ನೇಪಾಳಕ್ಕೆ ಬೇಡ ಭಾರತದ ಮಾವು! ಜಪಾನ್​ ಬಳಿಕ ಹಣ್ಣಿನ ಆಮದು ನಿಷೇಧಿಸಿದ್ದು ಸತ್ಯವೇ? ಹೀಗಿದೆ ಉತ್ತರ

ನವದೆಹಲಿ: ಬೇಸಿಗೆಗಾಲ ಬಂದರೆ ಸಾಕು, ಹಣ್ಣುಗಳ ರಾಜ ಮಾವಿನ ಸೀಸನ್​. ಭಾರತದಲ್ಲಿ ಹಲವು ಬಗೆಯ ಮಾವುಗಳು ಗ್ರಾಹಕರ ಬಾಯಲ್ಲಿ ನೀರೂರಿಸುತ್ತದೆ. ಅಂತಹ ಸಿಹಿ ತುಂಬಿದ ಹಣ್ಣುಗಳು ಹೇರಳವಾಗಿ ಇದೊಂದು ಕಾಲದಲ್ಲಿ ಲಭ್ಯವಿರುತ್ತವೆ. ಇಂತಹ ಸಿಹಿಭರಿತ ಹಣ್ಣನ್ನು ಭಾರತದಿಂದ ಆಮದು ಮಾಡಿಕೊಳ್ಳುವ ಹಲವು ರಾಷ್ಟ್ರಗಳ ಪೈಕಿ ಜಪಾನ್ ಮತ್ತು ನೇಪಾಳವು ಭಾರತದ ಮಾವನ್ನು ಬೇಡವೆಂದು ಬಿಟ್ಟಿದೆ ಎಂಬ ಸುದ್ದಿಗಳು ಕೆಲವು ದಿನಗಳಿಂದ ವ್ಯಾಪಕವಾಗಿ ಹರಿದಾಡುತ್ತಿದೆ.

ನೆರೆಯ ರಾಷ್ಟ್ರವಾದ ನೇಪಾಳವು ಭಾರತದಿಂದ ಬರುವ ತರಹೇವಾರಿ ಮಾವಿನ ಹಣ್ಣುಗಳ ಆಮದು ಮಾಡಿಕೊಳ್ಳುವುದನ್ನು ಸಂಪೂರ್ಣವಾಗಿ ನಿಷೇಧಿಸಿದೆ. 'ದಿ ರೈಸಿಂಗ್ ನೇಪಾಳ'ದ ವರದಿಯ ಪ್ರಕಾರ, ಗಡಿ ಕ್ವಾರಂಟೈನ್ ನಿರೀಕ್ಷಕರು ಆಮದು ಮಾಡಿಕೊಂಡ ಸಾಗಣೆಯಲ್ಲಿ ಹೆಚ್ಚಿನ ಪ್ರಮಾಣದ ರಾಸಾಯನಿಕ ಕೀಟನಾಶಕಗಳ ಸಿಂಪಡನೆಯನ್ನು ಖಚಿತಪಡಿಸಿಕೊಂಡ ಬೆನ್ನಲ್ಲೇ ನೇಪಾಳದ ಬಾಲೆನ್ ಶಾ ಸರ್ಕಾರವು ಈ ನಿಷೇಧವನ್ನು ವಿಧಿಸಿದೆ ಎನ್ನಲಾಗಿದೆ.

ಭಾರತದ ಮಾವಿನ ಆಮದಿನ ಮೇಲೆ ಅಂತಹ ಯಾವುದೇ ನಿಷೇಧವನ್ನು ವಿಧಿಸಲಾಗಿಲ್ಲ ಎಂದು ಭಾರತದ ಕೃಷಿ ಮತ್ತು ರೈತ ಕಲ್ಯಾಣ ಸಚಿವಾಲಯ ಸ್ಪಷ್ಟಪಡಿಸಿದೆ. ನೇಪಾಳಕ್ಕೆ ಭಾರತೀಯ ಮಾವಿನಹಣ್ಣಿನ ರಫ್ತು ಎಗ್ಗಿಲ್ಲದೆ ಸಾಗಿದೆ. ಜನವರಿ 2026ರಿಂದ 2,005 ಮೆಟ್ರಿಕ್ ಟನ್ ಮಾವಿನಹಣ್ಣನ್ನು ಒಳಗೊಂಡ ಒಟ್ಟು 149 ಸರಕುಗಳನ್ನು ನೇಪಾಳಕ್ಕೆ ರಫ್ತು ಮಾಡಲಾಗಿದೆ. ಜೂನ್ 2026ರಲ್ಲಿ ಮಾತ್ರ, ಇದುವರೆಗೆ ಒಟ್ಟು 266 ಮೆಟ್ರಿಕ್ ಟನ್‌ನ 18 ಸರಕುಗಳನ್ನು ಕಳುಹಿಸಲಾಗಿದೆ ಎಂದು ತಿಳಿಸಿದೆ.

