ಸಂಪಾದಕೀಯ: ಹಾಲಿನ ಕಲಬೆರಕೆ ಅಪಾಯಕಾರಿ | Milk adulteration

ಮಾರಾಟಗಾರರು ಹಾಲಿಗೆ ಯೂರಿಯಾ, ಸಕ್ಕರೆ, ಡಿಟರ್ಜೆಂಟ್ ಪೌಡರ್, ಸ್ಟಾರ್ಚ್ ಮುಂತಾದ ರಾಸಾಯನಿಕಗಳನ್ನು ಸೇರಿಸುತ್ತಿರುವುದು ಕಂಡುಬಂದಿದೆ. ಆಹಾರ ಸುರಕ್ಷತಾ ತಜ್ಞರ ಪ್ರಕಾರ, ಯೂರಿಯಾ ಮಿಶ್ರಿತ ಹಾಲನ್ನು ದೀರ್ಘಾವಧಿ ಬಳಕೆ ಮಾಡಿದರೆ ಮನುಷ್ಯರ ಮೂತ್ರಪಿಂಡ ಮತ್ತು ಯಕೃತ್ನಲ್ಲಿ ಗಂಭೀರ ಸಮಸ್ಯೆಗಳು ತಲೆದೋರುತ್ತವೆ. ಡಿಟರ್ಜೆಂಟ್ ಅಂಶಗಳು ಜೀರ್ಣಾಂಗ ವ್ಯವಸ್ಥೆಗೆ ಹಾನಿ ಉಂಟು ಮಾಡುತ್ತವೆ. ಮಕ್ಕಳಲ್ಲಿ ಪೋಷಕಾಂಶವನ್ನು ಕುಂಠಿತಗೊಳಿಸಿ ಬೆಳವಣಿಗೆಗೆ ತಡೆ ಒಡ್ಡುತ್ತವೆ. ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ನಡೆಸಿದ ಹಲವು ಅಧ್ಯಯನಗಳು ಸಹ ಕಲಬೆರಕೆ ಆಹಾರ ಸೇವನೆ ಮನುಷ್ಯರಲ್ಲಿ ದೀರ್ಘಕಾಲೀನ ಆರೋಗ್ಯ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ ಎಂದು ಎಚ್ಚರಿಸಿವೆ.

ಭಾರತ ಜಗತ್ತಿನ ಅತಿ ದೊಡ್ಡ ಹಾಲು ಉತ್ಪಾದಕ ದೇಶವಾಗಿದ್ದು, ವರ್ಷಕ್ಕೆ ಸುಮಾರು 230 ದಶಲಕ್ಷ ಟನ್ಗಿಂತ ಹೆಚ್ಚು ಹಾಲು ಉತ್ಪಾದನೆ ಆಗುತ್ತದೆ. ಕರ್ನಾಟಕವೂ ಹೈನುಗಾರಿಕೆಯಲ್ಲಿ ಮುಂಚೂಣಿಯಲ್ಲಿರುವ ರಾಜ್ಯ. ಸರ್ಕಾರ ಹೈನುಗಾರರ ಏಳಿಗೆಗಾಗಿ ಪ್ರೋತ್ಸಾಹಧನ, ಸಹಕಾರಿ ಸಂಸ್ಥೆಗಳಿಂದ ಸಾಲ ವ್ಯವಸ್ಥೆ ಮತ್ತು ಹೈನುಗಾರಿಕೆಗೆ ತಾಂತ್ರಿಕ ನೆರವು ಮುಂತಾದವುಗಳನ್ನು ಹಲವು ದಶಕಗಳಿಂದ ಒದಗಿಸುತ್ತಿದೆ. ಆದರೂ ಮಧ್ಯವರ್ತಿಗಳು ಮತ್ತು ಕೆಲ ಲಾಭಾಸಕ್ತ ವ್ಯಕ್ತಿಗಳು ನಡೆಸುವ ಕುಕೃತ್ಯ, ಅಕ್ರಮ ವ್ಯವಹಾರಗಳಿಂದ ಇಡೀ ಹೈನುಗಾರಿಕೆ ಕ್ಷೇತ್ರದ ವಿಶ್ವಾಸಾರ್ಹತೆಗೆ ಧಕ್ಕೆ ಉಂಟಾಗುತ್ತಿದೆ. ಇದರಿಂದ ಪ್ರಾಮಾಣಿಕ ಹೈನುಗಾರರೂ ಸಂಶಯದ ಸುಳಿಯಲ್ಲಿ ಸಿಲುಕುವಂತಾಗಿದೆ.

ಕೇವಲ ಮನವಿ ಅಥವಾ ಎಚ್ಚರಿಕೆಗಳಿಂದ ಈ ಸಮಸ್ಯೆ ಪರಿಹಾರವಾಗುವುದಿಲ್ಲ. ಆಹಾರ ಸುರಕ್ಷತಾ ಮತ್ತು ಮಾನದಂಡಗಳ ಕಾಯ್ದೆ (ಎಫ್ಎಸ್ಎಸ್ ಆಕ್ಟ್) ಅಡಿಯಲ್ಲಿ ಇರುವ ದಂಡ ಮತ್ತು ಶಿಕ್ಷೆಗಳನ್ನು ಇನ್ನಷ್ಟು ಕಟ್ಟುನಿಟ್ಟಾಗಿ, ಕಠಿಣವಾಗಿ ಜಾರಿಗೆ ತರಬೇಕು. ಹಾಲು ಸಂಗ್ರಹ ಕೇಂದ್ರಗಳಿಂದ ಹಿಡಿದು ಮಾರಾಟದ ಹಂತದವರೆಗೆ ನಿಯಮಿತ ಹಾಗೂ ಅನಿರೀಕ್ಷಿತ ತಪಾಸಣೆ ಮಾಡಬೇಕು. ತ್ವರಿತ ಪರೀಕ್ಷಾ ಕಿಟ್​​ಗಳನ್ನು ಗ್ರಾಮೀಣ ಮಟ್ಟಕ್ಕೂ ವಿಸ್ತರಿಸಬೇಕು. ತಪ್ಪಿತಸ್ಥರ ಹೆಸರುಗಳನ್ನು ಸಾರ್ವಜನಿಕಗೊಳಿಸುವುದು ಮತ್ತು ಪರವಾನಗಿ ರದ್ದು ಮಾಡುವುದು ಮುಂತಾದ ಕ್ರಮಗಳನ್ನು ನಿರ್ದಾಕ್ಷಿಣ್ಯವಾಗಿ ಕೈಗೊಳ್ಳಬೇಕು. ಲಾಭದ ಆಸೆಯಿಂದ ಸಮಾಜದ ಆರೋಗ್ಯಕ್ಕೆ ಕುತ್ತು ತರುವುದು ಯಾವ ಕಾರಣಕ್ಕೂ ಸಮರ್ಥನೀಯವಲ್ಲ. ಗ್ರಾಹಕರ ನಂಬಿಕೆಯನ್ನು ಉಳಿಸುವುದು ಸರ್ಕಾರ, ವ್ಯವಸ್ಥೆ ಮತ್ತು ಹೈನುಗಾರಿಕೆ ಕ್ಷೇತ್ರದ ಸಾಮೂಹಿಕ ಜವಾಬ್ದಾರಿ.