ಸಂಪಾದಕೀಯ: ರೈತರ ಸಂಕಷ್ಟ ಪರಿಹರಿಸಿ

ಈ ವೈಫಲ್ಯಕ್ಕೆ ಪ್ರಮುಖ ಕಾರಣ, ರಾಜ್ಯದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘಗಳು ಎದುರಿಸುತ್ತಿರುವ ಸಂಪನ್ಮೂಲ ಕೊರತೆ. ಸಾಂಸ್ಥಿಕ ಸಾಲದ ಪ್ರಮುಖ ಆಕರವಾಗಿದ್ದ ನಬಾರ್ಡ್ ಕಳೆದ ವರ್ಷ ಪುನರ್ಧನ ಸಾಲದ ಮೊತ್ತವನ್ನು ಶೇ. 58ರಷ್ಟು ಇಳಿಸಿತ್ತು. ಇದರ ಪರಿಣಾಮ, ಲಕ್ಷಾಂತರ ರೈತರು ಕಳೆದ ವರ್ಷ ಸಾಲದಿಂದ ವಂಚಿತರಾದರು. ಈ ವರ್ಷವೂ ಪರಿಸ್ಥಿತಿ ಸುಧಾರಿಸಿಲ್ಲ. ಬಜೆಟ್​ನಲ್ಲಿ ಘೊಷಿಸಿದ ಗುರಿಯನ್ನು ತಲುಪಲು ಸಹಕಾರ ಸಂಘಗಳಿಗೆ ಅಗತ್ಯವಾದ ಪರ್ಯಾಯ ಸಂಪನ್ಮೂಲ ಹರಿವಿನ ಬಗ್ಗೆ ಸರ್ಕಾರ ಗಮನ ಹರಿಸಿಲ್ಲ. ರಾಜ್ಯದಲ್ಲಿ 6,025 ಸಹಕಾರ ಸಂಘಗಳಿದ್ದು, 53.50 ಲಕ್ಷ ರೈತರು ಸದಸ್ಯರಾಗಿದ್ದಾರೆ.

ಆದರೆ ಸಾಲ ಸಿಕ್ಕಿರುವುದು 14.94 ಲಕ್ಷ ರೈತರಿಗೆ ಮಾತ್ರ. ಉಳಿದ ರೈತರಿಗೆ ಸಾಲ ಸಿಗದಿರುವುದು ಅವರ ಕೃಷಿ ಚಟುವಟಿಕೆ ಮೇಲೆ ಪರಿಣಾಮ ಬೀರಿರುವುದು ಸ್ಪಷ್ಟ. ಇದಲ್ಲದೆ, ಕೃಷಿ ಉತ್ಪನ್ನಗಳಿಗೆ ಸೂಕ್ತ ಬೆಲೆ ಸಿಗದಿರುವುದು ಗಾಯದ ಮೇಲೆ ಬರೆ ಎಳೆದಂತೆ. ಕಬ್ಬು ಬೆಳೆಗಾರರ ಬೇಡಿಕೆ ಇನ್ನೂ ಪೂರ್ಣವಾಗಿ ಈಡೇರಿಲ್ಲ. ಮೆಕ್ಕೆಜೋಳಕ್ಕೆ ಕ್ವಿಂಟಾಲ್​ಗೆ 2,400 ರೂ. ಕನಿಷ್ಠ ಬೆಂಬಲ ಬೆಲೆ ಇದ್ದರೂ, ಖರೀದಿ ಕೇಂದ್ರಗಳನ್ನು ಸಕಾಲಕ್ಕೆ ತೆರೆಯದ ಕಾರಣ ರೈತರಿಗೆ ಇದರ ಪ್ರಯೋಜನ ಸಿಗಲಿಲ್ಲ. ಭಾರಿ ಮಳೆಯಿಂದ ಕಳಾಹೀನವಾದ ಹೆಸರು ಕಾಳು ಎಫ್​ಎಕ್ಯೂ ಗುಣಮಟ್ಟದಲ್ಲಿ ಇಲ್ಲ ಎಂಬ ಕಾರಣಕ್ಕೆ ಎಂಎಸ್​ಪಿಯಡಿ ಖರೀದಿ ಆಗುತ್ತಿಲ್ಲ.

