ಸಂಪಾದಕೀಯ | ಭಕ್ತರ ನಂಬಿಕೆಗೆ ಧಕ್ಕೆ

ಜಗತ್​ ಪ್ರಸಿದ್ಧ ತಿರುಪತಿ&ತಿರುಮಲ ದೇವಸ್ಥಾನವು ಭಾರತದ ಆಧ್ಯಾತ್ಮಿಕ, ಧಾರ್ಮಿಕ ವಲಯದ ಅತಿ ಪ್ರಮುಖ ಸ್ಥಳಗಳಲ್ಲಿ ಒಂದು. ಪ್ರತಿ ವರ್ಷ ಕೋಟ್ಯಂತರ ಭಕ್ತರು ಭೇಟಿ ನೀಡುತ್ತಾರೆ. ದೇವರ ಪ್ರಸಾದವಾಗಿ ವಿತರಿಸುವ ಲಡ್ಡು ಅತ್ಯಂತ ಮಧುರ ಮತ್ತು ರುಚಿಕರ ಎಂಬುದೇನೋ ನಿಜವೇ; ಜತೆಗೆ, ಅದು ಪಾವಿತ್ರ್ಯವು ಮತ್ತು ಭಕ್ತರ ನಂಬಿಕೆಯ ದ್ಯೋತಕವೂ ಹೌದು. ಪ್ರತಿದಿನ ಸುಮಾರು 3.5 ಲ ಲಡ್ಡುಗಳನ್ನು ತಯಾರಿಸಿ ವಿತರಿಸಲಾಗುತ್ತದೆ. ಒಂದು ಅಂದಾಜಿನ ಪ್ರಕಾರ, ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಲಡ್ಡುಗಳನ್ನು ತಯಾರಿಸಲು ಪ್ರತಿದಿನ 11,500 ಕೆ.ಜಿ. ತುಪ್ಪ ಬೇಕಾಗುತ್ತದೆ. ವಾರ್ಷಿಕವಾಗಿ ಲಡ್ಡುಗಳ ಮಾರಾಟದಿಂದ ತಿರುಮಲ ತಿರುಪತಿ ದೇವಸ್ಥಾನಕ್ಕೆ (ಟಿಟಿಡಿ) ಸುಮಾರು 500 ಕೋಟಿ ರೂ. ಆದಾಯವೂ ಬರುತ್ತದೆ. ಆದರೆ ಈ ಪವಿತ್ರ ಪ್ರಸಾದದ ತಯಾರಿಕೆಯಲ್ಲಿ 2019ರಿಂದ 2024ರವರೆಗೆ ನಡೆದ ಬೃಹತ್​ ಹಗರಣ ಈಗ ಭಕ್ತರ ಮನಸ್ಸುಗಳನ್ನು ಘಾಸಿಗೊಳಿಸಿದೆ. ಕಲಬೆರಕೆ ತುಪ್ಪ ಬಳಸಿ ಲಡ್ಡು ತಯಾರಿಸಿದ್ದು ಮತ್ತು ಅವುಗಳನ್ನು ಕೋಟ್ಯಂತರ ಭಕ್ತರಿಗೆ ವಿತರಿಸಿದ್ದು ನಂಬಿಕೆಯೊಂದಿಗಿನ ಚೆಲ್ಲಾಟ ಮಾತ್ರವಲ್ಲ, ಭಕ್ತರಿಗೆ ಮಾಡಿರುವ ಭಾರಿ ವಿಶ್ವಾಸದ್ರೋಹ.

