ಸಂಪಾದಕೀಯ| ಮೌಲ್ಯಗಳು ಉಳಿಯಲಿ

ಶಿಕ್ಷಣವೆಂದರೆ ಕೇವಲ ಅಕ್ಷರಾಭ್ಯಾಸವಲ್ಲ; ಅದು ಮನುಷ್ಯನ ವ್ಯಕ್ತಿತ್ವವನ್ನು ಅರಳಿಸಿ ಸತ್ಪ್ರಜೆಯನ್ನಾಗಿಸುವ ಸಂಸ್ಕಾರ. ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಅವರ ಜನ್ಮದಿನವನ್ನು ‘ಶಿಕ್ಷಕರ ದಿನ’ವನ್ನಾಗಿ ಆಚರಿಸುವಾಗ, ಸಮಾಜವನ್ನು ಕತ್ತಲೆಯಿಂದ ಬೆಳಕಿನೆಡೆಗೆ ಮುನ್ನಡೆಸುವ ಗುರುವಿನ ಮಹತ್ವವನ್ನು ಸ್ಮರಿಸುವುದು ಅತ್ಯಂತ ಪ್ರಸ್ತುತ. ಶಿಕ್ಷಕ ಕೇವಲ ಪಠ್ಯವನ್ನು ಬೋಧಿಸುವ ಉದ್ಯೋಗಿಯಲ್ಲ, ಬದಲಿಗೆ ಭವಿಷ್ಯದ ತಲೆಮಾರನ್ನು ರೂಪಿಸುವ ಶಿಲ್ಪಿ. ಶಿಕ್ಷಕರು ವಿದ್ಯಾರ್ಥಿಗಳಲ್ಲಿ ಸತ್ಯ, ಕರುಣೆ, ಶಿಸ್ತು, ಮತ್ತು ಸಮಾನತೆಯ ಮೌಲ್ಯಗಳನ್ನು ಬಿತ್ತುವ ಮೂಲಕ ಅವರ ನೈತಿಕ ದಿಕ್ಸೂಚಿಯಾಗಿದ್ದಾರೆ. ತರಗತಿಯ ನಾಲ್ಕು ಗೋಡೆಗಳ ನಡುವೆ ಶಿಕ್ಷಕರು ತೋರುವ ಪ್ರೀತಿ ಮತ್ತು ನಿಷ್ಪಕ್ಷಪಾತ ಧೋರಣೆ ಮಕ್ಕಳಲ್ಲಿ ಸಾಮಾಜಿಕ ಜವಾಬ್ದಾರಿಯನ್ನು ಬೆಳೆಸುತ್ತದೆ.

ಇಂದಿನ ತಂತ್ರಜ್ಞಾನ ಆಧಾರಿತ ಜಗತ್ತಿನಲ್ಲಿ ಶಿಕ್ಷಕರ ಪಾತ್ರವು ಕೇವಲ ‘ಜ್ಞಾನದ ಮೂಲ’ವಾಗಿ ಉಳಿದಿಲ್ಲ; ಬದಲಿಗೆ ‘ಜ್ಞಾನದ ಮಾರ್ಗದರ್ಶಕ’ನಾಗಿ ರೂಪಾಂತರಗೊಂಡಿದೆ. ಇಂಟರ್ನೆಟ್ ಮೂಲಕ ಮಾಹಿತಿ ಸುಲಭವಾಗಿ ಸಿಗುತ್ತಿರುವ ಕಾಲದಲ್ಲಿ, ಸ್ಮಾರ್ಟ್​ಕ್ಲಾಸ್, ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಆನ್​ಲೈನ್ ಕಲಿಕಾ ಮಾದರಿಗಳಿಗೆ ತೆರೆದುಕೊಳ್ಳುವುದು ಅಗತ್ಯವಾಗಿದೆ. ಅಲ್ಲದೆ, ಸ್ಪರ್ಧಾತ್ಮಕ ಒತ್ತಡ, ಏಕಾಗ್ರತೆಯ ಕೊರತೆ ಮತ್ತು ಸಾಮಾಜಿಕ ಮಾಧ್ಯಮಗಳ ವ್ಯಸನದಿಂದ ಬಳಲುತ್ತಿರುವ ವಿದ್ಯಾರ್ಥಿಗಳಿಗೆ ಆಪ್ತಸಮಾಲೋಚಕರಾಗಿ ನಿಲ್ಲುವುದು ಮತ್ತು ಅಂಕಗಳ ಬೆನ್ನಟ್ಟುವಿಕೆಯ ನಡುವೆ ಮಕ್ಕಳ ಸೃಜನಶೀಲತೆ ಮತ್ತು ಮಾನವೀಯ ಗುಣಗಳು ಕಮರಿಹೋಗದಂತೆ ಕಾಯ್ದುಕೊಳ್ಳುವುದು ಶಿಕ್ಷಕರ ಕರ್ತವ್ಯ.

