ಇಡ್ಲಿಗೆ 80, ಫುಲ್​​ ಮೀಲ್ಸ್​ 200! ಜೇಬಲ್ಲಿ ಈಗ 1000 ರೂ. ಇದ್ರೂ ಸಾಲಲ್ಲ; ಗ್ಯಾಸ್​ ಬೆಲೆ ಏರಿಕೆಗೆ ಜನರು ಕಂಗಾಲು

ನವದೆಹಲಿ: ಇತ್ತೀಚೆಗಷ್ಟೇ, ವಾಣಿಜ್ಯ ಎಲ್​ಪಿಜಿ ಸಿಲಿಂಡರ್​ಗಳ ಬೆಲೆ ಒಂದೇ ಸಲ 993 ರೂ. ಹೆಚ್ಚಳವಾಗಿದ್ದು, ಸದ್ಯ ಜನಸಾಮಾನ್ಯರ ಜೇಬಿಗೆ ದೊಡ್ಡ ಕತ್ತರಿ ಹಾಕಿದೆ. ಕೇಂದ್ರ ಸರ್ಕಾರದ ಈ ನಿರ್ಧಾರದಿಂದ ಹೋಟೆಲ್​, ಸಣ್ಣ ಕೈಗಾರಿಕೆಗಳಿಗೆ ಭಾರೀ ಸಂಕಷ್ಟ ಎದುರಾಗಿದೆ.

ಮೊದಲೇ ಅನೇಕರು ಕಮರ್ಷಿಯಲ್​ ಸಿಲಿಂಡರ್​ ಅಲಭ್ಯತೆಯಿಂದ ತಮ್ಮ ತಮ್ಮ ಹೋಟೆಲ್​ಗಳನ್ನು ಬಂದ್​ ಮಾಡುವ ಮೂಲಕ ಕಳವಳ ವ್ಯಕ್ತಪಡಿಸಿದ್ದರು. ಆದರೀಗ, ಕೇಂದ್ರ ಸರ್ಕಾರ ಏಕಾಏಕಿ ವಾಣಿಜ್ಯ ಎಲ್​ಪಿಜಿ ದರವನ್ನು 993 ರೂ. ಹೆಚ್ಚಿಸಿ, ಹೋಟೆಲ್​ ಉದ್ಯಮವನ್ನೇ ನಂಬಿಕೊಂಡವರ ಹೊಟ್ಟೆಗೆ ತಣ್ಣೀರು ಬಟ್ಟೆ ಹಾಕಿದೆ. ಇದು ಹೋಟೆಲ್​ ಮಾಲೀಕರಿಗೆ ಮಾತ್ರವಲ್ಲ, ಸಾಮಾನ್ಯ ಜನರಿಗೂ ದೊಡ್ಡ ಸಂಕಷ್ಟವಾಗಿದೆ.

ಕಳೆದ ಕೆಲವು ದಿನಗಳಿಂದ ಗ್ಯಾಸ್​ ಸಿಲಿಂಡರ್​ಗಳ ಬೆಲೆಗಳು ತೀವ್ರವಾಗಿ ಏರುತ್ತಿರುವುದರಿಂದ, ಹೋಟೆಲ್‌ಗಳು ಮತ್ತು ಟಿಫಿನ್​ ಸೆಂಟರ್​ಗಳನ್ನು ನಡೆಸುವುದು ಮಾಲೀಕರಿಗೆ ಹೋರಾಟವಾಗಿ ಪರಿಣಮಿಸಿದೆ. ಕಚ್ಚಾ ವಸ್ತುಗಳು ಮತ್ತು ಕಾರ್ಮಿಕರ ವೆಚ್ಚದ ಜೊತೆಗೆ ಸಿಲಿಂಡರ್​ ಬಿಕ್ಕಟ್ಟನ್ನು ಸರಿದೂಗಿಸಿಕೊಂಡು ಹೋಗುವುದು ಸವಾಲಾಗಿದೆ. ತಮ್ಮ ಮೇಲಿನ ಹೊರೆಯನ್ನು ಹೋಟೆಲ್ ಮಾಲೀಕರು ವಿಧಿಯಿಲ್ಲದೆ, ನೇರವಾಗಿ ಗ್ರಾಹಕರ ಮೇಲೆ ಹೊರಿಸುತ್ತಿದ್ದಾರೆ. ಇದರ ಪರಿಣಾಮವಾಗಿ, ಮಿಡಲ್​ ಕ್ಲಾಸ್​ ಮಂದಿ ಈಗ ಹೋಟೆಲ್​ನಲ್ಲಿ ಊಟ ಮಾಡಲು ಹಿಂದೇಟು ಹಾಕುತ್ತಿದ್ದಾರೆ.

