ಜನಪ್ರಿಯ ಘೋಷಣೆಗಳಿಗೆ ಮುಗಿಬೀಳದೆ, 2047ರ ಹೊತ್ತಲ್ಲಿ ‘ಅಮೃತ್ ಭಾರತ್’ದ ಕನಸನ್ನು ನನಸಾಗಿಸುವ ನಿಟ್ಟಿನಲ್ಲಿ ದೂರಗಾಮಿ ಯೋಜನೆಗಳು ಹಾಗೂ ಕಾರ್ಯಕ್ರಮಗಳಿಗೆ ಆದ್ಯತೆ ನೀಡಲಾಗಿದೆ. ತಕ್ಷಣವೇ ಇವು ಫಲಿತಾಂಶ ನೀಡದಿದ್ದರೂ, ಮುಂಬರುವ ವರ್ಷಗಳಲ್ಲಿ ಸುಸ್ಥಿರ ಅಭಿವೃದ್ಧಿ ಸಾಧಿಸುವ ನಿಟ್ಟಿನಲ್ಲಿ ಪೂರಕ ಹೆಜ್ಜೆಯಾಗಿವೆ. ಪ್ರಸಕ್ತ ವರ್ಷ ಐದು ರಾಜ್ಯಗಳ ವಿಧಾನಸಭೆ ಚುನಾವಣೆ ನಡೆಯಲಿದ್ದರೂ, ಆ ರಾಜ್ಯಗಳಿಗೆ ಭರ್ಜರಿ ಕೊಡುಗೆಗಳನ್ನು ನೀಡದೆ, ಸಣ್ಣಪುಟ್ಟ ಉಡುಗೊರೆಗಳನ್ನು ಘೋಷಿಸಲಾಗಿದೆ. ಆರ್ಥಿಕ ಬೆಳವಣಿಗೆ ವೇಗಗೊಳಿಸುವುದು ಹಾಗೂ ಸ್ಥಿರತೆ ಕಾಪಾಡುವುದು, ಜನರ ಆಕಾಂಕ್ಷೆಗಳನ್ನು ಈಡೇರಿಸುವುದು ಮತ್ತು ‘ಎಲ್ಲರ ಜತೆಗೆ ಎಲ್ಲರ ವಿಕಾಸ’ ಈ ಮೂರು ಮಂತ್ರಗಳ ಆಧಾರದ ಮೇಲೆ ಬಜೆಟ್ ರೂಪಿಸಲಾಗಿದ್ದು, ಕ್ಯಾನ್ಸರ್, ಮಧುಮೇಹ ಸೇರಿದಂತೆ 17 ಕಾಯಿಲೆಗಳ ಔಷಧದ ಬೆಲೆ ಅಗ್ಗವಾಗಲಿರುವುದು ಸಮಾಧಾನಕರ ಬೆಳವಣಿಗೆ.
