ತಿಂಗಳಿಗೆ 90,000 ರೂ. ಸಂಪಾದನೆ: ಈ ಪಾನಿಪುರಿ ದಾದಾನೇ ಈಗ ಸೋಶಿಯಲ್ ಮೀಡಿಯಾ ಸ್ಟಾರ್! | PaniPuri

ಕಂಟೆಂಟ್ ಕ್ರಿಯೇಟರ್ ಕ್ಯಾಸಿ ಪರೇರಾ ಅವರು ಹಂಚಿಕೊಂಡಿರುವ ವಿಡಿಯೋದಲ್ಲಿ, ಒಬ್ಬ ಸಾಮಾನ್ಯ ಪಾನಿಪುರಿ ಮಾರಾಟಗಾರ ತಿಂಗಳಿಗೆ ಸುಮಾರು 90,000 ರೂಪಾಯಿ ಸಂಪಾದಿಸುತ್ತಾನೆ ಎಂಬ ವಿಷಯ ಬಹಿರಂಗವಾಗಿದೆ. ಇದರರ್ಥ ಆತನ ವಾರ್ಷಿಕ ಆದಾಯ 10.8 ಲಕ್ಷ ರೂಪಾಯಿ! ಇದು ಭಾರತದ ಅನೇಕ ಎಂಜಿನಿಯರಿಂಗ್ ಅಥವಾ ಪದವೀಧರ ಉದ್ಯೋಗಿಗಳ ವಾರ್ಷಿಕ ವೇತನ ಪ್ಯಾಕೇಜ್‌ಗಿಂತ (CTC) ಹೆಚ್ಚಾಗಿದೆ.

ದಿನದ ವಹಿವಾಟು: ಪ್ರತಿದಿನ ಸಂಜೆ 4 ರಿಂದ ರಾತ್ರಿ 10 ಗಂಟೆಯವರೆಗೆ ವ್ಯಾಪಾರ ನಡೆಯುತ್ತದೆ.

ದೈನಂದಿನ ಮಾರಾಟ: ದಿನಕ್ಕೆ ಸುಮಾರು 80 ರಿಂದ 100 ಪ್ಲೇಟ್ ಪಾನಿಪುರಿ ಮಾರಾಟವಾಗುತ್ತದೆ.

ದರ: ಒಂದು ಪ್ಲೇಟ್‌ಗೆ 30 ರೂಪಾಯಿ ನಿಗದಿಪಡಿಸಲಾಗಿದೆ.

ದೈನಂದಿನ ಗಳಿಕೆ: ಸರಾಸರಿ ದಿನಕ್ಕೆ 3,000 ರೂಪಾಯಿ ವಹಿವಾಟು ನಡೆಯುತ್ತದೆ.

ವಿಡಿಯೋದಲ್ಲಿ ಕ್ರಿಯೇಟರ್ ತಾವೇ ಸ್ವತಃ ಆಲೂಗಡ್ಡೆ ಸುಲಿಯುವುದು, ಈರುಳ್ಳಿ ಹೆಚ್ಚುವುದು ಮತ್ತು ಗ್ರಾಹಕರಿಗೆ ಪಾನಿಪುರಿ ಬಡಿಸುವುದನ್ನು ಕಲಿತುಕೊಳ್ಳುವ ಮೂಲಕ ಈ ಕಠಿಣ ಪರಿಶ್ರಮದ ಅನುಭವವನ್ನು ಹಂಚಿಕೊಂಡಿದ್ದಾರೆ.

ಈ ಆದಾಯದ ವಿಷಯ ಹೊರಬರುತ್ತಿದ್ದಂತೆಯೇ ಇಂಟರ್ನೆಟ್‌ನಲ್ಲಿ ದೊಡ್ಡ ಸಂಚಲನವೇ ಸೃಷ್ಟಿಯಾಗಿದೆ."ಇದು ನನ್ನ ವಾರ್ಷಿಕ ಸಿಟಿಸಿಗಿಂತಲೂ ಹೆಚ್ಚಾಗಿದೆ" ಎಂದು ಒಬ್ಬ ಬಳಕೆದಾರರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. "ಬಿ.ಕಾಂ ಪದವಿಗಿಂತ ಒಬ್ಬ ಅಂಗಡಿ ಮಾಲೀಕನೇ ಹೆಚ್ಚು ಸಂಪಾದಿಸುತ್ತಾನೆ" ಎಂದು ಪದವೀಧರರ ಸ್ಥಿತಿಯ ಬಗ್ಗೆ ಕೆಲವರು ವ್ಯಂಗ್ಯವಾಡಿದ್ದಾರೆ. ಇನ್ನು ಕೆಲವರು, "ಇದು ಕೇವಲ ಒಟ್ಟು ವಹಿವಾಟು (Revenue). ಇದರಲ್ಲಿ ಕಚ್ಚಾ ಪದಾರ್ಥಗಳ ವೆಚ್ಚ, ಬಾಡಿಗೆ ಮತ್ತು ಕಠಿಣ ಪರಿಶ್ರಮವನ್ನೂ ಲೆಕ್ಕ ಹಾಕಬೇಕು. ಆಗ ಸಿಗುವ ನಿವ್ವಳ ಲಾಭ ಎಷ್ಟು?" ಎಂದು ಪ್ರಶ್ನಿಸಿದ್ದಾರೆ,(ಏಜೆನ್ಸೀಸ್​).