2024ರಲ್ಲಿ ಪ್ರಯೋಗಾಲಯ ಪರೀಕ್ಷೆಯೊಂದರಿಂದ ಬಯಲಾದ ಈ ಹಗರಣ "ಬೇಲಿಯೇ ಎದ್ದು ಹೊಲ ಮೇಯ್ದಂತೆ' ಎಂಬ ನಾಣ್ಣುಡಿಯನ್ನು ನೆನಪಿಸುತ್ತದೆ. 5 ವರ್ಷಗಳಲ್ಲಿ ಟಿಟಿಡಿಗೆ ಖಾಸಗಿ ಕಂಪನಿಗಳಿಂದ 68 ಲಕ್ಷ ಕೆ.ಜಿ. ಕಲಬೆರಕೆ ತುಪ್ಪ ಪೂರೈಕೆಯಾಗಿದೆ. ಇದರ ಮೌಲ್ಯ 250 ಕೋಟಿ ರೂ.! ಉತ್ತರಾಖಂಡದ ಭೋಲೆ ಬಾಬಾ ಆರ್ಗ್ಯಾನಿಕ್​ ಡೇರಿಯ ಹೆಸರು ಈ ದುರಾಸೆಯ ಪ್ರಕರಣದಲ್ಲಿ ಪ್ರಮುಖವಾಗಿ ಕೇಳಿಬಂದಿದೆ. ಸ್ವಲ್ಪವೂ ಹಾಲು ಖರೀದಿಸದೇ ತಾಳೆ ಎಣ್ಣೆ, ಪ್ರಾಣಿಗಳ ಕೊಬ್ಬು, ರಾಸಾಯನಿಕಗಳಾದ ಮಾನೋಡಿಗ್ಲಿಸರೈಡ್ಸ್​, ಅಸೆಟಿಕ್​ ಆ್ಯಸಿಡ್​ ಮಿಶ್ರಣದಿಂದ ಕೃತ್ರಿಮವಾದ ತುಪ್ಪವನ್ನು ತಯಾರಿಸಿ ಅದು ಟಿಟಿಡಿಗೆ ಕಳಿಸಿದೆ. ಇದರಿಂದ 48.76 ಕೋಟಿ ಲಡ್ಡುಗಳಲ್ಲಿ 20 ಕೋಟಿಗೂ ಹೆಚ್ಚು ಲಡ್ಡುಗಳು ಕಲಬೆರಕೆಯಾದಂತಾಗಿದೆ. ಇದು ಭಕ್ತರ ಆರೋಗ್ಯಕ್ಕೂ ಧಕ್ಕೆ ಉಂಟು ಮಾಡುವ ಕೃತ್ಯವಾಗಿದೆ.

ಆಂಧ್ರಪ್ರದೇಶ ಸರ್ಕಾರದ ವಿಶೇಷ ತನಿಖಾ ತಂಡದ (ಎಸ್​ಐಟಿ) ವಿಚಾರಣೆಯಲ್ಲಿ ಈ ಕೃತ್ಯ ಬಹಿರಂಗವಾಗಿದೆ. ಸಿಬಿಐ ತನಿಖೆ ನಂತರ ಭೋಲೆ ಬಾಬಾ ಡೇರಿಯ ಮಾಜಿ ನಿರ್ದೇಶಕರಾದ ಪೊಮಿಲ್​ ಜೈನ್​ ಮತ್ತು ವಿಪಿನ್​ ಜೈನ್​, ವೈಷ್ಣವಿ ಡೇರಿಯ ಅಪೂರ್ವಾ ಚೌಧಾ, ಎಆರ್​ ಡೇರಿಯ ರಾಜು ರಾಜಶೇಖರನ್​ ಅವರನ್ನು ಬಂಧಿಸಲಾಗಿದೆ. ರಾಸಾಯನಿಕಗಳ ಸರಬರಾಜುದಾರ, ದೆಹಲಿಯ ವ್ಯಾಪಾರಿ ಅಜಯ್​ ಕುಮಾರ್​ ಸುಗಂಧ ಕೂಡ ಬಂಧನಕ್ಕೆ ಒಳಗಾಗಿದ್ದಾರೆ. ಟಿಟಿಡಿ ಮಾಜಿ ಅಧ್ಯ ವೈ.ವಿ. ಸುಬ್ಬಾರೆಡ್ಡಿ ಅವರನ್ನು 8 ಗಂಟೆಗಳ ಕಾಲ ಸಿಬಿಐ ಅಧಿಕಾರಿಗಳು ವಿಚಾರಣೆಗೆ ಒಳಪಡಿಸಿದ್ದಾರೆ. ಟಿಟಿಡಿ ಮಾಜಿ ಸಿಇಓ ಮೇಲೂ ಶಂಕೆ ವ್ಯಕ್ತವಾಗಿದೆ.

ಭಕ್ತರ ನಂಬಿಕೆಯ ವಿಷಯದಲ್ಲಿ ಈ ರೀತಿ ಚೆಲ್ಲಾಟ ಆಡಿರುವುದು ಅಕ್ಷಮ್ಯ ಅಪರಾಧ. ವಿಚಾರಣೆಯನ್ನು ತ್ವರಿತಗತಿಯಲ್ಲಿ ಪೂರ್ಣಗೊಳಿಸಿ, ತಪ್ಪಿತಸ್ಥರನ್ನು ಪತ್ತೆ ಹಚ್ಚಿ ಕಠಿಣ ಶಿಕ್ಷೆ ವಿಧಿಸಬೇಕು. ಭವಿಷ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ಮುನ್ನೆಚ್ಚರಿಕೆ ಕ್ರಮಗಳು ಅತ್ಯಗತ್ಯ. ಸರಬರಾಜುದಾರರ ಮೇಲೆ ಕಟ್ಟುನಿಟ್ಟಿನ ನಿಗಾ ಇಡಬೇಕು. ಪ್ರಯೋಗಾಲಯ ಪರೀಕ್ಷೆಗಳನ್ನು ಕಡ್ಡಾಯಗೊಳಿಸಬೇಕು.