ಸಂಪಾದಕೀಯ: ಸೂಕ್ತ ತನಿಖೆ ಅಗತ್ಯ

ದೇಶದಲ್ಲಿ ಮಕ್ಕಳ ಅಪಹರಣ ಪ್ರಕರಣಗಳು ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇವೆ. ಅಲ್ಲದೆ, ನಾಪತ್ತೆಯಾದವರ ಪೈಕಿ ಶೇಕಡ 15ರಷ್ಟು ಮಕ್ಕಳು ಎಲ್ಲಿ ಹೋದರು, ಏನಾದರು ಎಂಬುದು ಪತ್ತೆಯಾಗುತ್ತಿಲ್ಲ ಎಂಬುದು ಕಳವಳದ ಸಂಗತಿ. ಈ ಸಮಸ್ಯೆ ದೊಡ್ಡ ಪಿಡುಗಾಗಿ ಕಾಡುತ್ತಿದ್ದು, ಮಕ್ಕಳ ಹಕ್ಕುಗಳ ರಕ್ಷಣೆ ನಿಟ್ಟಿನಲ್ಲಿ ಮಾರಕವಾಗಿ ಪರಿಣಮಿಸಿದೆ. ದೇಶದ ಹಲವು ರಾಜ್ಯಗಳಲ್ಲಿ ಮಾನವ ಕಳ್ಳಸಾಗಾಣಿಕೆ ಜಾಲಗಳು ಸಕ್ರಿಯವಾಗಿದ್ದು, ಇವು ಮಕ್ಕಳು ಮತ್ತು ಮಹಿಳೆಯರನ್ನು ಗುರಿಯಾಗಿಸಿ ಅಪಹರಣ ಮಾಡುತ್ತಿವೆ. ಬಳಿಕ ಅವರನ್ನು ಸಮಾಜವಿರೋಧಿ ಕೃತ್ಯಗಳಿಗೆ ನೂಕಲಾಗುತ್ತದೆ. ಮಾನವ ಕಳ್ಳಸಾಗಾಣಿಕೆ ಜಾಲಗಳ ವಿರುದ್ಧ ತನಿಖೆ ಮತ್ತು ಕ್ರಮದ ಪ್ರಮಾಣ ಮುಂಚೆಗಿಂತ ಸುಧಾರಣೆಯಾಗಿದ್ದರೂ, ಈ ವಿಷಯದಲ್ಲಿ ರಾಜ್ಯಗಳ ನಡುವೆ ಸಮನ್ವಯ ಮತ್ತು ಸಹಕಾರ ಅತ್ಯಗತ್ಯವಾಗಿದೆ. ಇಂಥ ಪ್ರಕರಣಗಳ ಜಾಡು ಹಿಡಿದು ಪೊಲೀಸರು ಇತರ ರಾಜ್ಯಕ್ಕೆ ಹೋದಾಗ ಸ್ಥಳಿಯ ಪೊಲೀಸರ ಸಹಕಾರ ಸಿಗದೆ ಪ್ರಕರಣಗಳ ತನಿಖೆ ತಾರ್ಕಿಕ ಅಂತ್ಯ ಕಾಣುತ್ತಿಲ್ಲ.

