ಜನರಿಗೆ ಸುಳ್ಳು ಹೇಳ್ಬೇಡಿ, ನಿಮ್ಮ ಗ್ಯಾಂಗ್ ಪ್ಲಾನ್ ನಮಗೆ ಗೊತ್ತು; ಪವನ್​ ಕಲ್ಯಾಣ್​​ಗೆ ಪ್ರಕಾಶ್​ ರಾಜ್​ ಕೌಂಟರ್​! Prakash Raj on Pawan Kalyan

ಆಂಧ್ರಪ್ರದೇಶ: ಲೋಕಸಭೆಯಲ್ಲಿ ಮಹಿಳಾ ಮೀಸಲಾತಿ ಮಸೂದೆ ಅಂಗೀಕಾರವಾಗದ ಹಿನ್ನಲೆಯಲ್ಲಿ, ಆಂಧ್ರಪ್ರದೇಶದ ಉಪ ಮುಖ್ಯಮಂತ್ರಿ ಪವನ್​ ಕಲ್ಯಾಣ್​ ಆಕ್ರೋಶ ಹೊರಹಾಕಿದ್ದು, ಇದಕ್ಕೆ ಬಹುಭಾಷಾ ನಟ ಪ್ರಕಾಶ್​ ರಾಜ್​ (Prakash Raj on Pawan Kalyan) ವಿರೋಧ ವ್ಯಕ್ತ ಪಡಿಸಿದ್ದಾರೆ.

ಮಹಿಳಾ ಮೀಸಲಾತಿ ಮಸೂದೆಯು 2023 ರಲ್ಲಿಯೇ ಜಾರಿಯಾಗಿದೆ. ದಯವಿಟ್ಟು ಜನರಿಗೆ ಸುಳ್ಳು ಹೇಳಬೇಡಿ. ಈ ಭಾರಿ ನೀವು ಮತ್ತು ನಿಮ್ಮ ಗ್ಯಾಂಗ್​ ಡಲೀಮಿಟೇಶನ್​ನ್ನು ಜಾರಿ ಮಾಡಿ ದಕ್ಷಿಣದ ರಾಜ್ಯಗಳ ಪ್ರತಿನಿಧಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವ ಗುರಿ ಹೊಂದಿದ್ದರಿ. ಅದು ಈಗ ಭಂಗವಾಗಿದೆ ಎಂದು ಪ್ರಕಾಶ್​ ರಾಜ್​, ಪವನ್​ ಕಲ್ಯಾಣ್​ ಮಾಡಿದ್ದ ಟ್ವಿಟ್​ಗೆ ಕೌಂಟರ್​ ಕೊಟ್ಟಿದ್ದಾರೆ.

ಈ ಮಸೂದೆ ಜಾರಿಯಾಗಿದ್ದರೆ, ಭಾರತೀಯ ಮಹಿಳೆಯರ ರಾಜಕೀಯ ಪಾಲ್ಗೊಳ್ಳುವಿಕೆ ಅಧಿಕವಾಗುತ್ತಿತ್ತು. ಇದು ನಮಗೆ ದೊರೆತಿದ್ದ ಐತಿಹಾಸಿಕ ಅವಕಾಶವಾಗಿತ್ತು, ಆದರೆ ವಿರೋಧ ಪಕ್ಷ ಇದನ್ನು ಸಾಧಿಸಲು ಸಹಕಾರ ನೀಡಲಿಲ್ಲ. ಅವರಿಗೆ ಸ್ತ್ರೀ ಸಬಲೀಕರಣದಲ್ಲಿ ಯಾವುದೇ ಅಸಕ್ತಿಯಿಲ್ಲವೆಂದು ಸ್ಪಷ್ಟವಾಗಿ ತಿಳಿಯುತ್ತದೆ ಎಂದು ಆಂಧ್ರಪ್ರದೇಶದ ಉಪ ಮುಖ್ಯಮಂತ್ರಿ ಪವನ್​ ಕಲ್ಯಾಣ್​ ಟ್ವಿಟ್​ ಮಾಡಿದ್ದರು.

