ಬೂತ್ ಮಟ್ಟದ ಅಧಿಕಾರಿಗಳು (ಬಿಎಲ್ಒ) ಪ್ರತಿ ಮನೆಗೂ ತೆರಳಿ ಅರ್ಜಿ (ನಮೂನೆ) ನೀಡಿ, ಅವನ್ನು ಭರ್ತಿ ಮಾಡಿಸಬೇಕು ಮತ್ತು ಭರ್ತಿ ಮಾಡಿದ ಅರ್ಜಿಗಳಲ್ಲಿನ ವಿವರಗಳನ್ನು ಆನ್ಲೈನ್ ಮೂಲಕ ತುಂಬಬೇಕು. ಅಲ್ಲದೆ, ಈ ಪ್ರಕ್ರಿಯೆ ಹೇಗೆ ನಡೆಸಬೇಕು, ತಾಂತ್ರಿಕ ತೊಂದರೆಗಳು ಎದುರಾದರೆ ಬಗೆಹರಿಸುವುದು ಹೇಗೆ ಎಂಬ ಕುರಿತಂತೆ ಬಿಎಲ್ಒಗಳಿಗೆ ಸೂಕ್ತ ತರಬೇತಿ ನೀಡಲಾಗಿಲ್ಲ. ಕೈಪಿಡಿ ನೀಡಲಾಗಿದ್ದರೂ, ಅದರಲ್ಲೂ ಹಲವು ಗೊಂದಲಗಳಿವೆ. ಆ್ಯಪ್ನಲ್ಲಿ ವಿವರ ಭರ್ತಿ ಮಾಡುವಾಗ ಆ್ಯಪ್ ಸರಿಯಾಗಿ ಕೆಲಸ ಮಾಡದೆ ಸಿಬ್ಬಂದಿ ಹೈರಾಣಾಗಿದ್ದಾರೆ. ಅಲ್ಲದೆ, ಎಲ್ಲ ಮತದಾರರನ್ನು ಎಸ್ಐಆರ್ ಪ್ರಕ್ರಿಯೆಗೆ ಒಳಪಡಿಸಬೇಕಿರುವುದರಿಂದ ಸಂಬಂಧಪಟ್ಟ ಸಿಬ್ಬಂದಿ ಒಂದೇ ದಿನ ನೂರಾರು ಮನೆಗೆ ಭೇಟಿ ನೀಡುವ ಒತ್ತಡವಿದೆ. ಇದು ಪ್ರಾಯೋಗಿಕವಾಗಿ ಸಾಧ್ಯವಾಗದ ಸಂಗತಿ. ಈ ಎಲ್ಲ ಕ್ರಮಗಳಿಂದ ಬೂತ್ ಮಟ್ಟದ ಅಧಿಕಾರಿಗಳ ಮೇಲೆ ಕೆಲಸದ ಒತ್ತಡ ಹೆಚ್ಚಿದ್ದು, ಆರೋಗ್ಯದ ಸಮಸ್ಯೆಗಳನ್ನು ಸೃಷ್ಟಿಸಿದೆ. ಮಾನಸಿಕ ಒತ್ತಡಕ್ಕೆ ಕಾರಣವಾಗಿದೆ. ಎಸ್ಐಆರ್ ಗಡುವನ್ನು ಡಿ.11ರವರೆಗೆ ವಿಸ್ತರಿಸಲಾಗಿರುವುದೂ ಹೌದಾದರೂ, ಪ್ರಜಾತಾಂತ್ರಿಕ ವ್ಯವಸ್ಥೆಯ ಬಹುಮುಖ್ಯ ಪ್ರಕ್ರಿಯೆಯನ್ನು ತರಾತುರಿಯಲ್ಲಿ ನಡೆಸಬಾರದು, ಲೋಪಗಳಿಗೆ ಅವಕಾಶ ನೀಡಬಾರದು.