ಹೊಸ ಶಿಕ್ಷಣ ನೀತಿಯ ಜಾರಿ, ಪಠ್ಯೇತರ ಜವಾಬ್ದಾರಿಗಳು ಹಾಗೂ ನಿರಂತರ ಆಡಳಿತಾತ್ಮಕ ಕೆಲಸಗಳ ನಡುವೆಯೂ ಶಿಕ್ಷಕ ಸಮುದಾಯದ ಬದ್ಧತೆ ಕುಂದಿಲ್ಲ. ಹಳ್ಳಿ-ನಗರಗಳೆನ್ನದೆ ಕಟ್ಟಕಡೆಯ ಮಗುವಿಗೂ ಸಮಾನ ಶಿಕ್ಷಣ ಒದಗಿಸಲು ಶಿಕ್ಷಕರು ಪಡುತ್ತಿರುವ ಶ್ರಮ ಅಗಾಧ. ಬದಲಾದ ಸಮಾಜದಲ್ಲಿ ಮಗುವಿಗೆ ಉತ್ತಮ ವಾತಾವರಣ ನಿರ್ವಿುಸುವಲ್ಲಿ ಪಾಲಕರು ಮತ್ತು ಶಿಕ್ಷಕರ ನಡುವಿನ ಹೊಂದಾಣಿಕೆ ಎಂದಿಗಿಂತಲೂ ಹೆಚ್ಚು ಅನಿವಾರ್ಯವಾಗಿದೆ.

ಶಿಕ್ಷಣ ಇಲಾಖೆಯ ಸಮಸ್ಯೆಗಳನ್ನು ಬಗೆಹರಿಸುವತ್ತ ಸರ್ಕಾರ ಇಚ್ಛಾಶಕ್ತಿ ಪ್ರದರ್ಶಿಸಬೇಕು. ಮುಖ್ಯವಾಗಿ, ಶಿಕ್ಷಕರನ್ನು ಅನ್ಯ ಕಾರ್ಯಗಳಿಗೆ ನಿಯೋಜನೆ ಮಾಡುವ ಪ್ರವೃತ್ತಿಗೆ ಕಡಿವಾಣ ಹಾಕಿ, ಅವರನ್ನು ಶಾಲೆಗಳಲ್ಲಿ ಪಾಠ ಮಾಡಲು ಬಿಟ್ಟರೆ, ಗ್ರಾಮೀಣ ಭಾಗದಲ್ಲಿ ಶಿಕ್ಷಣದ ಗುಣಮಟ್ಟ ಇನ್ನಷ್ಟು ಹೆಚ್ಚುವಲ್ಲಿ ಸಂದೇಹವಿಲ್ಲ. ಶಿಕ್ಷಕರ ನೇಮಕ, ವರ್ಗಾವಣೆಯಂಥ ಸಮಸ್ಯೆಗಳಿಗೂ ರ್ತಾಕ ಅಂತ್ಯ ಸಿಗುವಂತಾಗಲಿ.