ಮಸೂದೆ ಸೋಲಿನ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಹುಲ್ ಗಾಂಧಿ, ಸಂವಿಧಾನದ ತತ್ವಗಳ ಮೇಲೆ ನಡೆದ ದಾಳಿಯನ್ನು ನಾವು ತಡೆದಿದ್ದು, ಇದು ಕೇವಲ ಮಹಿಳಾ ಮೀಸಲಾತಿ ಮಸೂದೆಯಾಗಿರಲಿಲ್ಲ, ಬದಲಾಗಿ ಭಾರತದ ರಾಜಕೀಯ ಮತ್ತು ಚುನಾವಣಾ ರಚನೆಯನ್ನು ಬದಲಿಸುವ ಹಂಚಿಕೆಯಾಗಿತ್ತು ಎಂದು ಆರೋಪಿಸಿದರು.

ಪ್ರಧಾನಮಂತ್ರಿ ನರೇಂದ್ರ ಮೋದಿಯವರಿಗೆ ನಿಜವಾಗಿಯೂ ಮಹಿಳಾ ಮೀಸಲಾತಿ ನೀಡುವ ಆಸಕ್ತಿ ಇದ್ದರೆ, 2023ರ ಹಳೆಯ ಮಸೂದೆಯನ್ನು ಇಂದೇ ಮಂಡಿಸಿ ಜಾರಿಗೆ ತರಲಿ. ಇಡೀ ವಿರೋಧ ಪಕ್ಷವು ಅದಕ್ಕೆ ಬೆಂಬಲ ನೀಡುತ್ತದೆ ಮತ್ತು ತಕ್ಷಣವೇ ಮೀಸಲಾತಿ ಜಾರಿಯಾಗುವುದನ್ನು ನಾವು ಖಚಿತಪಡಿಸುತ್ತೇವೆ ಎಂದು ಸವಾಲು ಹಾಕಿದರು.

ಸಂಸತ್ತಿನಲ್ಲಿ ನಡೆದ ಮತದಾನದ ವಿವರಗಳ ಪ್ರಕಾರ, ಚರ್ಚೆಯ ಬಳಿಕ ನಡೆದ ಮತದಾನದಲ್ಲಿ ಒಟ್ಟು 528 ಸದಸ್ಯರು ಭಾಗವಹಿಸಿದ್ದರು. ಈ ಪೈಕಿ 298 ಸದಸ್ಯರು ಮಸೂದೆಯ ಪರವಾಗಿ ಮತ ಚಲಾಯಿಸಿದರೆ, 230 ಸದಸ್ಯರು ಮಸೂದೆಯನ್ನು ವಿರೋಧಿಸಿ ಮತ ಹಾಕಿದರು. ಸಾಂವಿಧಾನಿಕ ತಿದ್ದುಪಡಿ ಮಸೂದೆಯು ಅಂಗೀಕಾರವಾಗಲು ಸದನದಲ್ಲಿ ಹಾಜರಿದ್ದು ಮತ ಚಲಾಯಿಸುವ ಸದಸ್ಯರ ಪೈಕಿ ಕನಿಷ್ಠ ಮೂರನೇ ಎರಡರಷ್ಟು (ಅಂದರೆ ಸುಮಾರು 326 ಮತಗಳು) ಬೆಂಬಲದ ಅಗತ್ಯವಿತ್ತು. ಆದರೆ ಸರ್ಕಾರದ ಪರವಾಗಿ 298 ಮತಗಳು ಚಲಾವಣೆಯಾದ ಕಾರಣ ಮಸೂದೆ ಕಾಯ್ದೆಯಾಗುವಲ್ಲಿ ವಿಫಲವಾಯಿತು, (ಏಜನ್ಸೀಸ್​).