ಇದಕ್ಕೆ ನೇಪಾಳ ಸಚಿವಾಲಯವು ಸಾಥ್​ ನೀಡಿದ್ದು, ಬಿಸಿನೀರಿನ ಸಂಸ್ಕರಣೆಯ ಅವಶ್ಯಕತೆ ಸೇರಿ ಕೆಲವು ಆಮದು ಷರತ್ತುಗಳನ್ನು ನೇಪಾಳ ಇತ್ತೀಚೆಗೆ ಪರಿಷ್ಕರಿಸಿದೆ ನಿಜ. ಆದರೆ, ಭಾರತದಿಂದ ಬರುತ್ತಿರುವ ಮಾವಿನ ಹಣ್ಣುಗಳ ಆಮದು ಸ್ಥಗಿತಗೊಂಡಿಲ್ಲ. ಇಲ್ಲಿಂದ ಅಂತಹ ಯಾವುದೇ ನಿರ್ಬಂಧ ಅಥವಾ ನಿಷೇಧವನ್ನು ಹೇರಲಾಗಿಲ್ಲ ಎಂದು ಸಚಿವಾಲಯ ತಿಳಿಸಿದೆ.

ಭಾರತವು ಪ್ರತಿ ವರ್ಷ ಸುಮಾರು 24 ಮಿಲಿಯನ್ ಮೆಟ್ರಿಕ್ ಟನ್ ಮಾವಿನ ಹಣ್ಣುಗಳನ್ನು ಉತ್ಪಾದಿಸುತ್ತದೆ. ಇದರಲ್ಲಿ, ಸುಮಾರು 32,000 ಮೆಟ್ರಿಕ್ ಟನ್‌ಗಳನ್ನು ರಫ್ತು ಮಾಡಲಾಗುತ್ತದೆ. ಆದರೆ, ಬಹುಪಾಲು ದೇಶೀಯ ಮಾರುಕಟ್ಟೆಗೆ ಸೀಮಿತವಾಗಿದೆ. ಅಗ್ರ 5 ಮಾವಿನ ಪ್ರಭೇದಗಳಿಗೆ ದೇಶದ ಪ್ರಮುಖ ರಫ್ತು ತಾಣವೆಂದರೆ ಅದು ಅಮೆರಿಕ, ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ), ಯುನೈಟೆಡ್ ಕಿಂಗ್‌ಡಮ್ (ಯುಕೆ), ನೆದರ್‌ಲ್ಯಾಂಡ್ಸ್ ಮತ್ತು ಸೌದಿ ಅರೇಬಿಯಾ.

ನೇಪಾಳವು ಭಾರತೀಯ ಮಾವಿನ ರಫ್ತಿಗೆ ಪ್ರಮುಖ ಮಾರುಕಟ್ಟೆಯಲ್ಲದಿದ್ದರೂ, ಈ ನಿರ್ಬಂಧಗಳು ಅಲ್ಫೋನ್ಸೊ, ದಶೇರಿ, ಚೌಸಾ, ಕೇಸರ್, ಲ್ಯಾಂಗ್ರಾ ಮತ್ತು ಬಂಗನಪಲ್ಲಿಯಂತಹ ಜನಪ್ರಿಯ ಪ್ರಭೇದಗಳ ಸಾಗಣೆಯ ಮೇಲೆ ಪರಿಣಾಮ ಬೀರಬಹುದು ಎಂದು ವರದಿಗಳು ಉಲ್ಲೇಖಿಸಿವೆ,(ಏಜೆನ್ಸೀಸ್).