ಒಂದೆಡೆ ಶೂನ್ಯ ಬಡ್ಡಿ ಸಾಲ ಸಿಗದೆ, ಮತ್ತೊಂದೆಡೆ ಬೆಳೆಗೆ ಸೂಕ್ತ ಬೆಲೆ ಸಿಗದೆ ರೈತರು ಸಂಕಷ್ಟ ಎದುರಿಸುತ್ತಿದ್ದಾರೆ. ಸಹಕಾರ ಸಂಘಗಳ ಪ್ರಮುಖರು ಕೆಲವರಿಗಷ್ಟೇ ಸಾಲ ನೀಡಿ ಸ್ವಜನಪಕ್ಷಪಾತ ಮಾಡುವ ಉದಾಹರಣೆಗಳೂ ಇವೆ. ಕಷ್ಟದಲ್ಲಿರುವ ರೈತರಿಗೆ ಸಾಂಸ್ಥಿಕ ಸಾಲ ಸಿಗದಿದ್ದರೆ, ಅವರು ಅನಿವಾರ್ಯವಾಗಿ ಖಾಸಗಿ ಲೇವಾದೇವಿದಾರರು ಮತ್ತು ದುಬಾರಿ ಬಡ್ಡಿ ದಂಧೆಯ ಸುಳಿಗೆ ಸಿಲುಕುತ್ತಾರೆ. ಭಾರಿ ಬಡ್ಡಿ ತೆರಲಾಗದೆ ರೈತರ ಆತ್ಮಹತ್ಯೆ ಪ್ರಮಾಣವೂ ಹೆಚ್ಚಾಗಿದೆ. ನ್ಯಾಷನಲ್ ಕ್ರೖೆಮ್ ರೆಕಾರ್ಡ್ಸ್ ಬ್ಯೂರೋದ ಇತ್ತೀಚಿನ ವರದಿಯೊಂದರ ಪ್ರಕಾರ, ರೈತರ ಆತ್ಮಹತ್ಯೆಯ ವಿಷಯದಲ್ಲಿ ಕರ್ನಾಟಕವು ಇಡೀ ದೇಶದಲ್ಲೇ ಎರಡನೇ ಸ್ಥಾನದಲ್ಲಿದೆ.

ಸಾಲದ ಗುರಿಯನ್ನು ಬಜೆಟ್ ಭಾಷಣಕ್ಕೆ ಸೀಮಿತಗೊಳಿಸದೆ, ರಾಜ್ಯ ಸರ್ಕಾರ ಕೂಡಲೇ ಸಹಕಾರ ಸಂಸ್ಥೆಗಳ ಸಂಪನ್ಮೂಲ ಕೊರತೆ ನೀಗಿಸಲು ಪರ್ಯಾಯ ಮಾರ್ಗಗಳನ್ನು ರೂಪಿಸಬೇಕು. ರೈತರ ಸಂಕಷ್ಟಕ್ಕೆ ಸ್ಪಂದಿಸಿ, ಸಾಲ ವಿತರಣೆ ಮತ್ತು ಬೆಳೆ ಖರೀದಿ ಪ್ರಕ್ರಿಯೆಗಳಲ್ಲಿನ ಲೋಪಗಳನ್ನು ಸರಿಪಡಿಸಬೇಕು. ಸರ್ಕಾರ ಇಚ್ಛಾಶಕ್ತಿ ತೋರಿಸದಿದ್ದರೆ, ರೈತ ಪರ ಘೊಷಣೆಗಳು ಕೇವಲ ಮರೀಚಿಕೆಯಾಗಿ ಉಳಿಯುತ್ತವೆ.