ಸಂಸತ್ತಿನ ಮೆಟ್ಟಿಲಲ್ಲೇ ಹೈಡ್ರಾಮಾ; ನೀನು ದೇಶದ್ರೋಹಿ ಎಂದ ರಾಹುಲ್‌ಗೆ, ನೀನು ದೇಶದ ಶತ್ರು ಎಂದು ಗುಡುಗಿದ ಬಿಟ್ಟು | Rahul Gandhi vs Ravneet Bittu

ಸಂಸತ್ತಿನ ಮಕರ ದ್ವಾರದ ಬಳಿ ಪ್ರತಿಭಟನೆ ನಡೆಸುತ್ತಿದ್ದ ಕಾಂಗ್ರೆಸ್ ಸಂಸದರ ನಡುವೆ ರಾಹುಲ್ ಗಾಂಧಿ ಇದ್ದರು. ಆ ಸಮಯದಲ್ಲಿ ಸಚಿವ ರವನೀತ್ ಸಿಂಗ್ ಬಿಟ್ಟು ಅಲ್ಲಿಂದ ಹಾದುಹೋಗುತ್ತಿದ್ದಾಗ, ರಾಹುಲ್ ಗಾಂಧಿಯು, ಇಲ್ಲೊಬ್ಬ ದೇಶದ್ರೋಹಿ ಹೋಗುತ್ತಿದ್ದಾನೆ ನೋಡಿ. ಅವನ ಮುಖ ನೋಡಿ ಎಂದು ಸಿಬ್ಬಂದಿ ಮತ್ತು ಇತರ ಸಂಸದರ ಮುಂದೆ ಹೇಳಿದ್ದಾರೆ.

ರಾಹುಲ್ ಗಾಂಧಿ ಅವರು ನನ್ನ ದೇಶದ್ರೋಹಿ ಗೆಳೆಯ ಎಂದು ಕರೆದು ಕೈಕುಲುಕಲು ಮುಂದಾದಾಗ, ಬಿಟ್ಟು ಅವರು ಕೈಕುಲುಕಲು ನಿರಾಕರಿಸಿದ್ದಾರೆ.

ರಾಹುಲ್​ ಹೇಳಿಕೆಗೆ ತಿರುಗೇಟು ನೀಡಿರುವ ಬಿಟ್ಟು, ನೀನು ದೇಶದ ಶತ್ರು ಎಂದು ನೇರವಾಗಿ ಕಿಡಿಕಾರಿದ್ದಾರೆ. ಅಲ್ಲದೆ, ಬಿಟ್ಟು ಅವರು ಮಾತನಾಡುತ್ತಾ, ಯಾರು ವಿದೇಶಕ್ಕೆ ಹೋಗಿ ಭಾರತದ ಬಗ್ಗೆ ತಪ್ಪು ಮಾಹಿತಿಯನ್ನು ಹರಡುತ್ತಾರೋ ಮತ್ತು ದೇಶದ ಏಕತೆಗೆ ಧಕ್ಕೆ ತರುತ್ತಾರೋ ಅವರು ನಿಜವಾದ ಶತ್ರುಗಳು ಎಂದು ವಾಗ್ದಾಳಿ ನಡೆಸಿದ್ದಾರೆ.

ಮುಂದುವರೆದು ಮಾತನಾಡಿರುವ ಬಿಟ್ಟು, ರಾಹುಲ್ ಅವರು ಮರಳಿ ಕಾಂಗ್ರೆಸ್‌ಗೆ ಬರುತ್ತೀಯಾ ಎಂದು ಕಾಲೆಳೆದಾಗ, ಬಿಟ್ಟು ಅವರು ನಿಮ್ಮ ಜೊತೆ ಯಾರು ಇರುತ್ತಾರೋ ಅವರು ದೇಶಕ್ಕೆ ಒಳ್ಳೆಯದನ್ನು ಮಾಡಲು ಸಾಧ್ಯವಿಲ್ಲ ಎಂಬ ಧಾಟಿಯಲ್ಲಿ ಪ್ರತಿಕ್ರಿಯಿಸಿ ಅಲ್ಲಿಂದ ಹೊರಟಿದ್ದಾರೆ.

ಮಾಧ್ಯಮಗಳ ಮುಂದೆ ವಾಗ್ದಾಳಿ: ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಬಿಟ್ಟು, ಕಾಂಗ್ರೆಸ್ ಸಂಸದರು ಏನೋ ಯುದ್ಧ ಗೆದ್ದವರಂತೆ ಕುಳಿತಿದ್ದಾರೆ. ರಾಹುಲ್ ಗಾಂಧಿಗೆ ರಾಷ್ಟ್ರದ ಹಿತಾಸಕ್ತಿಗಿಂತ ರಾಜಕೀಯವೇ ಮುಖ್ಯವಾಗಿದೆ. ಅವರಿಗೆ ದೇಶದ ಮೇಲೆ ಪ್ರೀತಿ ಇಲ್ಲ ಎಂದು ಆರೋಪಿಸಿದ್ದಾರೆ.

ರವನೀತ್ ಸಿಂಗ್ ಬಿಟ್ಟು ಅವರು ಹಿಂದೆ ಕಾಂಗ್ರೆಸ್ ಸಂಸದರಾಗಿದ್ದರು ಮತ್ತು ರಾಹುಲ್ ಗಾಂಧಿ ಅವರಿಗೆ ಆಪ್ತರಾಗಿದ್ದರು. ಲೋಕಸಭಾ ಚುನಾವಣೆಗೆ ಮೊದಲು ಅವರು ಬಿಜೆಪಿಗೆ ಸೇರ್ಪಡೆಗೊಂಡು ಕೇಂದ್ರ ಸಚಿವರಾದರು. ಅಂದಿನಿಂದ ಬಿಟ್ಟು ಅವರು ರಾಹುಲ್ ಗಾಂಧಿ ವಿರುದ್ಧ ನಿರಂತರವಾಗಿ ವಾಗ್ದಾಳಿ ನಡೆಸುತ್ತಿದ್ದಾರೆ. ಅಲ್ಲದೆ, ಈ ಹಿಂದೆ ರಾಹುಲ್ ಗಾಂಧಿಯನ್ನು ನಂಬರ್ 1 ಭಯೋತ್ಪಾದಕ ಎಂದೂ ಕರೆದಿದ್ದರು. ಇಂದು ರಾಹುಲ್ ಗಾಂಧಿ ಅವರು ಬಿಟ್ಟು ಅವರ ಪಕ್ಷಾಂತರವನ್ನು ಗುರಿಯಾಗಿಸಿಕೊಂಡು ಈ ದೇಶದ್ರೋಹಿ ಎಂಬ ಪದವನ್ನು ಬಳಸಿದ್ದಾರೆ,(ಏಜೆನ್ಸೀಸ್).