ಸುಂಕ ಮರುಪಾವತಿ: ಇಂಡಿಗೋ ಮನವಿ ಸಂಬಂಧ ಕಸ್ಟಮ್ಸ್ ಇಲಾಖೆಗೆ ದೆಹಲಿ ಹೈಕೋರ್ಟ್ ನೋಟಿಸ್ | IndiGo

ನವದೆಹಲಿ : ವಿದೇಶದಲ್ಲಿ ದುರಸ್ತಿ ಮಾಡಿ ಪುನಃ ಭಾರತಕ್ಕೆ ತರಲಾದ ವಿಮಾನ ಎಂಜಿನ್‌ಗಳು ಮತ್ತು ಬಿಡಿಭಾಗಗಳ ಮೇಲೆ ಮರು ವಿಧಿಸಲಾದ ₹900 ಕೋಟಿಗೂ ಹೆಚ್ಚಿನ ಮೊತ್ತದ ಕಸ್ಟಮ್ಸ್ ಸುಂಕ ಮರುಪಾವತಿಸಲು ನಿರ್ದೇಶನ ನೀಡಬೇಕು ಎಂದು ಕೋರಿ ಇಂಡಿಗೋ( IndiGo) ಏರ್‌ಲೈನ್ಸ್‌ ಸಲ್ಲಿಸಿದ್ದ ಅರ್ಜಿಗೆ ಸಂಬಂಧಿಸಿದಂತೆ ದೆಹಲಿ ಹೈಕೋರ್ಟ್ ಶುಕ್ರವಾರ (ಡಿ.19) ಕಸ್ಟಮ್ಸ್ ಇಲಾಖೆಗೆ ನೋಟಿಸ್​ ನೀಡಿದೆ. ನ್ಯಾಯಮೂರ್ತಿಗಳಾದ ವಿ ಕಾಮೇಶ್ವರ ರಾವ್ ಮತ್ತು ವಿನೋದ್ ಕುಮಾರ್ ಅವರಿದ್ದ ಪೀಠ ಈ ಆದೇಶ ನೀಡಿದ್ದು 2026ರ ಏಪ್ರಿಲ್‌ನಲ್ಲಿ ಪ್ರಕರಣದ ವಿಚಾರಣೆ ನಡೆಯಲಿದೆ.ಮರು-ಆಮದಿನ ಮೇಲೆ ಕಸ್ಟಮ್ಸ್ ಸುಂಕ ವಿಧಿಸುವುದು ಅಸಾಂವಿಧಾನಿಕ ಮತ್ತು ಒಂದೇ ವಹಿವಾಟಿನ ಮೇಲೆ ಎರಡು ಬಾರಿ ತೆರಿಗೆ ವಿಧಿಸುವುದಕ್ಕೆ ವಿರೋಧ ವ್ಯಕ್ತಪಡಿಸಿ ಇಂಡಿಗೋ ಅರ್ಜಿ ಸಲ್ಲಿಸಿತ್ತು. ಜೊತೆಗೆ ದುರಸ್ತಿ ಎಂಬುದು ಸೇವಾ ವರ್ಗಕ್ಕೆ ಸೇರುವುದರಿಂದ ಅದಕ್ಕೆ ಪ್ರತ್ಯೇಕವಾಗಿ ಮರು ಶುಲ್ಕದ ಮುಖಾಂತರ ಜಿಎಸ್‌ಟಿ ಕೂಡ ಪಾವತಿಸಲಾಗಿದೆ. ಆದರೆ ಕಸ್ಟಮ್ಸ್ ಇಲಾಖೆ ಅದೇ ವಹಿವಾಟನ್ನು ಸರಕುಗಳ ಆಮದು ಎಂದು ಪರಿಗಣಿಸಿ ಮತ್ತೆ ಸುಂಕ ವಿಧಿಸಿದ್ದು ಇದು ಅಸಾಂವಿಧಾನಿಕ ಹಾಗೂ ಎರಡು ಬಾರಿ ವಿಧಿಸಲಾದ ತೆರಿಗೆ ಎಂದು ದೂರಲಾಗಿತ್ತು.

ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಕಸ್ಟಮ್ಸ್‌ ನ್ಯಾಯಮಂಡಳಿ ಇಂಡಿಗೋ ಪರ ತೀರ್ಪು ನೀಡಿದ್ದರೂ, ಇಲಾಖೆ ಈಗಲೂ ಸುಂಕ ವಸೂಲಿ ಮಾಡುತ್ತಿದೆ. ಜೊತೆಗೆ ಎಲ್ಲಾ ಬಿಲ್‌ಗಳಿಗೆ ಸಂಬಂಧಿಸಿದಂತೆ ಸುಂಕ ಈಗಾಗಲೇ ಪಾವತಿ ಮಾಡಲಾಗಿದೆ. ಸಂಬಂಧಪಟ್ಟ ಆದೇಶಗಳ ವಿರುದ್ಧ ಮೇಲ್ಮನವಿ ಸಲ್ಲಿಸಲಾಗಿದೆ. ಸುಪ್ರೀಂ ಕೋರ್ಟ್‌ ಐಟಿಸಿ ಲಿಮಿಟೆಡ್‌ ಪ್ರಕರಣದಲ್ಲಿ ನೀಡಿದ ತೀರ್ಪು ಇಲ್ಲಿ ಅನ್ವಯವಾಗುವುದಿಲ್ಲ. ಅದು ಸ್ವಯಂ ಪಾವತಿಸಿದ ಸುಂಕಕ್ಕೆ ಸಂಬಂಧಿಸಿದ ತೀರ್ಪು ಎಂದು ಇಂಡಿಗೋ ವಾದಿಸಿತ್ತು.

ಮತ್ತೆ ಮತ್ತೆ ಮನವಿ ಸಲ್ಲಿಸಿದರೂ ಪ್ರಧಾನ ಆಯುಕ್ತರಿಗೆ ವಿನಂತಿಸಿದರೂ, ಮರುಮೌಲ್ಯಮಾಪನ ಆದೇಶ ಹೊರಡಿಸಿಲ್ಲ ಎಂದು ಇಂಡಿಗೋ ನ್ಯಾಯಾಲಯಕ್ಕೆ ತಿಳಿಸಿದೆ. ಸಂವಿಧಾನಬಾಹಿರ ಎಂದು ಘೋಷಿಸಲಾದ ಬಳಿಕವೂ ಮರುಮೌಲ್ಯಮಾಪನಕ್ಕೆ ಒತ್ತಾಯಿಸುವುದು, ತೀರ್ಪನ್ನು ನಿರಾಕರಿಸುವುದಕ್ಕೆ ಸಮ ಎಂದು ಏರ್‌ಲೈನ್ ವಾದ ಮಂಡಿಸಿತು.(ಏಜನ್ಸೀಸ್).