ಬೆಂಗಳೂರಿನಲ್ಲಿ 19 ಕೆಜಿ ತೂಕದ ವಾಣಿಜ್ಯ ಎಲ್​ಪಿಜಿ ಸಿಲಿಂಡರ್​ ಬೆಲೆ 991 ರೂ.ಗೆ ಏರಿಕೆಯಾಗಿ, 3,152 ರೂ.ಗೆ ತಲುಪಿದೆ. ಇದು ಸರ್ಕಾರ ವಿಧಿಸಿರುವ ನೇರ ದರವಾದರೆ, ಅಮೆರಿಕ-ಇರಾನ್​ ಯುದ್ಧ ಬಿಕ್ಕಟ್ಟಿನಿಂದ ಸಿಲಿಂಡರ್​ಗಳ ಪೂರೈಕೆಯಲ್ಲಿ ವ್ಯತ್ಯಯ ಹಿನ್ನೆಲೆ ಬ್ಲ್ಯಾಕ್​ ಮಾರ್ಕೆಟ್​ ದಂಧೆಯಲ್ಲಿ ಮುಕ್ತವಾಗಿ ವಹಿವಾಟು ನಡೆಸುತ್ತಿವೆ. ಇಲ್ಲೇ ಒಂದು ಕಮರ್ಷಿಯಲ್​ ಸಿಲಿಂಡರ್​ ಬೆಲೆ ಸುಮಾರು 5ರಿಂದ 7 ಸಾವಿರ ರೂ.ಗೆ ಮಾರಾಟವಾಗುತ್ತಿದೆ. ಈ ವಿಷಯ ತೀರ ಕಳವಳಕಾರಿ.

ಆಂಧ್ರಪ್ರದೇಶ, ಹೈದರಾಬಾದ್ ಸೇರಿದಂತೆ ದೇಶದ ಕೆಲವು ಪ್ರಮುಖ ನಗರಗಳಲ್ಲಿನ ಹೋಟೆಲ್‌ಗಳಲ್ಲಿ ಉಪಹಾರಗಳ ಬೆಲೆಗಳು ಮತ್ತೆ ಬದಲಾಗಿವೆ. ಒಂದು ಕಾಲದಲ್ಲಿ, 30ರಿಂದ 40 ರೂ.ಗೆ ಸಿಗುತ್ತಿದ್ದ ಒಂದು ಪ್ಲೇಟ್​ ಇಡ್ಲಿ-ಸಾಂಬಾರ್​ ಈಗ 75ರಿಂದ 80 ರೂ.ಗೆ ಏರಿದೆ. ಮತ್ತು ದೋಸೆಯ ವಿಷಯಕ್ಕೆ ಬಂದರೆ, ತುಪ್ಪ ಅಥವಾ ಮಸಾಲಾ ದೋಸೆಯ ಬೆಲೆಗಳು 90ರಿಂದ 100 ರೂ. ಆಗಿವೆ.

ಸಾಮಾನ್ಯ ಮಧ್ಯಮ ವರ್ಗದ ಹೋಟೆಲ್‌ಗಳಲ್ಲಿಯೂ ಈಗ ತಿಂಡಿ-ಊಟದ ಬೆಲೆ ಕನಿಷ್ಠವೇ 100 ರೂ.ಗೆ ತಲುಪಿದೆ. ಹಲವೆಡೆ ಒಂದು ಫುಲ್​ ಮೀಲ್ಸ್​ ದರ 200 ರೂ. ಆಗೋಗಿದೆ. ಹೀಗಿರುವಾಗ, ಜನರು ಹೊರಗಡೆ ಹೋದಾಗ ಹೋಟೆಲ್​ಗಳಲ್ಲಿ ತಿನ್ನುವುದಾದರೂ ಹೇಗೆ? ಒಬ್ಬರಿಗೆ ಇಷ್ಟೊಂದಾದರೆ, ಇನ್ನೂ ಕುಟುಂಬ ಸಮೇತ ಹೋದರೆ ಏನು ಗತಿ? ಕೇವಲ ಒಂದು ಟೀ ಮತ್ತು ಕಾಫಿ ಬೆಲೆಯೇ 20ರಿಂದ 30ರೂ.ಗೆ ಏರಿವೆ ಎಂದರೆ ಪರಿಸ್ಥಿತಿ ಎಷ್ಟು ಹದಗೆಟ್ಟಿದೆ ಎಂಬುದರ ಚಿತ್ರಣ ನಮ್ಮ ಕಣ್ಣು ಮುಂದೆ ಬರುತ್ತದೆ,(ಏಜೆನ್ಸೀಸ್).