ಸಂಪಾದಕೀಯ: ಅಪಾಯಕಾರಿ ನೀತಿ

ಭಾರತದ ವಿರುದ್ಧ ಭಯೋತ್ಪಾದನೆ ನಡೆಸುವುದನ್ನು ದೇಶದ ನೀತಿಯನ್ನಾಗಿ ರೂಪಿಸಲು ಪಾಕಿಸ್ತಾನ ಸೇನೆ ಮತ್ತು ಗುಪ್ತಚರ ಇಲಾಖೆ 1947ರಿಂದಲೇ ಪ್ರಯತ್ನಿಸುತ್ತಿವೆ ಎಂದು ಕಾರ್ಯತಂತ್ರ ಮತ್ತು ಭದ್ರತಾ ವಿಷಯಗಳ ಕುರಿತು ಅಧ್ಯಯನ ನಡೆಸುತ್ತಿರುವ ಸ್ವತಂತ್ರ ಸಂಸ್ಥೆ ನಾಟ್​ಸ್ಟ್ರಾಟ್​ ತನ್ನ ಇತ್ತೀಚಿನ ವರದಿಯಲ್ಲಿ ಉಲ್ಲೇಖಿಸಿದೆ. 1947ರಿಂದ 2025ರವರೆಗೆ ಭಾರತದ ಮೇಲೆ ನಡೆದ ಭಯೋತ್ಪಾದಕ ದಾಳಿಗಳನ್ನು ಸಮಗ್ರವಾಗಿ ವಿಶ್ಲೇಷಿಸಿದ್ದು, ಭಾರತ ವಿರುದ್ಧದ ಭಯೋತ್ಪಾದನೆಯನ್ನು ಐದು ಹಂತಗಳಲ್ಲಿ ವಿಂಗಡಿಸಿದೆ. ಅಲ್ಲದೆ, ಪಾಕ್​ ಭಯೋತ್ಪಾದನೆಯ ಸ್ವರೂಪವನ್ನು ಬದಲಿಸುತ್ತಲೇ ಬಂದಿರುವುದಾಗಿ ಬೊಟ್ಟು ಮಾಡಿದೆ.

1947ರಿಂದ 1971ರ ಅವಧಿಯು ಮೂಲಭೂತ ಸಂರ್ಷಗಳ ಯುಗವಾಗಿತ್ತು. 1972ರಿಂದ 1989ರ ಅವಧಿಯಲ್ಲಿ ಪರೋಕ್ಷ ಯುದ್ಧ ಹೆಚ್ಚಾಗಿತ್ತು. 1990ರಿಂದ 2000ದ ಅವಧಿಯಲ್ಲಿ ಸಂಘರ್ಷ ಇನ್ನಷ್ಟು ಉಲ್ಬಣಗೊಂಡಿತು. 2001ರಿಂದ 2009ರವರೆಗೆ ಭಾರತದ ಪ್ರಮುಖ ಸ್ಥಾನಗಳನ್ನು, ಸ್ವತ್ತುಗಳನ್ನು ಪಾಕ್​ ಪ್ರಾಯೋಜಿತ ಭಯೋತ್ಪಾದಕ ಸಂಟನೆಗಳು ಗುರಿ ಮಾಡಿದವು. 2010ರಿಂದ 2025ರವೆರಗೆ ಭಯೋತ್ಪಾದನೆಯ ರೂಪಾಂತರ ಮತ್ತು ಭಾರತದಿಂದ ತಕ್ಕ ಪ್ರತ್ಯುತ್ತರ ಕಂಡುಬಂತು ಎಂದು ವಿವರಿಸಿರುವ ವರದಿ, ಪಾಕಿಸ್ತಾನ ತನ್ನ ಕಾರ್ಯತಂತ್ರಗಳನ್ನು ಬದಲಿಸುತ್ತ ಭಯೋತ್ಪಾದನೆ ನೀತಿಯನ್ನು ಹೆಚ್ಚು ಕಠಿಣಗೊಳಿಸುತ್ತ ಬಂದಿದೆ ಎಂದು ತಿಳಿಸಿದೆ. ಇದು ಪಾಕ್​ನ ಧೂರ್ತತನಕ್ಕೆ ಸಾಕ್ಷಿಯಾಗಿದ್ದು, ಆ ರಾಷ್ಟ್ರ ಎಂದೂ ಬದಲಾಗುವುದಿಲ್ಲ ಎಂಬುದನ್ನು ಸ್ಪಷ್ಟಪಡಿಸುತ್ತದೆ.

