ಸಂಪಾದಕೀಯ: ವಂಚನೆಗೆ ಕಡಿವಾಣ ಹಾಕಿ

ಹಲವು ಪೆಟ್ರೋಲ್​ ಬಂಕ್​ಗಳಲ್ಲಿ ತಂತ್ರಜ್ಞಾನವನ್ನು ದುರ್ಬಳಕೆ ಮಾಡಿಕೊಂಡು ಗ್ರಾಹಕರನ್ನು ಮರುಳು ಮಾಡುವ ಕೃತ್ಯಗಳು ನಿರಂತರವಾಗಿ ನಡೆಯುತ್ತಲೇ ಇವೆ. ಯಂತ್ರಗಳ ಪಲ್ಸರ್​ ಆ್ಯಂಪ್ಲಿಫೈಯರ್​ ಚಿಪ್​ಗಳಲ್ಲಿ ಬದಲಾವಣೆ ಮಾಡುವುದು, ಡಿಜಿಟಲ್​ ಡಿಸ್​ಪ್ಲೇಯಲ್ಲಿ ತೋರಿಸುವ ಅಳತೆಗೂ ಕೊಳವೆಯ ಮೂಲಕ ವಾಹನದ ಟ್ಯಾಂಕ್​ ಸೇರುವ ಇಂಧನದ ಪ್ರಮಾಣಕ್ಕೂ ವ್ಯತ್ಯಾಸ ಇಡುವುದು ಹಾಗೂ ಬಂಕ್​ ಸಿಬ್ಬಂದಿ ಗ್ರಾಹಕರ ಗಮನ ಬೇರೆಡೆ ಸೆಳೆದು ಜೀರೋ ತೋರಿಸದೆ ಇಂಧನ ತುಂಬುವುದು ಸಾಮಾನ್ಯವಾಗಿಬಿಟ್ಟಿದೆ. ಒಬ್ಬ ಗ್ರಾಹಕನಿಗೆ ಪ್ರತಿ ಲೀಟರ್​ಗೆ ಕೆಲವೇ ಮಿಲಿಲೀಟರ್​ಗಳಷ್ಟು ಇಂಧನ ಕಡಿಮೆ ಸಿಕ್ಕರೂ, ದಿನಕ್ಕೆ ಸಾವಿರಾರು ಲೀಟರ್​ ಮಾರಾಟವಾಗುವ ದೊಡ್ಡ ಬಂಕ್​ಗಳಲ್ಲಿ ಮಾಲೀಕರು ಅಕ್ರಮವಾಗಿ ದಿನಂಪ್ರತಿ ಲಕ್ಷಾಂತರ ರೂ. ಸಂಪಾದಿಸುತ್ತಾರೆ. ಬಡ ಮತ್ತು ಮಧ್ಯಮ ವರ್ಗದ ಜನರ ಬೆವರಿನ ದುಡಿಮೆ ಹೀಗೆ ಪೋಲಾಗುತ್ತಿರುವುದು ಆಡಳಿತ ವ್ಯವಸ್ಥೆಯ ವೈಫಲ್ಯಕ್ಕೆ ಸಾಕ್ಷಿಯಾಗಿದೆ.

ಈ ನಿಟ್ಟಿನಲ್ಲಿ, ಕಾನೂನು ಮಾಪನಶಾಸ್ತ್ರ ಇಲಾಖೆಯು ಸಾರ್ವಜನಿಕರಿಂದ ದೂರುಗಳು ಬಂದಾಗ ಅಥವಾ ಮಾಧ್ಯಮಗಳಲ್ಲಿ ಸುದ್ದಿ ಪ್ರಸಾರವಾದಾಗ ಮಾತ್ರ ಜಾಗೃತಗೊಂಡು ಕಾರ್ಯಾಚರಣೆ ನಡೆಸುವುದಕ್ಕೆ ಸೀಮಿತವಾಗಬಾರದು. ರಾಜ್ಯಾದ್ಯಂತ ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿರುವ ಪ್ರತಿಯೊಂದು ಇಂಧನ ಬಂಕ್​ಗಳ ಮೇಲೆ ದಿಢೀರ್​ ದಾಳಿ ನಡೆಸಿ ತಪಾಸಣೆ ಮಾಡಬೇಕು. ತಪಾಸಣೆಯ ಸಮಯದಲ್ಲಿ ಅಳತೆ ಲೋಪ ಅಥವಾ ತಂತ್ರಜ್ಞಾನ ದುರ್ಬಳಕೆ ಪತ್ತೆಯಾದ ತಕ್ಷಣವೇ ಅಂತಹ ಬಂಕ್​ಗಳ ಪರವಾನಗಿಯನ್ನು ಶಾಶ್ವತವಾಗಿ ರದ್ದುಗೊಳಿಸಬೇಕು. ಸಣ್ಣ ಪ್ರಮಾಣದ ದಂಡ ವಿಧಿಸಿ ಬಿಟ್ಟುಬಿಟ್ಟರೆ ಇಂತಹ ಅಕ್ರಮಗಳು ಮುಂದುವರಿಯುತ್ತವೆ. ವಂಚಕರ ವಿರುದ್ಧ ಕ್ರಿಮಿನಲ್​ ಪ್ರಕರಣ ದಾಖಲಿಸಬೇಕು.

ಮತ್ತೊಂದೆಡೆ, ತೈಲ ಕಂಪನಿಗಳು ಸಹ ಜವಾಬ್ದಾರಿ ಹೊರಬೇಕು. ಡಿಜಿಟಲ್​ ತಂತ್ರಜ್ಞಾನದ ಈ ಯುಗದಲ್ಲಿ, ತೈಲ ವಿತರಣಾ ಯಂತ್ರಗಳಲ್ಲಿ ಯಾವುದೇ ರೀತಿಯ ಅಕ್ರಮ ಅಥವಾ ಅಳತೆ ವ್ಯತ್ಯಾಸವಾದ ತಕ್ಷಣ ಕೇಂದ್ರೀಯ ವ್ಯವಸ್ಥೆಗೆ ಸೂಚನೆ ರವಾನೆಯಾಗುವಂತಹ ಸ್ವಯಂಚಾಲಿತ ಡಿಜಿಟಲ್​ ಕಣ್ಗಾವಲು ವ್ಯವಸ್ಥೆಯನ್ನು ಅಳವಡಿಸಬೇಕು. ಗ್ರಾಹಕರು ಸಹ ಜಾಗೃತರಾಗಿ, ಸಂಶಯ ಬಂದ ತಕ್ಷಣ 5 ಲೀಟರ್​ ಪ್ರಮಾಣಿತ ಅಳತೆ ಕಪ್​ ಮೂಲಕ ತಪಾಸಣೆ ನಡೆಸುವಂತೆ ಒತ್ತಾಯಿಸಬೇಕು. ಸರ್ಕಾರವು ಈ ವಂಚನೆ ಜಾಲಕ್ಕೆ ಸಂಪೂರ್ಣ ಕಡಿವಾಣ ಹಾಕಿ, ಗ್ರಾಹಕರ ಹಿತಾಸಕ್ತಿಯನ್ನು ರಕ್ಷಿಸಲು ಶೂನ್ಯ ಸಹಿಷ್ಣುತಾ ನೀತಿಯನ್ನು ಜಾರಿಗೆ ತರಬೇಕು.