ಮಮತಾ ದೀದಿ ಹೆಸರಲ್ಲಿ ಬದುಕಿದ ಇವರೆಲ್ಲಾ ಸಂಪೂರ್ಣ ನಿರುಪಯುಕ್ತರು!...ರೆಬೆಲ್ಸ್ ವಿರುದ್ಧ ಸಂಸದೆ ಮೊಯಿತ್ರಾ ವಾಗ್ದಾಳಿ | Mahua Moitra

ಶಾಸಕಾಂಗ ಪಕ್ಷವನ್ನು ತಮ್ಮ ವಶಕ್ಕೆ ಪಡೆದುಕೊಂಡಿರುವ ಬಂಡಾಯಗಾರರನ್ನು ಸಂಪೂರ್ಣ ನಿರುಪಯುಕ್ತ ನಾಯಕರು ಎಂದು ಕರೆದಿರುವ ಮೊಯಿತ್ರಾ, ಇವರೆಲ್ಲಾ ಮಮತಾ ಬ್ಯಾನರ್ಜಿ ಅವರ ವರ್ಚಸ್ಸಿನಿಂದ ಅಸ್ತಿತ್ವ ಕಾಯ್ದುಕೊಂಡಿದ್ದು, ವಿರೋಧ ಪಕ್ಷದ ಸಾಲಿನಲ್ಲಿ ನಿಂತು ಬಿಜೆಪಿಯನ್ನು ಎದುರಿಸುವ ಧೈರ್ಯ ಇವರಿಗಿಲ್ಲ ಎಂದು ಲೇವಡಿ ಮಾಡಿದ್ದಾರೆ.

ಇಂಡಿಯಾ ಟುಡೇ ಜೊತೆಗಿನ ವಿಶೇಷ ಸಂವಾದದಲ್ಲಿ ಮಾತನಾಡಿದ ಮೊಯಿತ್ರಾ, ಕೇಂದ್ರ ತನಿಖಾ ಸಂಸ್ಥೆಗಳ ದಾಳಿ ಮತ್ತು ಬಂಧನದ ಭೀತಿ ಒಡ್ಡಿ ಬಿಜೆಪಿ ಈ ಒಡಕನ್ನು ಸೃಷ್ಟಿಸಿದೆ ಎಂದು ಆರೋಪಿಸಿದರು. ಉಚ್ಚಾಟಿತ ಶಾಸಕ ರಿತಬ್ರತಾ ಬ್ಯಾನರ್ಜಿ ನೇತೃತ್ವದ ಬಂಡಾಯಗಾರರು ವರ್ಷಗಳ ಕಾಲ ಅಧಿಕಾರ ಅನುಭವಿಸಿ ಈಗ ವಿರೋಧ ಪಕ್ಷದಲ್ಲಿ ಕೂರಲು ಸಿದ್ಧರಿಲ್ಲ, ಅದಕ್ಕಾಗಿಯೇ ಅವರು ಈ ಸುರಕ್ಷಿತ ಮಾರ್ಗವನ್ನು ಆರಿಸಿಕೊಂಡಿದ್ದಾರೆ ಎಂದು ಆರೋಪಿಸಿದ್ದಾರೆ.

ಈ ನಾಯಕರು ಸಂಪೂರ್ಣ ನಿರುಪಯುಕ್ತರು, ಅವರಿಗೆಲ್ಲಾ ಧೈರ್ಯವಿದ್ದರೆ ನಿಮ್ಮದೇ ಆದ ರಿತಬ್ರತಾ ಕಾಂಗ್ರೆಸ್ ಮಾಡಿಕೊಳ್ಳಿ, ಏನಾದರೂ ಮಾಡಿಕೊಳ್ಳಿ. ಆದರೆ ನಿಮ್ಮನ್ನು ತೃಣಮೂಲ ಕಾಂಗ್ರೆಸ್ ಎಂದು ಕರೆದುಕೊಳ್ಳಬೇಡಿ ಎಂದು ಮಹುವಾ ಮೊಯಿತ್ರಾ ಗುಡುಗಿದ್ದಾರೆ.

ಈಗ ದೇಶದ ಕಣ್ಣೆದುರು ನಡೆಯುತ್ತಿರುವುದನ್ನು ಗಮನಿಸಿ, ಬಿಜೆಪಿ ವಿರೋಧ ಪಕ್ಷದ ನಾಯಕರು ಯಾರೆಂಬುದನ್ನು ತಾನೇ ನಿರ್ಧರಿಸಲು ಹೊರಟಿದೆ. ಕೇವಲ ಪಕ್ಷಗಳನ್ನು ಒಡೆಯುವುದಷ್ಟೇ ಅಲ್ಲ, ತಾವು ಗೆದ್ದ ರಾಜ್ಯಗಳಲ್ಲಿ ವಿರೋಧ ಪಕ್ಷದ ನಾಯಕರನ್ನು ತಾವೇ ಆಯ್ಕೆ ಮಾಡಲು ಬಿಜೆಪಿ ಸಂಚು ರೂಪಿಸುತ್ತಿದೆ. ಟಿಎಂಸಿಯ ಮಾಜಿ ನಾಯಕ ಹಾಗೂ ಪ್ರಸ್ತುತ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರಿಗೆ ಪ್ರತಿ ಶಾಸಕರ ಬಲಹೀನತೆ ಏನೆಂಬುದು ಗೊತ್ತು. ಹೀಗಾಗಿ ಅವರೇ ವೈಯಕ್ತಿಕವಾಗಿ ಟಾರ್ಗೆಟ್ ಮಾಡಿ ಶಾಸಕರನ್ನು ಸೆಳೆದಿದ್ದಾರೆ ಎಂದು ಮಹುವಾ ಹೇಳಿದ್ದಾರೆ.