ಜಮ್ಮು&ಕಾಶ್ಮೀರದ ಪ್ರವಾಸಿತಾಣ ಪಹಲ್ಗಾಮ್​ನಲ್ಲಿ 2025ರ ಏಪ್ರಿಲ್​ನಲ್ಲಿ ಭಯೋತ್ಪಾದಕರು ಅಮಾಯಕ ಪ್ರವಾಸಿಗರ ಮೇಲೆ ಭೀಕರ ದಾಳಿ ನಡೆಸಿದರು. ಇದಕ್ಕೆ ಪ್ರತ್ಯುತ್ತರವಾಗಿ "ಆಪರೇಷನ್​ ಸಿಂಧೂರ' ಕಾರ್ಯಾಚರಣೆ ನಡೆಸಿದ ಭಾರತವು ಪಾಕಿಸ್ತಾನ ಮತ್ತು ಪಾಕ್​ ಆಕ್ರಮಿತ ಕಾಶ್ಮೀರ(ಪಿಒಕೆ)ದಲ್ಲಿನ ಉಗ್ರ ಶಿಬಿರ ಹಾಗೂ ಅಡಗುತಾಣಗಳನ್ನು ಧ್ವಂಸಗೊಳಿಸಿತು. ಭಯೋತ್ಪಾದಕರ ನೆಲೆಗಳು ಪಾಕಿಸ್ತಾನದಲ್ಲಿಯೇ ಕಾರ್ಯನಿರ್ವಹಿಸುತ್ತಿವೆ ಮತ್ತು ಅವು ನಿರಂತರವಾಗಿ ಭಾರತದ ವಿರುದ್ಧ ಕಾರ್ಯಾಚರಿಸುತ್ತಿವೆ ಎಂಬ ಸ್ಪಷ್ಟ ಸಾಕ್ಷ್ಯವನ್ನು ಭಾರತ ಅಂತಾರಾಷ್ಟ್ರೀಯ ಸಮುದಾಯದ ಮುಂದೆ ಇರಿಸಿತು. ಆದರೆ, ಭಯೋತ್ಪಾದಕರ ತರಬೇತಿ ಕೇಂದ್ರಗಳನ್ನು ದುರಸ್ತಿಗೊಳಿಸಿ, ಮತ್ತೆ ಅವುಗಳ ಚಟುವಟಿಕೆ ಆರಂಭಿಸಲಾಗುತ್ತಿದೆ ಎಂಬ ಸಂಗತಿ ನಿಜಕ್ಕೂ ಆತಂಕಕಾರಿ ಮಾತ್ರವಲ್ಲ ಪಾಕ್​ನ ರ್ನಿಲಜ್ಯ ಧೋರಣೆಗೆ ದ್ಯೋತಕ.

ಪಾಕ್​ ಮತ್ತು ಪಿಒಕೆಯಲ್ಲಿದ್ದ 72ಕ್ಕೂ ಹೆಚ್ಚು ಭಯೋತ್ಪಾದಕರ ನೆಲೆಗಳನ್ನು ಆಪರೇಷನ್​ ಸಿಂಧೂರ ಕಾರ್ಯಾಚರಣೆಯ ಬಳಿಕ ಗಡಿಯಿಂದ ದೂರದ ಪ್ರದೇಶಗಳಿಗೆ ಸ್ಥಳಾಂತರಿಸಲಾಗಿದೆ. ಪಾಕಿಸ್ತಾನ ಭಯೋತ್ಪಾದನೆಯನ್ನು ಹರಡುತ್ತ, ರಕ್ತದೋಕುಳಿಗೆ ಕಾರಣವಾಗುತ್ತಿದ್ದರೂ ಅಂತಾರಾಷ್ಟ್ರೀಯ ಸಮುದಾಯ ಇದನ್ನು ಇನ್ನೂ ಗಂಭೀರವಾಗಿ ಪರಿಗಣಿಸದಿರುವುದು ವಿಷಾದನೀಯ. ಪಾಕ್​ ಮೂಲದ ಭಯೋತ್ಪಾದನೆಯು ಭಾರತಕ್ಕೆ ಮಾತ್ರವಲ್ಲ ಜಾಗತಿಕ ಭದ್ರತೆ ಮತ್ತು ಶಾಂತಿಗೆ ಕಂಟಕ. ಈ ವಾಸ್ತವ ಗೊತ್ತಿದ್ದರೂ, ಅಮೆರಿಕ ಮತ್ತು ಚೀನಾ ತಮ್ಮ ಸ್ವಾರ್ಥಕ್ಕಾಗಿ ಪಾಕ್​ಗೆ ಬೆಂಬಲ ನೀಡುತ್ತಿರುವುದು ಸೂಕ್ತವಲ್ಲ. ಕುಖ್ಯಾತ ಭಯೋತ್ಪಾದಕ ಒಸಾಮಾ ಬಿನ್​ ಲಾಡೆನ್​ನನ್ನು ಪಾಕ್​ ನೆಲದಲ್ಲೇ ಅಮೆರಿಕ ಹೊಡೆದುರಳಿಸಿತ್ತು ಎಂಬುದನ್ನು ಅಂತಾರಾಷ್ಟ್ರೀಯ ವಲಯ ಮರೆಯುವಂತಿಲ್ಲ. ಪಾಕ್​ ಪ್ರಾಯೋಜಿತ ಭಯೋತ್ಪಾದನೆಯ ವಿರುದ್ಧ ಭಾರತವಂತೂ ದಶಕಗಳಿಂದ ಹೋರಾಡುತ್ತಿದೆ. ಈಗ ಅಂತಾರಾಷ್ಟ್ರೀಯ ಮಟ್ಟದಲ್ಲೂ ಕಠಿಣ ಕ್ರಮ ಹಾಗೂ ಕಾರ್ಯಾಚರಣೆಯ ಅಗತ್ಯವಿದೆ.