ಇಡಿ ನಿರ್ದೇಶಕ ರಾಹುಲ್ ನವೀನ್ ಅಧಿಕಾರವಧಿ ಒಂದು ವರ್ಷ ವಿಸ್ತರಣೆ; ಕೇಂದ್ರ ಸಚಿವ ಸಂಪುಟ ಅನುಮೋದನೆ | ED Director

ನವದೆಹಲಿ: ಜಾರಿ ನಿರ್ದೇಶನಾಲಯದ ನಿರ್ದೇಶಕ(ED Director) ರಾಹುಲ್ ನವೀನ್ ಅವರ ಸೇವಾವಧಿಯನ್ನು ಒಂದು ವರ್ಷದ ಅವಧಿಗೆ ವಿಸ್ತರಿಸಲಾಗಿದ್ದು, ಇದಕ್ಕೆ ಕೇಂದ್ರ ಸಚಿವ ಸಂಪುಟದ ನೇಮಕಾತಿ ಸಮಿತಿ ಅನುಮೋದನೆ ನೀಡಿದೆ. ಅವರು ಇನ್ನೊಂದು ವರ್ಷ ಇಡಿ ನಿರ್ದೇಶಕರಾಗಿ ಮುಂದುವರಿಯಲಿದ್ದಾರೆ ಎಂದು ಸೋಮವಾರ(ಆ. 10) ವರದಿಯಾಗಿದೆ.

ಇಡಿ ಮುಖ್ಯಸ್ಥ ರಾಹುಲ್ ನವೀನ್ ಅವರ ಅಧಿಕಾರಾವಧಿಯನ್ನು 2026ರ ಆಗಸ್ಟ್ 13ರ ಬಳಿಕ ಒಂದು ವರ್ಷದವರೆಗೆ ವಿಸ್ತರಿಸಲಾಗಿದೆ. ಅವರ ನಿವೃತ್ತಿಯ ದಿನಾಂಕದ ಅಂದರೆ 2027ರ ಜುಲೈ 31ರ ನಂತರದ ಸೇವೆಯ ವಿಸ್ತರಣೆ ಸೇರಿದಂತೆ, ಅಥವಾ ಮುಂದಿನ ಆದೇಶದವರೆಗೆ, ಯಾವುದು ಮೊದಲೋ ಅಲ್ಲಿಯವರೆಗೆ ಇದು ಅನ್ವಯಿಸುತ್ತದೆ ಎಂದು ಹೇಳಲಾಗಿದೆ.

1993ರ ಬ್ಯಾಚ್‌ನ ಆದಾಯ ತೆರಿಗೆ ಇಲಾಖೆ ಅಧಿಕಾರಿಯಾದ ರಾಹುಲ್ ನವೀನ್ ಅವರು, 2019ರ ನವೆಂಬರ್‌ನಲ್ಲಿ ವಿಶೇಷ ನಿರ್ದೇಶಕರಾಗಿ ಏಜೆನ್ಸಿಗೆ ಸೇರಿದರು. 2023 ಸೆಪ್ಟೆಂಬರ್​ನಲ್ಲಿ ಅವರಿಗೆ ED ನಿರ್ದೇಶಕರಾಗಿ ಹೆಚ್ಚುವರಿ ಜವಾಬ್ದಾರಿಯನ್ನು ನೀಡಲಾಯಿತು. ಬಳಿಕ ಆಗಸ್ಟ್ 2024ರಲ್ಲಿ ಪೂರ್ಣ ಸಮಯದ ಮುಖ್ಯಸ್ಥರಾದರು.

ನಿಯಮಗಳ ಪ್ರಕಾರ, ಒಬ್ಬ ಅಧಿಕಾರಿ ಎರಡು ವರ್ಷಗಳ ಅವಧಿಗೆ ED ನಿರ್ದೇಶಕರಾಗಿ ನೇಮಕಗೊಳ್ಳಬಹುದು. ಬಳಿಕ ಮೂರು ಬಾರಿ ಒಂದು ವರ್ಷದ ಸೇವಾ ವಿಸ್ತರಣೆಗಳನ್ನು ಪಡೆಯಬಹುದಾಗಿದೆ. ಇನ್ನೂ ನವೀನ್ ಅವರ ಅವಧಿಯಲ್ಲಿ ರಾಜಕೀಯ ಸಲಹಾ ಸಂಸ್ಥೆ ಐ-ಪಿಎಸಿ, ರಿಲಯನ್ಸ್ ಅನಿಲ್ ಅಂಬಾನಿ ಗ್ರೂಪ್ ಮತ್ತು ಬಹು ಆನ್‌ಲೈನ್ ಹಣದ ಗೇಮಿಂಗ್ ಕಂಪನಿಗಳಿಗೆ ಸಂಬಂಧಿಸಿದ ಹಲವಾರು ಉನ್ನತ ಮಟ್ಟದ ತನಿಖೆಗಳನ್ನು ನಡೆಸುತ್ತಿದೆ (ಏಜೆನ್ಸೀಸ್).