್ದರೆ ಪರಿಸ್ಥಿತಿ ಈ ಮಟ್ಟಕ್ಕೆ ಹೋಗುತ್ತಿರಲಿಲ್ಲ ಎಂಬುದು ಕೆಲವರ ಅನಿಸಿಕೆ. ನೀಟ್ ಮಾತ್ರವಲ್ಲ ಲಕ್ಷಾಂತರ ವಿದ್ಯಾರ್ಥಿಗಳು ಭಾಗವಹಿಸುವ ಯಾವುದೇ ಪರೀಕ್ಷೆಯ ಪ್ರಶ್ನೆಪತ್ರಿಕೆಗಳೂ ಸೋರಿಕೆಯಾಗಬಾರದು. ಏಕೆಂದರೆ ಲಕ್ಷಾಂತರ ಕನಸುಗಳು ಇದರ ಹಿಂದಿರುತ್ತವೆ ಮತ್ತು ಅಪಾರ ಶ್ರಮ ಇರುತ್ತದೆ. ಆಯಾ ರಾಜ್ಯಮಟ್ಟದ ಪರೀಕ್ಷೆಗಳಲ್ಲಿ ರಾಜ್ಯ ಸರ್ಕಾರಗಳ ಹೊಣೆಗಾರಿಕೆ ಇರುತ್ತದೆ. ಕೆಲವರು ಆಪಾದಿಸುವಂತೆ, ಪ್ರಶ್ನೆಪತ್ರಿಕೆ ಅಕ್ರಮದಲ್ಲಿ ಕೋಚಿಂಗ್ ಕೇಂದ್ರಗಳು ಮತ್ತು ಸಂಘಟಿತ ಜಾಲದ ಪಾತ್ರ ಇರುತ್ತದೆಯೇ ಎಂಬುದರಿಂದ ಹಿಡಿದು ಸಮಗ್ರವಾಗಿ ತನಿಖೆ ನಡೆದು ವಾಸ್ತವಾಂಶ ಬಯಲಾದರೆ ಸಾರ್ವಜನಿಕರಿಗೆ ಖಚಿತ ಚಿತ್ರಣ ಸಿಗುತ್ತದೆ.