'ಎಲ್ಲೆಂದರಲ್ಲಿ ಕಸ ಹಾಕೋ ಅಭ್ಯಾಸವಿದ್ರೆ, ಸಿಕ್ಕಿಂಗೆ ಹೋಗುವ ಯೋಚನೆ ಬಿಟ್ಬಿಡಿ'; ಉದ್ಯಮಿ ಆನಂದ್ ಮಹೀಂದ್ರಾ ಹೀಗಂದಿದ್ಯಾಕೆ?..Sikkim

ಸಿಕ್ಕಿಂ ಭಾರತದ ಈಶಾನ್ಯ ಭಾಗದಲ್ಲಿರುವ ಒಂದು ಸುಂದರ ಮತ್ತು ಅತ್ಯಂತ ಚಿಕ್ಕ ಪರ್ವತ ರಾಜ್ಯ. ಇದು ತನ್ನ ನೈಸರ್ಗಿಕ ಸೌಂದರ್ಯ, ಹಿಮಾವೃತ ಪರ್ವತಗಳು, ಜಲಪಾತಗಳು ಮತ್ತು ಶ್ರೀಮಂತ ಬೌದ್ಧ ಸಂಸ್ಕೃತಿಗೆ ಹೆಸರುವಾಸಿಯಾಗಿದೆ. ಈ ರಾಜ್ಯದ ಸ್ವಚ್ಛತೆಯ ನಿಯಮ ಮತ್ತು ಅಲ್ಲಿನ ಜನರ ಶಿಸ್ತನ್ನು ಆನಂದ್ ಮಹೀಂದ್ರಾ ಅವರು ಶ್ಲಾಘಿಸಿದ್ದಾರೆ.

'ಕಾರಿನ ಕಿಟಕಿಯಿಂದ ಸಿಕ್ಕ ಸಿಕ್ಕ ಕಡೆಯಲ್ಲಿ ಕಸ ಬಿಸಾಡುವ ಅಭ್ಯಾಸ ನಿಮ್ಗೇನಾದರೂ ಇದ್ದರೆ, ಸಿಕ್ಕಿಂಗೆ ಭೇಟಿ ನೀಡುವ ಆಲೋಚನೆಯನ್ನೂ ಮಾಡಬೇಡಿ. ಆದರೆ, ಸ್ವಚ್ಛತೆಯನ್ನು ಕಾಪಾಡುವ ಈ ವಿಡಿಯೋ ಕ್ಲಿಪ್ ನಿಮ್ಮ ಮುಖದಲ್ಲಿ ಮಂದಹಾಸ ಮೂಡಿಸಿದರೆ, ಖಂಡಿತವಾಗಿಯೂ ನೀವು ಸಿಕ್ಕಿಂಗೆ ಪ್ರಯಾಣ ಬೆಳೆಸಬಹುದು. ಇದು ನಿಮ್ಮ ಜೀವಮಾನದಲ್ಲೇ ನೀವು ಕೈಗೊಳ್ಳುವ ಅತ್ಯುತ್ತಮ ಪ್ರವಾಸದ ನಿರ್ಧಾರಗಳಲ್ಲಿ ಇದು ಒಂದಾಗಲಿದೆ' ಎಂದು ಆನಂದ್​ ಮಹೀಂದ್ರಾ ಅವರು ಬರೆದುಕೊಂಡಿದ್ದಾರೆ.

ಪ್ರವಾಸಿಯೊಬ್ಬರು ರಸ್ತೆಯ ಮೇಲೆ ಕಿತ್ತಳೆ ಹಣ್ಣಿನ ಸಿಪ್ಪೆಯನ್ನು ಎಸೆದಾಗ, ಸ್ಥಳೀಯರು ಅವರನ್ನು ತಡೆದು, ಆ ಕಸವನ್ನು ತಾವೇ ಸ್ವತಃ ಎತ್ತಿ ಕಸದ ಬುಟ್ಟಿಗೆ ಹಾಕುವಂತೆ ಕ್ರಮ ಕೈಗೊಂಡಿದ್ದಾರೆ. ಈ ಮೂಲಕ ಸಾರ್ವಜನಿಕ ಸ್ಥಳಗಳನ್ನು ಸ್ವಚ್ಛವಾಗಿಡುವುದು ಕೇವಲ ಸರ್ಕಾರದ ಕೆಲಸವಲ್ಲ, ಪ್ರತಿಯೊಬ್ಬ ನಾಗರಿಕನ ಜವಾಬ್ದಾರಿ ಎಂಬ ಸಂದೇಶವನ್ನು ಅಲ್ಲಿನ ಜನರು ಪ್ರತಿನಿತ್ಯ ಸಾರುತ್ತಾರೆ ಎನ್ನುವುದು ವಿಡಿಯೋದಲ್ಲಿದೆ.

ಆನಂದ್ ಮಹೀಂದ್ರಾ ಅವರ ಈ ಪೋಸ್ಟ್‌ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಬೆಂಬಲ ವ್ಯಕ್ತವಾಗಿದೆ. ಮತ್ತೊಂದು ಪ್ರವಾಸಿ ತಾಣಕ್ಕೆ ಭೇಟಿ ನೀಡಿ ಅದನ್ನು ಹಾಳು ಮಾಡುವ ಮುನ್ನ, ತನ್ನ ಸುತ್ತಮುತ್ತಲಿನ ಪರಿಸರವನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಒಬ್ಬ ನಾಗರಿಕನ ಪ್ರಾಥಮಿಕ ಕರ್ತವ್ಯವಾಗಿದೆ ಎಂದು ವಿಜಯ್​​ ಎಂಬ ಹೆಸರಿನ ಎಕ್ಸ್​ ಬಳಕೆದಾರರು ಟ್ವೀಟ್ ಮಾಡಿದ್ದಾರೆ

ನಾವು ಇದನ್ನೇ ನಮ್ಮ ಇಡೀ ದೇಶಾದ್ಯಂತ ಏಕೆ ಜಾರಿಗೆ ತರಲು ಸಾಧ್ಯವಿಲ್ಲ?. ತಪ್ಪು ಮಾಡಿದವರನ್ನು ಕಸ ಎತ್ತಿ ವಿಲೇವಾರಿ ಮಾಡುವಂತೆ ಕೇಳುವುದು ಮಾತ್ರವಲ್ಲದೆ, ಸಾರ್ವಜನಿಕ ಸ್ಥಳಗಳಲ್ಲಿ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಬೇಕು ಮತ್ತು ತಕ್ಷಣವೇ ಸ್ಥಳದಲ್ಲೇ ಭಾರಿ ಪ್ರಮಾಣದ ದಂಡವನ್ನು ವಿಧಿಸಬೇಕು ಎಂದು ಮತ್ತೊಬ್ಬರು ಕಾಮೆಂಟ್ ಮಾಡಿದ್ದಾರೆ, (ಏಜೆನ್ಸೀಸ್).