ಸಮಾಜದಲ್ಲಿ ಅಪರಾಧ ನಿಯಂತ್ರಣ ಅತ್ಯಂತ ಅವಶ್ಯಕ. ಈ ನಿಟ್ಟಿನಲ್ಲಿ ಪ್ರಯತ್ನಗಳು ನಡೆಯುತ್ತಿವೆಯಾದರೂ, ಮಕ್ಕಳ ಅಪಹರಣದಂಥ ಘಟನೆಗಳು ಕಾನೂನು ಸುವ್ಯವಸ್ಥೆಯ ಬಗ್ಗೆ ಪ್ರಶ್ನೆ ಮೂಡಿಸುತ್ತವೆ. ಕರ್ನಾಟದಲ್ಲಿಯೂ ಪರಿಸ್ಥಿತಿ ಭಿನ್ನವಾಗೇನೂ ಇಲ್ಲ. 2020ರಿಂದ 2025ರವರೆಗಿನ ಅವಧಿಯಲ್ಲಿ ರಾಜ್ಯದಲ್ಲಿ 14,878 ಮಕ್ಕಳ ಅಪಹರಣ ಮಾಡಲಾಗಿದೆ. ಈ ಪೈಕಿ 4086 ಗಂಡುಮಕ್ಕಳು ಮತ್ತು 10,792 ಹೆಣ್ಣುಮಕ್ಕಳು. ಇದರಲ್ಲಿ 3753 ಗಂಡುಮಕ್ಕಳು ಮತ್ತು 9783 ಹೆಣ್ಣುಮಕ್ಕಳು ಪತ್ತೆಯಾಗಿದ್ದಾರೆ. ಇದೇ ಐದು ವರ್ಷಗಳ ಅವಧಿಯಲ್ಲಿ ಪೊಲೀಸರು ಮಕ್ಕಳ ಅಪಹರಣ ಪ್ರಕರಣದಲ್ಲಿ 634 ಆರೋಪಿಗಳನ್ನು ಬಂಧಿಸಿದ್ದಾರೆ. ಕಳೆದ ಐದು ವರ್ಷಗಳಲ್ಲಿ ರಾಜಧಾನಿ ಬೆಂಗಳೂರಲ್ಲೆ 4849 ಮಕ್ಕಳ ಅಪಹರಣ ಪ್ರಕರಣ ದಾಖಲಾಗಿವೆ. ಬೆಂಗಳೂರಿನಲ್ಲಿ ಇದೇ ವರ್ಷದ ಜುಲೈನಲ್ಲಿ ಟ್ಯೂಷನ್​ ಮುಗಿಸಿಕೊಂಡು ಮನೆಗೆ ಮರಳುತ್ತಿದ್ದ 13 ವರ್ಷದ ಬಾಲಕನೊಬ್ಬನನ್ನು ದುರುಳರು ಅಪಹರಿಸಿ, ಹತ್ಯೆ ಮಾಡಿದ ಟನೆ ತಲ್ಲಣ ಮೂಡಿಸಿತ್ತು.

ಯಾವುದೇ ಮಗು ನಾಪತ್ತೆಯಾದರೆ ಸುಪ್ರೀಂ ಕೋರ್ಟ್​ನ ಸೂಚನೆಯ ಪ್ರಕಾರ ಅಪಹರಣ ಪ್ರಕರಣ ಎಂದೇ ಪರಿಗಣಿಸಿ ಪೊಲೀಸರು ತನಿಖೆ ಮಾಡ್ತಾರೆ. ಆದರೆ, ಹೀಗೆ ಅಹರಣಕ್ಕೊಳಗಾದ ಮಕ್ಕಳನ್ನು ಬೇರೆ ರಾಜ್ಯ, ದೇಶಗಳಿಗೆ ಸಾಗಿಸಲಾಗುತ್ತಿದ್ದು, ತನಿಖಾ ಸಂಸ್ಥೆಗಳಿಗೂ ತಲೆನೋವಾಗಿ ಪರಿಣಮಿಸಿದೆ. ಅಪ್ರಾಪ್ತ ಹೆಣ್ಣುಮಕ್ಕಳ ಅಪಹರಣ ಪ್ರಕರಣಗಳು ಹೆಚ್ಚಿರುವುದು ಆತಂಕಕಾರಿ. ಈಗ ಸುಪ್ರೀಂ ಕೋರ್ಟ್​ ಕೂಡ ಈ ಟನೆಗಳನ್ನು ಗಂಭೀರವಾಗಿ ಪರಿಗಣಿಸಿದೆ. ಈ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಸೂಕ್ತ ತನಿಖೆ ನಡೆಸಿ, ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು. ಮಾನವ ಕಳ್ಳಸಾಗಾಣಿಕೆ ಜಾಲಗಳನ್ನು ಬೇರು ಸಮೇತ ನಿಮೂರ್ಲನಗೊಳಿಸಬೇಕು