ಸಂಪಾದಕೀಯ; ವಿಶ್ವಾಸಾರ್ಹತೆಯೇ ಮುಖ್ಯ

ಸ್ಪಷ್ಟವಾದ ನೀತಿಗಳು, ಸಂಕಷ್ಟಗಳನ್ನು ಪರಿಣಾಮಕಾರಿಯಾಗಿ ಎದುರಿಸುತ್ತಿರುವ ರೀತಿ ಮತ್ತು ಬೆಳವಣಿಗೆಯ ವಿಷಯದಲ್ಲಿ ವೇಗದ ಹೆಜ್ಜೆಯು ಜಾಗತಿಕ ಮಟ್ಟದಲ್ಲಿ ಭಾರತದ ಮೇಲಿನ ವಿಶ್ವಾಸವನ್ನು ಹೆಚ್ಚಿಸಿದೆ. ಆಸ್ಟ್ರೇಲಿಯಾದ ಚಿಂತಕರ ಚಾವಡಿ "ಲೋವಿ ಇನ್​ಸ್ಟಿಟ್ಯೂಟ್​' ನಡೆಸಿದ ಸಮೀಕ್ಷೆಯಲ್ಲಿ ಡೊನಾಲ್ಡ್​ ಟ್ರಂಪ್​ ನೇತೃತ್ವದ ಅಮೆರಿಕ, ಷಿ ಜಿನ್​ಪಿಂಗ್​ ನೇತೃತ್ವದ ಚೀನಾ ಮತ್ತು ವ್ಲಾದಿಮಿರ್​ ಪುತಿನ್​ ನೇತೃತ್ವದ ರಷ್ಯಾಕ್ಕಿಂತ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಭಾರತವನ್ನು ಜನರು ಹೆಚ್ಚು ನಂಬುತ್ತಾರೆ ಎಂದು ತಿಳಿಸಲಾಗಿದೆ.

ಜಾಗತಿಕವಾಗಿ ಸೂಪರ್​ ಪವರ್​ ಎನಿಸಿಕೊಂಡಿರುವ ದೇಶಗಳ ಬಗ್ಗೆ ಇತ್ತೀಚಿನ ವರ್ಷಗಳಲ್ಲಿ ಜನರ ವಿಶ್ವಾಸ ಕುಸಿಯುತ್ತಿದ್ದು, ಭಾರತದಂತಹ ಪ್ರಜಾಪ್ರಭುತ್ವ ರಾಷ್ಟ್ರಗಳ ಸ್ಥಿರತೆಗೆ ಮನ್ನಣೆ ಸಿಗುತ್ತಿದೆ. ಜಗತ್ತಿನ ಪ್ರಮುಖ ದೇಶಗಳಾದ ಅಮೆರಿಕ, ಬ್ರಿಟನ್​ನಲ್ಲಿ ಆಗಾಗ ನಾಯಕತ್ವ ಬದಲಾವಣೆ ಮತ್ತು ನೀತಿಗಳಲ್ಲಿ ಏರಿಳಿತಗಳು ಕಾಣಿಸುತ್ತಿದ್ದರೆ, ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಭಾರತವು ಕಳೆದ 12 ವರ್ಷಗಳಿಂದ ಸ್ಥಿರವಾದ ಮತ್ತು ಮುನ್ಸೂಚಿಸಬಹುದಾದ ವಿದೇಶಾಂಗ ನೀತಿಯನ್ನು ಅನುಸರಿಸುತ್ತಿದೆ.

ರಷ್ಯಾ-ಯುಕ್ರೇನ್​ ಯುದ್ಧ ಅಥವಾ ಅಮೆರಿಕ-ಚೀನಾ ಶೀತಲ ಸಮರದ ನಡುವೆಯೂ ಭಾರತವು ಯಾವುದೇ ಒಂದು ಬಣಕ್ಕೆ ವಾಲದೆ, ತನ್ನ ಸ್ವತಂತ್ರ ನಿಲುವನ್ನು ಕಾಯ್ದುಕೊಂಡಿದೆ. ಇದು ಭಾರತವನ್ನು ಎಲ್ಲರನ್ನೂ ಒಳಗೊಳ್ಳುವ ಮಿತ್ರನಾಗಿಸಿ, ವಿಶ್ವಬಂಧು ಆಗಿ ಬಿಂಬಿಸಿದೆ. ಭಾರತವು ಆರ್ಥಿಕತೆಯಲ್ಲಿ ಕೂಡ ಮುಂದಡಿ ಇಟ್ಟಿದ್ದು, ವಿತ್ತೀಯ ಬೆಳವಣಿಗೆ ದರ (ಜಿಡಿಪಿ) ಅಭಿವೃದ್ಧಿಶೀಲ ರಾಷ್ಟ್ರಗಳಿಗಿಂತ ಹೆಚ್ಚಿರುವುದು ಸಾಮಾನ್ಯ ಸಂಗತಿಯೇನಲ್ಲ. ಕ್ವಾಡ್​ (ಅಮೆರಿಕ, ಜಪಾನ್​, ಆಸ್ಟ್ರೇಲಿಯಾ, ಭಾರತ) ಕೂಟದಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದು, ಹಿಂದೂ ಮಹಾಸಾಗರ ವಲಯದಲ್ಲಿ ಶಾಂತಿ ಕಾಪಾಡುವಲ್ಲಿ ಭಾರತದ ಪಾತ್ರವನ್ನು ಜಗತ್ತು ನಂಬುತ್ತಿದೆ.

ತೀವ್ರ ಗೊಂದಲದ ನೀತಿಗಳಿಂದಾಗಿ ಅಮೆರಿಕದ ಮೇಲಿನ ನಂಬಿಕೆ 31%ಕ್ಕೆ ಕುಸಿದಿದ್ದರೆ, ಚೀನಾದ ಆಕ್ರಮಣಕಾರಿ ಧೋರಣೆಯಿಂದಾಗಿ ಅದರ ಮೇಲಿನ ವಿಶ್ವಾಸವೂ ತಳಮಟ್ಟದಲ್ಲಿದೆ. ಇಂತಹ ಪರಿಸ್ಥಿತಿಯಲ್ಲಿ ಶೇಕಡ 50ರಷ್ಟು ವಿಶ್ವಾಸ ಗಳಿಸಿರುವ ಭಾರತವು ಜಾಗತಿಕ ಸ್ಥಿರತೆಯ ದೊಡ್ಡ ಆಧಾರಸ್ತಂಭವಾಗಿ ಹೊರಹೊಮ್ಮಿದೆ. ಈ ಸ್ಥಿರತೆ ಮತ್ತು ಅಭಿವೃದ್ಧಿಯ ವೇಗವು ವಿಶ್ವಾಸಾರ್ಹತೆಯನ್ನು ಹೆಚ್ಚಿಸಿದ್ದು, ಭವಿಷ್ಯದ ದಿನಗಳು ಕೂಡ ಭಾರತದ್ದೇ ಆಗಿವೆ ಎಂಬುದನ್ನು ಹೆಮ್ಮೆಯಿಂದ ಹೇಳಬಹುದು.