ಐರಿಶ್ ಬ್ಯಾಟರ್‌ಗಳಿಗೆ ದುಬೆ, ಅರ್ಶ್‌ದೀಪ್ ಬ್ರೇಕ್! ಪದಾರ್ಪಣೆ ಪಂದ್ಯದಲ್ಲೇ ಪ್ರಿನ್ಸ್ ಯಾದವ್ ಕಮಾಲ್, ಭಾರತಕ್ಕೆ 155 ರನ್‌ಗಳ ಗುರಿ! INDvsIRE

ಆ ಮೂಲಕ ಸರಣಿ ಸಮಬಲ ಮಾಡಿಕೊಳ್ಳಲು ಭಾರತಕ್ಕೆ 155 ರನ್‌ಗಳ ಸುಲಭ ಗುರಿ ಸಿಕ್ಕಿದೆ. ಮೊದಲ ಪಂದ್ಯದಲ್ಲಿ 34 ರನ್‌ಗಳ ಆಘಾತಕಾರಿ ಸೋಲುಂಡಿದ್ದ ಭಾರತ ತಂಡಕ್ಕೆ ಈ ಪಂದ್ಯದಲ್ಲಿ ಗೆಲುವು ಅನಿವಾರ್ಯವಾಗಿದೆ.

ಭಾರತ ತಂಡದಲ್ಲಿ ಇಂದು ಇಬ್ಬರು ಯುವ ಆಟಗಾರರಾದ ಸೂರ್ಯಾಂಶ್ ಶಡ್ಗೆ ಮತ್ತು ಪ್ರಿನ್ಸ್ ಯಾದವ್ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದರು. ವಾಷಿಂಗ್ಟನ್ ಸುಂದರ್ ಮತ್ತು ಪ್ರಸಿದ್ಧ್ ಕೃಷ್ಣ ಅವರ ಸ್ಥಾನದಲ್ಲಿ ಈ ಇಬ್ಬರಿಗೆ ಆಡುವ ಹನ್ನೊಂದರ ಬಳಗದಲ್ಲಿ ಅವಕಾಶ ನೀಡಲಾಗಿತ್ತು.

ತಮ್ಮ ಮೊದಲ ಪಂದ್ಯದಲ್ಲೇ ಅದ್ಭುತ ಲಯದಲ್ಲಿ ಕಂಡುಬಂದ ವೇಗಿ ಪ್ರಿನ್ಸ್ ಯಾದವ್, ಐರ್ಲೆಂಡ್ ಬ್ಯಾಟರ್‌ಗಳಿಗೆ ತೀವ್ರ ಕಂಟಕವಾದರು. ತಮ್ಮ ಕೋಟಾದ 4 ಓವರ್‌ಗಳಲ್ಲಿ ಕೇವಲ 22 ರನ್ ನೀಡಿ 3 ಪ್ರಮುಖ ವಿಕೆಟ್ ಕಡಿಯುವ ಮೂಲಕ ಐರಿಶ್ ಪಡೆಯ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು. ಇವರಿಗೆ ಉತ್ತಮ ಸಾಥ್ ನೀಡಿದ ಅನುಭವಿ ಅರ್ಶ್‌ದೀಪ್ ಸಿಂಗ್ (35ಕ್ಕೆ 2 ವಿಕೆಟ್) ಮತ್ತು ಆಲ್‌ರೌಂಡರ್ ಶಿವಂ ದುಬೆ (25ಕ್ಕೆ 2 ವಿಕೆಟ್) ತಲಾ ಎರಡು ವಿಕೆಟ್ ಪಡೆದು ಮಿಂಚಿದರು. ಮತ್ತೊಬ್ಬ ವೇಗಿ ಹರ್ಷಿತ್ ರಾಣಾ 1 ವಿಕೆಟ್ ಪಡೆದರು.

ಮೊದಲು ಬ್ಯಾಟಿಂಗ್ ಮಾಡಿದ ಐರ್ಲೆಂಡ್ ತಂಡಕ್ಕೆ ಆರಂಭದಲ್ಲೇ ಅರ್ಶ್‌ದೀಪ್ ಸಿಂಗ್ ಆಘಾತ ನೀಡಿದರು. ಓಪನರ್ ರಾಸ್ ಅಡೈರ್ (16 ರನ್) ಬೇಗನೇ ಔಟಾದರು. ನಂತರ ಬಂದ ಟಿಮ್ ಟೆಕ್ಟರ್ ಕೇವಲ 6 ಎಸೆತಗಳಲ್ಲಿ 5 ರನ್ ಗಳಿಸಿ ಹರ್ಷಿತ್ ರಾಣಾಗೆ ವಿಕೆಟ್ ಒಪ್ಪಿಸಿದರು. ಆದರೆ, ಮಧ್ಯಮ ಕ್ರಮಾಂಕದಲ್ಲಿ ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದ ಹ್ಯಾರಿ ಟೆಕ್ಟರ್ 47 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 53 ರನ್ ಗಳಿಸಿ ತಂಡಕ್ಕೆ ಆಸರೆಯಾದರು. ಇವರಿಗೆ ಸಾಥ್ ನೀಡಿದ ಬೆಂಜಮಿನ್ ಕ್ಯಾಲಿಟ್ಜ್ 23 ಎಸೆತಗಳಲ್ಲಿ 37 ರನ್ ಗಳಿಸಿ ರನ್ ವೇಗ ಹೆಚ್ಚಿಸಲು ಯತ್ನಿಸಿದರಾದರೂ ಶಿವಂ ದುಬೆ ಬೌಲಿಂಗ್‌ನಲ್ಲಿ ಔಟಾದರು.

ನಾಯಕ ಲೋರ್ಕನ್ ಟಕರ್ (15 ರನ್) ಮತ್ತು ಲಿಯಾಮ್ ಮೆಕಾರ್ಥಿ ಅವರ ವಿಕೆಟ್ ಪಡೆದ ಪ್ರಿನ್ಸ್ ಯಾದವ್ ಐರ್ಲೆಂಡ್ ದೊಡ್ಡ ಮೊತ್ತ ಗಳಿಸದಂತೆ ಬ್ರೇಕ್ ಹಾಕಿದರು. ಅಂತಿಮ ಓವರ್‌ನಲ್ಲಿ ಕೇವಲ 5 ರನ್ ನೀಡಿ 1 ವಿಕೆಟ್ ಪಡೆದ ಪ್ರಿನ್ಸ್ ಯಾದವ್ ಐರ್ಲೆಂಡ್ ಇನ್ನಿಂಗ್ಸ್‌ಗೆ ಯಶಸ್ವಿ ತೆರೆ ಎಳೆದರು,(ಏಜೆನ್ಸೀಸ್​).